ខេត្តព្រះសីហនុ ៖ រដ្ឋមន្ត្រីក្រសួងទេសចរណ៍បានប្រកាសសមាសភាពក្រុមការងារចំនួន៥ ដើម្បីពង្រឹងការគ្រប់គ្រង និងអភិវឌ្ឍន៍ឧស្សាហកម្មទេសចរណ៍ក្រុងព្រះសីហនុ កោះរ៉ុង និងកោះរ៉ុងសន្លឹម ឲ្យកាន់តែទាក់ទាញថែមទៀត ។
ថ្លែងនៅក្នុងពិធីផ្សព្វផ្សាយប្រកាសស្ដីពី «ការបង្កើតក្រុមការងារជំនាញដើម្បីជួយពង្រឹងការគ្រប់គ្រង និងអភិវឌ្ឍន៍ខេត្តព្រះសីហនុ » នៅសណ្ឋាគារឆ្នេរឯករាជ្យ កាលពីថ្ងៃទី១២ ខែវិច្ឆិកា កន្លងមក លោក ថោង ខុន រដ្ឋមន្ត្រីក្រសួងទេសចរណ៍បានឲ្យដឹងថា រាជរដ្ឋាភិបាល ក៏ដូចជាក្រសួងទេសចរណ៍ បានខិតខំធ្វើឱ្យគោលដៅ ទេសចរណ៍ដ៏សំខាន់មួយនេះឲ្យមានសេវាកម្មប្រកបដោយគុណភាព អនាម័យ និងភាពទាក់ទាញ ពោលគឺក្រសួងនៅតែខិតខំសហការគ្នាជាមួយផ្នែកពាក់ព័ន្ធ និងផ្នែកឯកជនជាដៃគូ ដើម្បីកែលម្អការខ្វះខាត និងខិតខំប្រឹងអភិវឌ្ឍន៍បន្តទៅមុខទៀត ប៉ុន្តែត្រូវមានការចូលរួមពីសំណាក់រដ្ឋបាលខេត្ត ស្ថាប័នពាក់ព័ន្ធ ផ្នែកឯកជន និងប្រជាពលរដ្ឋជាចាំបាច់ ។
លោករដ្ឋមន្ត្រីបន្ដថា ដើម្បីពង្រឹងការគ្រប់គ្រងតំបន់ទេសចរណ៍ក្នុងខេត្តព្រះសីហនុឲ្យបានល្អ ក្រសួងបានបង្កើតក្រុមការងារចំនួន៥រួមមាន៖១-ក្រុមការងារជំរុញចលនាទីក្រុងស្អាត ។ ២-ក្រុមការងារពង្រឹងការគ្រប់គ្រងឧស្សាហកម្មទេសចរណ៍ (រួមទាំងការពង្រឹងគុណភាពសេវាកម្ម ដើម្បីទទួលទេសចរចិន China Ready Accreditation System ។ ៣-ក្រុមការងារពង្រឹងការគ្រប់គ្រងឆ្នេរ ។ ៤-ក្រុមការងារជំរុញបណ្ដុះបណ្ដាលជំនាញវិជ្ជាជីវៈទេសចរណ៍ ។ ៥-ក្រុមការងារពិនិត្យ និងរៀបចំកែសម្រួលរចនាសម្ព័ន្ធគ្រប់គ្រងរបស់មន្ទីរទេសចរណ៍ខេត្តព្រះសីហនុ ។
ក្នុងឱកាសនោះ លោករដ្ឋមន្ត្រីក៏បានណែនាំអំពីតួនាទីភារកិច្ចរបស់ក្រុមការងារនីមួយៗ រួមទាំងកាងារជាក់ស្តែងមួយចំនួនបន្ថែមទៀត ដូចជា ការតុបតែងលម្អសំណង់អគារកន្លែងទទួលភ្ញៀវដែលគប្បីត្រូវរំលេចនូវរចនាបថខ្មែរឱ្យបានច្រើន និងត្រូវយកចិត្តទុកដាក់លើការលើកស្លាកយីហោនៅតាមមូលដ្ឋានអាជីវកម្មទាំងអស់ពោលរាល់មូលដ្ឋានអាជីវកម្មទាំងអស់ត្រូវដាក់អក្សរខ្មែរ(ភាសាជាតិ)ឱ្យបានធំៗនៅផ្នែកខាងលើ។ ចំណែកផ្នែកខាងក្រោមអក្សរខ្មែរ ត្រូវដាក់អក្សរអង់គ្លេស(ភាសាសកល) ហើយនៅផ្នែកខាងក្រោមអក្សរអង់គ្លេស ត្រូវដាក់អក្សរណា ក៏បាន ទៅតាមបំណងរបស់ម្ចាស់អាជីវកម្ម ។ លោកបញ្ជាក់ថា ៖« ចំពោះទំហំអក្សរនៅជួរទី២ និងជួរទី៣នេះ ត្រូវមានទំហំតូចជាងអក្សរខ្មែរពាក់កណ្ដាល ។ ចំណែកអត្ថន័យនៃឈ្មោះហាង មិនត្រូវឱ្យប៉ះពាល់ដល់សីលធម៌សង្គមកម្ពុជា ឬមិនសមរម្យណាមួយឡើយ »។
