រាជធានីភ្នំពេញ ៖ ស្ត្រីដែលប្រកាសដឹងឮស្ទើរទូទាំងប្រទេសថា ជាប្រពន្ធចុងលោកកឹម សុខា រួមទាំងម្តាយត្រូវបានក្រុមអង្គរក្សរបស់លោកកឹម សុខា នាំគ្នាចោមរោមវាយដំ និងរុញច្រានបណ្តាលឱ្យស្ត្រីជាម្តាយរបួសគ្រាំខ្លួនសន្លប់ដេកស្តូកស្តឹងនៅកន្លែងកើតហេតុ ខណៈពេលដែលពួកគាត់ទាំង២នាក់ម្តាយនិងកូនព្យាយាមស្វែងរកជួបលោកកឹម សុខា ដែលកំពុងសំណេះសំណាល
រាជធានីភ្នំពេញ ៖ ស្ត្រីដែលប្រកាសដឹងឮស្ទើរទូទាំងប្រទេសថា ជាប្រពន្ធចុងលោកកឹម សុខា រួមទាំងម្តាយត្រូវបានក្រុមអង្គរក្សរបស់លោកកឹម សុខា នាំគ្នាចោមរោមវាយដំ និងរុញច្រានបណ្តាលឱ្យស្ត្រីជាម្តាយរបួសគ្រាំខ្លួនសន្លប់ដេកស្តូកស្តឹងនៅកន្លែងកើតហេតុ ខណៈពេលដែលពួកគាត់ទាំង២នាក់ម្តាយនិងកូនព្យាយាមស្វែងរកជួបលោកកឹម សុខា ដែលកំពុងសំណេះសំណាលជាមួយអ្នកគាំទ្របក្សកាលពីព្រឹកថ្ងៃទី១៣ មិថុនា នៅក្នុងភូមិទី៨ សង្កាត់កំពង់លាវ ក្រុងព្រៃវែង ខេត្តព្រៃវែង ដើម្បីឱ្យលោកកឹម សុខា ទទួលខុសត្រូវលើប្រពន្ធនិងកូនទាំងពីរ ។
ស្ត្រីជាម្តាយដែលសន្លប់ដេកស្តូកស្តឹងដោយក្រុមអង្គរក្សវាយត្រូវបានដឹកតាមរថយន្តសង្គ្រោះបន្ទាន់ឆ្ពោះទៅមន្ទីរពេទ្យបង្អែកខេត្តនិងបន្តបញ្ជូនមកដល់មន្ទីរពេទ្យកាល់ម៉ែតនៅវេលាម៉ោង១២ថ្ងៃត្រង់ថ្ងៃដដែល ។ ស្ត្រី ជាប្រពន្ធឈ្មោះកែវ សុផាន់ណារី អាយុ៤១ឆ្នាំ មានលំនៅផ្ទះជួលភូមិ ទួលសង្កែ សង្កាត់ទួលសង្កែ ខណ្ឌឫស្សីកែវ ចំណែកស្ត្រីជាម្តាយឈ្មោះសម ផល្លា អាយុ៦២ឆ្នាំ ។ នេះជាលើកទី៣ហើយ ដែលស្ត្រីជាប្រពន្ធចុង និងម្តាយ បានព្យាយាមស្កាត់រកដើម្បីជួបលោកកឹម សុខា ដែលជាប្រធានស្តីទីគណបក្សសង្គ្រោះជាតិ ក្នុងគោលបំណងដើម្បីឱ្យលោកកឹម សុខា ទទួលខុសត្រូវលើប្រពន្ធនិងកូន ដែលលើកទី១នៅស្រុកកៀនស្វាយ កាលពីរសៀលថ្ងៃទី១១ មិថុនា ក្នុងពិធីជួបជុំវេទិកាបក្ស ។
