ខេត្តព្រះវិហារ ៖ នៅក្នុងរដូវប្រមូលផលស្រូវ ឆ្នាំ២០១៨នេះប្រជាកសិករជាអ្នកផលិតដំណាំស្រូវ នៅក្នុងខេត្តព្រះវិហារ បានសម្តែងនូវការសប្បាយរីករាយយ៉ាងខ្លាំង នៅក្នុងរដូវចាប់ផ្តើមប្រមូលផលនេះតម្លៃទីផ្សារគុណភាព និងបរិមាណទិន្នផលស្រូវមានការកើនឡើង បើធៀបនឹងឆ្នាំមុន ។
គិតមកដល់ពាក់កណ្តាលខែវិច្ឆិកានេះ កសិករនៅទូទាំងខេត្តព្រះវិហារ កំពុងមមាញឹកប្រមូលផលស្រូវបានប្រមាណជិត៣០% ហើយ ។
លោក ប៉ិល ថាន ជាកសិកររស់នៅភូមិក្របៅ ឃុំគូលែនត្បូង ស្រុកគូលែន ខេត្តព្រះវិហារ បានលើកឡើងថា ក្រោយពេលប្រមូលផលស្រូវរបស់គាត់ឃើញថា ទិន្នផលស្រូវមានការកើនឡើង រីឯតម្លៃស្រូវវិញក៏អាចលក់បានថ្លៃ ដោយស្រូវសើមប្រភេទរំដួលក្នុងមួយគីឡូក្រាម ចន្លោះពី១១០០រៀលទៅ១១៣០រៀល ហើយឈ្មួញបានដើរប្រមូលទិញដល់កន្លែងផ្ទាល់តែម្តង បើធៀបនឹងឆ្នាំមុនតម្លៃស្រូវបានត្រឹមតែ៩០០រៀលប៉ុននោះ ។ លោកបន្តថា ក្រោយពេលប្រមូលផលរួចលោកនឹងលក់កសិផលស្រូវនេះទៅឲ្យឈ្មួញកណ្តាលដែលដើរប្រមូលទិញតាមភូមិឃុំរបស់គាត់ តែសម្រាប់ក្រុមហ៊ុនវិនិយោគទិញស្រូវពីពលរដ្ឋតាមរយៈសហគមន៍នោះ គឺលោកពុំបានលក់ជូនក្រុមហ៊ុននោះទេ ព្រោះលោកមិនមានឈ្មោះជាសមាជិកនៅក្នុងសហគមន៍កសិកម្ម ក្នុងការចុះកិច្ចសន្យាជាមួយក្រុមហ៊ុននោះទេ ។
ដោយសារតែលោកមិនមានដីផ្ទាល់ខ្លួនសម្រាប់ធ្វើស្រែនោះទេ ព្រោះដីស្រែ២ហិកតាដែលលោកធ្វើនេះគឺលោកបានជួលដីស្រែគេ ដើម្បីធ្វើបង្វាស់ស្រូវតែប៉ុណ្ណោះ ។ តែទោះជាយ៉ាងនេះក្តីលោកថា ប្រសិនបើលោក មានដីកសិកម្មផ្ទាល់ខ្លួនលោកនឹងចូលរួមជាសមាជិករបស់សហគមន៍កសិកម្ម នៅក្នុងភូមិរបស់គាត់ ដើម្បីអនុវត្តកសិកម្មតាមកិច្ចសន្យាជាមួយក្រុមហ៊ុនដែរ ព្រោះមិនមានការព្រួយបារម្ភនឹងតម្លៃទីផ្សារទេ ។
ដោយឡែកអ្នកស្រី ជា ស្រីយ័ន្ត ជាកសិកររស់នៅទីរួមស្រុកគូលែនក៏បានលើកឡើងថា ឆ្នាំនេះពួកគាត់អាចដាំដុះស្រូវទទួលបានទិន្នផលជាងឆ្នាំមុនកាត់សម្រាប់ទុកហូបក្នុងមួយឆ្នាំនឹងសល់បានមួយចំនួនទៀតសម្រាប់លក់ទៅឲ្យឈ្មួញដើរប្រមូលទិញទៀតផង បើប្រៀបធៀបទៅនឹងឆ្នាំមុន អ្នកស្រីនឹងក្រុមគ្រួសារបានខំធ្វើស្រែដែរ ប៉ុន្តែមិនបានអំណោយផលដល់ទិន្នផលស្រូវរបស់ពួកគាត់ដូចឆ្នាំនេះឡើយ ។ ជាមួយគ្នានេះដែរ លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ បានឲ្យដឹងថា ដំណាំស្រូវសរីរាង្គឆ្នាំនេះសម្រាប់ខេត្តព្រះវិហារ មានការលូតលាស់ល្អជាងឆ្នាំមុន ដោយសារតែកម្រិតទឹកភ្លៀងបានធ្លាក់មកគ្រប់គ្រាន់សម្រាប់ផ្គត់ផ្គង់ដល់ការលូតលាស់ដំណាំនេះ ជាពិសេសទៀតនោះឆ្នាំនេះមិនមានទឹកជំនន់ជនលិចស្រែចម្ការរបស់កសិករដូចឆ្នាំមុនៗឡើយ ដូច្នេះហើយការខូចខាតស្រែស្រូវរបស់ពួកគាត់មិនមានឡើយ គិតមកដល់បច្ចុប្បន្ននេះកសិករនៅទូទាំងខេត្តព្រះវិហារកំពុងតែមមាញឹកក្នុងការច្រូតកាត់ប្រមូលផលស្រូវជាបន្តបន្ទាប់ ។
យោងតាមរបាយការណ៍របស់មន្ទីរកសិកម្មរុក្ខាប្រមាញ់ និងនេសាទខេត្តព្រះវិហារ នៅក្នុងឆ្នាំ២០១៨នេះ កសិករទូទាំងខេត្តព្រះវិហារបានផលិតដំណាំស្រូវនៅលើផ្ទៃដីប្រមាណជិត៩ម៉ឺនហិកតា បើប្រៀបធៀបនឹងឆ្នាំមុន កើនឡើងជាង១ពាន់ហិកតា ដែលសុទ្ធសឹងតែជាស្រូវធម្មជាតិសុទ្ធសាធ មានដូចជា ស្រូវស ស្រូវផ្ការំដួល ស្រូវនាងអុក-នាងអំជាដើម ៕
ចែករំលែកព័តមាននេះ