រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍អំពាវនាវចំពោះលោកជុំ ម៉ី ក៏ដូចជាប្រជាពលរដ្ឋទាំងឡាយដែលមានកំហឹងជាមួយនឹងអ្នកដែលបាននិយាយទាក់ទិន នឹងគុកទួលស្លែង សូមមេត្តាផ្អាកការធ្វើបាតុកម្ម ។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍អំពាវនាវបែបនេះ នាព្រឹកថ្ងៃទី១៣ មិថុនា ក្នុងឱកាសអញ្ជើញជាអធិបតីដ៏ខ្ពង់ខ្ពស់ ក្នុងពិធីសម្ពោធទីស្នាក់ការថ្មីគណៈកម្មាធិការជាតិអូឡាំពិក ស្ថិតក្នុងសង្កាត់វាលវង់ ខណ្ឌ៧មករា ។
ទាក់ទិននឹងពាក្យថា ខ្វះមនុស្សធ្វើបាតុកម្ម សម្តេចតេជោនាយករដ្ឋមន្ត្រីបញ្ជាក់ថា គ្រប់គណបក្សទាំងអស់ នៅពេលស្នើសុំទៅសាលារាជធានីភ្នំពេញ ក្នុងបំណងធ្វើបាតុកម្ម បើសុំចំនួនមនុស្សលើសពីមួយម៉ឺននាក់ គឺសាលារាជធានីភ្នំពេញមិនអនុញ្ញាតទេ ។ សាលារាជធានីភ្នំពេញអនុញ្ញាតកម្រិតបាតុករចំនួនតែមួយម៉ឺននាក់ប៉ុណ្ណោះ ដូច្នេះសូមកុំបកស្រាយខុស ថាគ្មានមនុស្សធ្វើបាតុកម្ម ។ សម្តេចបានសម្តែងការអរគុណចំពោះក្រុមបាតុករទាំងអស់ដែលមិនបានប្រើហិង្សាណាមួយបង្កើតឱ្យមានការប្រទូសរ៉ាយ និងអរគុណចំពោះគណបក្សប្រឆាំងដែលចេញមុខមកទទួលយកញត្តិជំនួសឱ្យបុគ្គលដែលត្រូវគេធ្វើបាតុកម្ម ទាមទារឱ្យមានការសុំទោស ។
នេះជាវប្បធម៌មួយដែលបានកើតឡើង ក្នុងរយៈពេលកន្លងទៅ គឺការធ្វើបាតុកម្មដោយអហិង្សា ។ ឯអ្នកដែលជាតំណាងឱ្យបុគ្គលដែលគេប្រឆាំងក៏បានចេញមកទទួលញត្តិដោយសន្តិវិធីដែរ ។ ដូច្នេះ ចំណុចនេះក៏បានបង្កើតនូវស្ថានភាពមួយ ក្នុងការគ្រប់គ្រងសភាពការណ៍ ទោះបីបាតុករនៅមិនទាន់អស់ចិត្តនៅឡើយ ទាមទារចង់ធ្វើបាតុកម្ម ហើយនឹងមានបាតុកម្មដេញតាមមនុស្សដែលបាតុករសុំទាមទារ ព្រោះបាតុកម្មនេះគេមិនមែនប្រឆាំងគណបក្សនយោបាយ ឬក្រុមគ្រួសារទេ គឺចំពោះតែបុគ្គលម្នាក់គត់ ព្រោះបុគ្គលនេះ ប្រើពាក្យសម្តីិមិនត្រឹមត្រូវ ដែលសម្តីនេះគ្មានអ្នកណាកាត់តបានទេ ។ បើចង់ដឹងថាកាត់ត ឬមិនកាត់ត សូមយកទៅឱ្យតុលាការធ្វើកោសល្យវិច័យទៅ ទើបដឹងថា កាត់ត ឬមិនកាត់ត ។