លើកទី២នៅមុខស្នាក់ការគណបក្សសង្គ្រោះជាតិក្នុងសង្កាត់បឹងកក់ទី២ ខណ្ឌទួលគោក នៅពេលដែលលោកកឹម សុខា ធ្វើសន្និសីទកាសែតកាលពីព្រឹកថ្ងៃទី១២ មិថុនា បណ្តាឱ្យមានការរុញច្រានយ៉ាងអាក្រក់ និងលើកទី៣នេះនៅក្រុងព្រៃវែង ។ ទោះបីជាយ៉ាងនេះក្តីលោកកឹម សុខា បានបដិសេធដោយមិនទទួលស្គាល់ឡើយព្រមទាំងមានការចោទថា គឺជាការរៀបចំដើម្បីបង្ហូចកិត្តិយសរបស់លោកទៅវិញ តែស្ត្រីជាប្រពន្ធចុងនិងម្តាយបានចាត់ទុកជារឿងពិត ព្រោះគាត់មានការឈឺចាប់ណាស់ដែលជួបអ្នកបោកប្រាស់គឺលោកកឹម សុខា ដែលបានបន្សល់ទុកកូនចិញ្ចឹមចំនួន២នាក់រស់ក្នុងផ្ទះជួល ស៊ីអត់ស៊ីឃ្លាន ដោយពុំបានរៀនសូត្រអ្វីឡើយ ។
នៅចំពោះមុខអ្នកយកព័ត៌មានមួយក្រុមធំស្ត្រីជាប្រពន្ធចុងនិងម្តាយបានបញ្ចេញឆន្ទៈថា គាត់និងតាមរករឿងលោកកឹម សុខា នៅគ្រប់វេទិកានយោបាយទាំងអស់ ដើម្បីឱ្យលោកកឹម សុខា ទទួលស្គាល់និងសងជំងឺចិត្តជាទឹកប្រាក់ចំនួន១ម៉ឺនដុល្លារ តាមការប្តឹងទាមទារ ដើម្បីយកមកមើលជំងឺ និងចិញ្ចឹមកូន តែពេលនេះទើបតែ៣លើក ក៏ត្រូវក្រុមអង្គរក្សាវាយទ្រមខ្លួន រហូតម្តាយសន្លប់ចូលមន្ទីរពេទ្យ ។ តាមព័ត៌មានឱ្យដឹងថា នៅវេលាម៉ោង៤ទៀបភ្លឺថ្ងៃទី១៣ មិថុនា ស្ត្រីជាប្រពន្ធចុងលោកកឹម សុខា និងម្តាយបានធ្វើដំណើរចេញពី ភ្នំពេញឆ្ពោះទៅកាន់ខេត្តព្រៃវែង ដើម្បីបានជួបលោកកឹម សុខា នៅក្នុងវេទិកានយោបាយមួយដែលរៀបចំឡើងនៅក្រុងព្រៃវែង របស់គណបក្សសង្គ្រោះជាតិ ។
មុនពេលចាកចេញ អ្នកស្រីកែវ សុផាន់ណារី បានផ្ញើកូនចំនួន២នាក់ ម្នាក់ឈ្មោះកឹម សុខេង ភេទស្រី អាយុ៨ឆ្នាំ និងកូនប្រុសឈ្មោះ កឹម សុខខៃ អាយុ៦ឆ្នាំ ឱ្យម្ចាស់ផ្ទះជួលជួយមើល ។ អ្នកស្រី កែវ សុផាន់ណារី និយាយរៀបរាប់ឱ្យដឹងថានៅព្រឹកថ្ងៃកើតហេតុ គាត់រួមទាំងម្ដាយបានធ្វើដំណើរទៅដល់ក្រុងព្រៃវែងនៅវេលាម៉ោង៨ព្រឹក ។ នៅពេលដែលកម្មវិធីចាប់ផ្ដើមម្ដាយរបស់គាត់បានដើរចូលទៅវេទិកាជួបលោក កឹម សុខា និងចាប់ដៃលោក កឹម សុខា ហើយនិយាយថា មេ៉ចឱ្យប្រពន្ធកូនអត់បាយស៊ី ហើយហេតុអ្វីមិនជួយលុយកាក់ខ្លះមក? ពេលនោះលោក កឹម សុខា គ្រវៀសដៃ ហើយត្រូវបានក្រុមអង្គរក្សនាំគ្នាចាប់វាយម្ដាយ និងរូបអ្នកស្រីតែម្ដង ។