លោករដ្ឋមន្ត្រី ថោង ខុន ក៏បានជំរុញផងដែរ ឱ្យបន្តខិតខំបណ្ដុះបណ្ដាលធនធានមនុស្សឱ្យបានច្រើន ពីព្រោះកម្ពុជាមិនមែនជាប្រទេស ដែលខ្វះការងារធ្វើនោះទេ តែជាប្រទេសដែលខ្វះបុគ្គលិកជំនាញធ្វើការ ពិសេសគឺក្នុងវិស័យសំណង់ និងវិស័យទេសចរណ៍នេះតែម្ដង ដែលកំពុងមានភាពរីកចម្រើន និងត្រូវការបុគ្គលិកជំនាញជាច្រើនសម្រាប់ធ្វើការនៅតាមមូលដ្ឋាន អាជីវកម្មទេសចរណ៍នានា ។ លោករដ្ឋមន្ត្រីថ្លែងថា ៖« យើងត្រូវបង្កើតសាលាបណ្តុះបណ្តាលសាលាវិជ្ជាជីវៈជំនាញទេសចរណ៍ឱ្យបានច្រើនបន្ថែមមុខវិជ្ជាជំនាញ និងកៀរគរយុវជនឱ្យចូលសិក្សាជំនាញនានា ពាក់ព័ន្ធនឹងវិស័យទេសចរណ៍ឱ្យបានច្រើន ។ ទន្ទឹមនោះ ក៏ខិតខំបណ្តុះបណ្តាលកម្មវីធីសិក្សានៅ នឹងកន្លែងផងធ្វើការផងដែរ » ។
ទាក់ទងសកម្មភាពការងាររបស់ក្រុមជំនាញលោករដ្ឋមន្ត្រីបានកំណត់ឲ្យក្រុមការងារទាំង៥ ត្រូវជួបប្រជុំរៀងរាល់ខែជាមួយរដ្ឋបាលខេត្ត មន្ទីរទេសចរណ៍ ប្រជាពលរដ្ឋ ម្ចាស់អាជីវកម្មទេសចរណ៍ ដើម្បីបូកសរុបវាយតម្លៃការងារ របស់ខ្លួន និងលើកទិសដៅអភិវឌ្ឍន៍បន្ត ហើយរៀងរាល់៣ខែម្តង លោករដ្ឋមន្ត្រី នឹងដឹកនាំប្រជុំស្តាប់របាយការណ៍លទ្ធផលរបស់ក្រុមការងារទាំង៥ ។ ទន្ទឹមនោះ រាល់អង្គប្រជុំទាំងអស់ គប្បីអញ្ជើញម្ចាស់អាជីវកម្មទេសចរណ៍នានា ចូលរួមឱ្យបានច្រើន និងមានការៀបចំបកប្រែជាភាសាជូនពួកគេ ដើម្បីឱ្យពួកគាត់យល់បាន និងទទួលបាននូវការផ្សព្វផ្សាយ ពីគោលនយោបាយអភិវឌ្ឍន៍ និតីវិធីច្បាប់ លិខិតបទដ្ឋានគតិយុត្តនានា និងការងារពាក់ព័ន្ធជាច្រើនទៀត ។
លោកបានណែនាំឱ្យរដ្ឋបាលខេត្តព្រះសីហនុ ត្រូវបង្កើតសាខាសមាគមសណ្ឋាគារ សាខា សមាគមភោជនីយដ្ឋាន សាខាសមាគមឧស្សាហកម្មទេសចរណ៍នានា ដើម្បីងាយស្រួលក្នុងការ គ្រប់គ្រង ការណែនាំនូវការងារពាក់ព័ន្ធនានា ពិសេសការងារពង្រឹងគុណភាពសេវាកម្ម ព្រមទាំងការអុវត្តច្បាប់នានាឱ្យមានប្រសិទ្ធភាព ។
អភិបាលខេត្តព្រះសីហនុ លោក យន្ត មីន ក៏បានបង្ហាញនូវការឯកភាព និងទទួលយកនូវអនុសាសន៍ និងការចង្អុលបង្ហាញរបស់លោករដ្ឋមន្ត្រីថោង ខុន ទៅអនុវត្តឱ្យបានល្អប្រសើរ ដើម្បីបម្រើដល់ការងារអភិវឌ្ឍន៍វិស័យទេសចរណ៍នៅក្នុងខេត្តព្រះសីហនុ និងទទូចឱ្យមន្ទីរ អង្គភាពជុំវិញខេត្ត ត្រូវរួមសហការគ្នាដោះស្រាយបញ្ហាពាក់ព័ន្ធឱ្យមានប្រសិទ្ធភាពខ្ពស់ ។ លោកអភិបាលខេត្តបានសំណូមពរដល់ប្រជាពលរដ្ឋ និងម្ចាស់មូលដ្ឋានអាជីវកម្មនានា សូមចូលរួមសហការអនុវត្តនីតិវិធី លិខិតបទដ្ឋានគតិយុត្ត ក៏ដូចជាបទបញ្ជានានា ក្នុងការប្រកបអាជីវកម្មរបស់ខ្លួន ដើម្បីរួមគ្នាអភិវឌ្ឍខេត្តព្រះសីហនុ ឱ្យកាន់តែមានភាពទាក់ទាញថែមទៀត ៕
ចែករំលែកព័តមាននេះ