ការសុំរបស់បាតុករគ្មានអ្វីធ្ងន់ធ្ងរទេ ឥឡូវនេះ សាមីខ្លួនអត់សុំទោសទេ ហើយក៏បានចាត់ទុកថា រឿងនេះជាឆាកល្ខោនទៅទៀត ដែលធ្វើឱ្យកំហឹងបាតុករ កាន់តែពុះកញ្ជ្រោលថែមទៀត ។ ប៉ុន្តែបើទោះបីពេញចិត្ត ឬមិនពេញចិត្តរបស់បាតុករក៏ដោយចុះ មិនមែនមានតែលោកពូ ជុំ ម៉ី ទេ ប្រជាជនទូទាំងប្រទេសដែលគេក្តៅក្រហាយក្នុងរឿងនេះ បាតុករអត់ទាន់អស់ចិត្តទេ ។ សម្តេចតេជោ មានប្រសាសន៍ថា ប៉ុន្តែនៅក្នុងកាលៈទេសៈដែលការបោះឆ្នោតជាតិមកដល់នៅពេលខាងមុខ ដើម្បីបង្កើតបរិយាកាសអនុគ្រោះសម្រាប់ការបោះឆ្នោត ខ្ញុំសូមអំពាវនាវចំពោះលោកពូ ជុំ ម៉ី ក៏ដូចជាអំពាវនាវចំពោះបាតុករនៅគ្រប់ទីកន្លែង ដែលមានបំណងធ្វើបាតុកម្មដេញតាមទៅដល់កន្លែងណា តាមដល់កន្លែងនោះដែលបានកើតឡើងរួចមកហើយ នៅស្រុកល្វាឯម និងនៅកៀនស្វាយ និងកើតនៅកន្លែងដទៃទៀត សូមមេត្តាបញ្ឈប់ ផ្អាកសិន ហើយរកវិធីផ្សេងទៅ ព្រោះដំណើរការបោះឆ្នោតជិតមកដល់ ជួនកាលបុគ្គលនោះធ្វើដំណើរទៅពាក់ព័ន្ធនឹងសារនយោបាយរបស់គាត់ទៅប្រជុំជាមួយសមាជិករបស់គាត់នាំឱ្យមានបញ្ហា ។
អ៊ីចឹងខ្ញុំសូមស្នើកុំធ្វើបាតុកម្ម ខ្ញុំមិនអាចបិទសិទ្ធិមិនឱ្យធ្វើបាតុកម្មទេ ប៉ុន្តែក្នុងឱកាសនេះអំពាវនាវសូមឱ្យផ្អាកជាបណ្តោះអាសន្ន រហូតដល់ការបោះឆ្នោតហើយស្រេចសិន ចាំគិតគូរគ្នាបន្តទៅទៀត។ ឯដំណើរការរបស់អ្នកទាមទារខុសពីដំណើរការបាតុកម្មតាមរបៀបផ្សេង …។ ទាក់ទិននឹងបញ្ហាខាងលើដែលគេថា គណបក្សប្រជាជននៅពីក្រោយ សម្តេចតេជោហ៊ុន សែន បានសង្កត់ធ្ងន់ថា លោកចង់ស្គាល់ពិតប្រាកដនៃរសជាតិរបស់រាជរដ្ឋាភិបាលទេ ? លោកចង់ស្គាល់រសជាតិដែលគណបក្សប្រជាជនដឹកនាំបាតុកម្មទេ លោកចង់ស្គាល់ទេ ? រសជាតិបើសិនជាគណបក្សប្រជាជនចេញមុខពិតប្រាកដ បើលោកចង់ស្គាល់ខ្ញុំឱ្យថ្នាំខ្លាំងលោក ។