ពេលនោះធ្វើឱ្យភ្ញាក់ផ្អើលយ៉ាងខ្លាំង ហើយក្រុមសកម្មជនគណបក្សនោះមកជេរគាត់ថែមទៀត ។ ចំណែកម្ដាយរបស់គាត់ត្រូវបានក្រុមអង្គរក្សវាយទ្រមខ្លួន ត្រូវប៉ូលិសនាំទៅសាកសួរ ក្រោយមកក៏ដួលសន្លប់ត្រូវរថយន្ដបញ្ជូនទៅមន្ទីរពេទ្យខេត្ដ និងក្រោយមកបញ្ជូនទៅមន្ទីរពេទ្យកាល់ម៉ែត្ររាជធានីភ្នំពេញ ។ តាមរបាយការណ៍ព័ត៌មានពីក្រុងព្រៃវែងបានឱ្យដឹងពីហេតុការណ៍ខាងលើនេះថា បានកើតឡើងកាលពីវេលាម៉ោងប្រមាណជា៨និង៥០នាទីព្រឹក នៅលើកំណាត់ផ្លូវជាតិលេខ១១ ស្ថិតក្នុងសង្កាត់កំពង់លាវ ក្រុងព្រៃវែង ។
ប្រជាពលរដ្ឋនៅក្បែរកន្លែងកើតហេតុបានឱ្យដឹងថា ស្ត្រីទាំង២នាក់ខាងលើបានព្យាយាមចូលទៅជួបនិយាយជាមួយលោក កឹម សុខា ប្រធានស្តីទីគណបក្សសង្គ្រោះជាតិ ខណៈពេលដែលលោកកំពុងទៅជួបសំណេះសំណាលជាមួយសកម្មជនគណបក្សរបស់លោកទីនោះ ។ ប៉ុន្តែអ្វីដែលស្ត្រីទាំង២នាក់នេះចង់ជួបនោះ គឺមិនបានដូចបំណងឡើយ ហើយត្រូវបានស្ត្រីម្នាក់ដែលគេមិនស្គាល់ឈ្មោះ ប៉ុន្តែគេស្គាល់ថាជាក្មួយស្រីរបស់លោក កឹម សុខា បានរារាំងខណៈពេលដែលស្ត្រីទាំង២នាក់នេះព្យាយាមសម្រុកចូលទៅក្នុងអង្គពិធីនោះ ។
បន្ទាប់ពីមានការប្រទូស្តរ៉ាយនោះទើបបណ្តាលឱ្យមានការជ្រួលច្របល់កាន់តែខ្លាំង ហើយនៅក្នុងពេលជ្រួលច្របល់នោះត្រូវបានកងអង្គរក្សលោក កឹម សុខា និងសកម្មជនបក្សសង្គ្រោះជាតិជាច្រើននាក់ បានព្រួតគ្នាវាយ និងចាប់ក្រៀកយកចេញមកក្រៅវិញ ដោយរារាំងមិនឱ្យអ្នកទាំងពីរនៅជួបតទល់ជាមួយលោក កឹម សុខា ជាប្តីហេងសងនេះឡើយ ។ ដោយពុំអាចជួបលោក កឹម សុខា បានហើយខ្លួនប្រាណត្រូវគេព្រួតវាយយ៉ាងដំណំផងនោះ ក៏នាំគ្នាទៅកាន់ស្នងការដ្ឋាននគរបាលខេត្ត សុំឱ្យសមត្ថកិច្ចជួយអន្តរាគមន៍ និងប្តឹងពីជនដែលបានវាយធ្វើបាបលើរាងកាយរបស់ពួកគាត់ ។
ប៉ុន្តែដោយមើលឃើញថា ស្ត្រីទាំង២នាក់មានរបួស ពិសេសស្រ្តីជាម្តាយទន់ខ្លួនដេកដួលសមត្ថកិច្ចក៏បានទាក់ទងហៅរថយន្តសាមុយមន្ទីរពេទ្យខេត្តព្រៃវែងមកដឹកយកស្ត្រីរងគ្រោះទាំង២នាក់ទៅកាន់មន្ទីរពេទ្យខេត្ត ដាក់ខ្យល់អុកស៊ីសែនជំនួយ រួចក៏បញ្ជូនបន្តទៅកាន់រាជធានីភ្នំពេញភ្លាមៗតែម្តង ។
ក្រោយពីមានហេតុការណ៍ប្រទូស្តរ៉ាយគ្នាមួយប្រាវរួចមក លោក កឹម សុខា នៅតែបន្តកម្មវិធីសំណេះសំណាលជាមួយសកម្មជនបក្សរបស់លោករហូតដល់ម៉ោង១០ព្រឹកទើបបញ្ចប់ និងចែកផ្លូវគ្នាត្រឡប់ទៅផ្ទះវិញរៀងៗខ្លួន ។
រីឯស្ត្រីជាក្មួយលោក កឹម សុខា និងបក្សពួកមិនត្រូវបានសមត្ថកិច្ចចាប់ខ្លួនទេ ប៉ុន្តែប្រភពព័ត៌មានក្រៅផ្លូវការបានឱ្យដឹងថា សមត្ថកិច្ចកំពុងសុំគោលការណ៍ពីព្រះរាជអាជ្ញា ដើម្បីធ្វើការឃាត់ខ្លួនពីបទបង្ករបួសស្នាមលើអ្នកដទៃ ។ គួរបញ្ជាក់ថា រឿងអាស្រូវស្នេហារបស់លោក កឹម សុខា បានបែកធ្លាយលើកដំបូងកាលពីព្រឹកថ្ងៃទី៩ មិថុនា ស្របពេលដែលមានមហាបាតុកម្មមួយថ្កោលទោសលោក កឹម សុខា ដែលបាននិយាយពីគុកទួលស្លែងសិប្បនិម្មិត ។
ពេលនោះមានការភ្ញាក់ផ្អើលកើតឡើងព្រោះគេឃើញអ្នកស្រី កែវ សុផាន់ណារី និងម្ដាយឈ្មោះ សម ផល្លា បានចេញមុខមកអះអាងថា ជាប្រពន្ធចុងលោក កឹម សុខា ព្រមទាំងម្ដាយបានចូលរួមធ្វើបាតុកម្មប្រឆាំងលោក កឹម សុខា និងបានចាត់ទុកលោក កឹម សុខា ជាមនុស្សបោកប្រាស់ និយាយគ្មានការពិតសន្យាខ្យល់ ហើយបោះបង់ប្រពន្ធ និងកូនចោលដោយមិនទទួលខុសត្រូវ ព្រមទាំងកាន់បដាមួយដែលសរសេរថា «លោក កឹម សុខា ចេញមុខការពាររបបប្រល័យពូជសាសន៍» ។ បន្ទាប់ពីការបង្ហាញមុខស្រ្ដីជាប្រពន្ធចុង និងម្ដាយបានធ្វើឱ្យភ្ញាក់ផ្អើលឡើង ។ ព្រោះតែរឿងអាស្រូវនេះបានធ្វើឱ្យជីវិតនយោបាយរបស់លោក កឹម សុខា ពោរពេញដោយភាពខ្មៅងងឹតនិងអាម៉ាសបន្ថែមទៀត ។