ប៉ុន្តែខ្ញុំមិនឆោតល្ងង់ រហូតទៅដល់ចូលអន្ទាក់របស់អស់លោក ដើម្បីបំផា្លញចោលនូវសភាពការណ៍នៃការបោះឆ្នោតទេ សូមលោកកុំភ័ន្តច្រឡំ ។ បើសិនជាមានមេដឹកនាំគណបក្សប្រជាជន ពិសេស ហ៊ុន សែន ចេញមុខ ឬក៏ហេង សំរិន ចេញមុខ ឬក៏អ្នកដឹកនាំដទៃទៀតជាសមាជិកអចិន្ត្រៃយ៍ ឬថ្នាក់ដឹកនាំជាន់ខ្ពស់នៅក្នុងខេត្តណាមួយចេញមុខពិតប្រាកដ កម្រិតអស់លោកទ្រាំទ្រអត់បានទេ បើអស់លោកមិនរត់ចូលក្នុងស្ថានទូតបរទេសទេ ខ្ញុំថ្វាយបង្គំ…។
ខ្ញុំគ្រាន់តែប្រាប់ទៅអស់លោក សូមប្រយ័ត្នប្រយែងពាក្យសម្តីកាន់តែខ្លាំង ។ សូមអំពាវនាវទៅលោកពូ ជុំ ម៉ី ក៏ដូចជាបាតុករទាំងឡាយមេត្តាផ្អាកបាតុកម្មសិន ចាំបោះឆ្នោតហើយ ចាំគិតគូរគ្នាទៀត ។ ឯខ្ញុំមិនផ្អាកនូវការទាមទារតាមរូបភាពផ្សេងៗទេ ។ ខ្ញុំសូមអង្វរករក្នុងឋានៈខ្ញុំជានាយករដ្ឋមន្ត្រីនៃរាជរដ្ឋាភិបាលកម្ពុជា ដែលទទួលខុសត្រូវលើបញ្ហាសន្តិសុខ សណ្តាប់ធ្នាប់សាធារណៈ ហើយក៏ត្រូវធានានូវបរិយាកាសសុខស្រួល ក្នុងដំណាក់កាលនៃដំណើរការឃោសនាបោះឆ្នោតជិតមកដល់ ។
ជាមួយនេះក៏សូមអំពាវនាវចំពោះបក្សប្រឆាំង សូមមេត្តាកុំប្រើលេសប្រើហេតុផលថា រាជរដ្ឋាភិបាលត្រូវទទួលខុសត្រូវ គ្រប់យ៉ាងសម្រាប់លោកឱ្យសោះ ក្នុងករណីទង្វើអាក្រក់របស់អស់លោកដែលបានកើតឡើងដោយខ្លួនឯង ។ ឧទាហរណ៍រឿងនៅលើកដែក បើអាចបញ្ជូនទៅសង្គមស៊ីវិល ឬស្ថានទូតនានាដូចជា នៅលើកដែកក្មួយហៅលោកសុទ្ធតែអ៊ំពេញមាត់ បែរជាលោកប្រមាថគ្នាថា ពាក្យអាក្រក់«អាអត់ពូជ អាល្ងង់ » គ្រាន់តែសួរពីរឿងជេរមេដឹកនាំរបស់គេ ដូច្នេះសូមអស់លោកត្រូវប្រុងប្រយ័ត្ន បើអស់លោកបើកឱ្យគេសួរហើយ អស់លោកឆ្លើយឱ្យមានពាក្យស្រួលស្តាប់ផងបានទេ។
ទង្វើអស់ទាំងនេះ បើសិនជាមានបញ្ហា គ្រោះថ្នាក់កើតមាន តើអ្នកណាទទួលខុសត្រូវ នៅក្នុងកិច្ចប្រជុំរបស់អស់លោកសោះ តើឱ្យអ្នកណាទទួលខុសត្រូវ តែបើគ្រោះថ្នាក់តាមផ្លូវនៅក្រៅអង្គប្រជុំគឺយើង ។ ដើម្បីបញ្ចៀសនូវហិង្សាកើតឡើង អស់លោកត្រូវកម្រិតនូវការនិយាយ ហើយត្រូវទទួលខុសត្រូវខ្លួនឯង ៕
ចែករំលែកព័តមាននេះ