ទន្ទឹមនឹងការតាមរករឿងលោក កឹម សុខា ឱ្យទទួលខុសត្រូវនេះ អ្នកស្រី កែវ សុផាន់ណារី ក៏ធ្លាប់បានដាក់ពាក្យប្ដឹងលោក កឹម សុខា ទៅសាលាដំបូងរាជធានីភ្នំពេញ កាលពីខែកុម្ភៈ ដើម្បីសុំទាមទារប្រាក់ចំនួន១ម៉ឺុនដុល្លារ ចិញ្ចឹមជីវិត និងព្យាបាលជំងឺផងដែរ ប៉ុន្តែការសម្រេចរបស់តុលាការយឺតពេក មិនដឹងឆ្នាំណាទទួលបានយុត្តិធម៌ ។ អ្នកស្រី កែវ សុផាន់ណារី បញ្ជាក់ឱ្យដឹងទៀតថា គាត់មានទំនាក់ទំនងស្នេហាជាមួយលោក កឹម សុខា តាំងពីឆ្នាំ១៩៩៩ ដោយពុំបានចុះសំបុត្រអាពាហ៍ពិពាហ៍ទេបានត្រឹមសែនព្រេនកុំឱ្យមេបាកាច់ប៉ុណ្ណោះ ដែលអ្នកភូមិដឹងឮទាំងអស់ ។
កំឡុងពេលរស់នៅជាមួយគ្នានោះ គាត់មានផ្ទៃពោះបីខែ តែជាអកុសលមានជំងឺបេះដូងត្រូវវះកាត់កូននោះក៏រលូតបាត់ទៅ។ លុះក្រោយមកគាត់ និងលោក កឹម សុខា បានឯកភាពគ្នាសុំកូនគេ២នាក់ ប្រុសម្នាក់ ស្រីម្នាក់ មកចិញ្ចឹមដែលពេលនោះកូនស្រីអាយុ៨ឆ្នាំ និងកូនប្រុស អាយុ៦ឆ្នាំ ហើយអត់បានចូលសាលាទេ ព្រោះក្រពេក ។ អ្នកស្រី កែវ សុផាន់ណារី និយាយថា អ្នកស្រីឈឺចាប់ណាស់ ក្នុងនាមជាប្រពន្ធចុងលោក កឹម សុខា ព្រោះគាត់ជាមនុស្សបោកប្រាស់ ជាមនុស្សនិយាយគ្មានការពិត ហើយបោះបង់គាត់ និងកូនចោលទុកឱ្យគាត់មានជំងឺប្រចាំកាយរស់នៅចិញ្ចឹមកូនយ៉ាងវេទនា
បំផុត ។ ដោយសារតែភាពមិនទទួលខុសត្រូវ កាលពីកំឡុងខែកុម្ភៈ គាត់បានដាក់ពាក្យបណ្តឹងទៅសាលាដំបូងរាជធានីភ្នំពេញតាមរយៈក្រសួងកិច្ចការនារី ទាមទារប្រាក់ឧបត្ថម្ភ ដើម្បីចិញ្ចឹមជីវិត ព្យាបាលជំងឺ និងទាមទារជំងឺចិត្តចំនួន១ម៉ឺនដុល្លារ ។
ស្ត្រីជាប្រពន្ធចុងលោកកឹម សុខា បាននិយាយបន្តទៀតថា អ្នកស្រីនិងដាក់ពាក្យបណ្តឹងប្តឹងលោកកឹម សុខា ដែលមិនទទួលខុសត្រូវការពិត និងបានបញ្ជាឱ្យក្រុមអង្គរក្សវាយមកលើរូបគាត់ និងម្តាយ ហើយអ្នកស្រីនិងតាមអុកឡុកគ្រប់វេទិកា ទាំងអស់ លុះត្រាតែលោកប្តីទទួលស្គាល់ព្រមចិញ្ចឹមប្រពន្ធកូនទើបឈប់រករឿង ៕
ចែករំលែកព័តមាននេះ