ពណ៌របស់ក្រចកដៃអាចបង្ហាញអំពីរឿងជាច្រើនអំពី អ្វីៗដែលកើតឡើងក្នុងរាងកាយ ។ ពិតណាស់វាមានរឿងដែលកើតឡើងខុសប្រក្រតីហើយបើសិនជាក្រចកអ្នកប្រែទៅជាលឿងដូច្នេះ។ ហេតុផលញឹកញាប់មួយចំនួនដែលអាចធ្វើឲ្យក្រចកដៃអ្នកប្រែទៅជាលឿងខុសធម្មតា៖
១-ការប្រើទឹកប៉ូលាក្រចកជាប់ ៖ វាគឺជារឿងសប្បាយដែរក្នុងការផ្លាស់ប្តូរពណ៌របស់ក្រចកជាទៀងទាត់ទៅតាមអ្វីដែលអ្នកចង់បាន ប៉ុន្តែវាមិនមែនជារឿងល្អទាំងអស់ឡើយដែលអ្នកត្រូវលាបថ្នាំក្រចកជាប់រហូតនោះ ។ នេះដោយសារតែសារធាតុគីមីរបស់ថ្នាំលាបក្រចកនោះ ជាពិសេសថ្នាំដែលមានពណ៌ចាស់ខ្លាំងអាចធ្វើឲ្យមានស្នាមឆ្នូតពណ៌លឿងនៅសល់ជាប់បាន ។ ចូរកុំបារម្ភអីដោយសារតែការចេញជាលឿងក្រចកបែបនេះកើតឡើងដោយសារថ្នាំលាប ហើយក៏គ្មានអ្វីគ្រោះថ្នាក់ដែរ ។
២-ការបង្ករោគដោយមេរោគផ្សិតនៅក្រចក ៖ មេរោគផ្សិតរស់នៅធម្មតាលើរាងកាយយើង។ វាមិនត្រូវបានគេដឹងថាធ្វើឲ្យមានបញ្ហាអ្វីឡើយលុះត្រាតែវាមានការលូតលាស់ខ្លាំងមិនអាចគ្រប់គ្រងបាន ។ មេរោគផ្សិតក៏ត្រូវបានគេរកឃើញនៅលើក្រចកដែរ ហើយការលូតលាស់ខ្លាំងក្លារបស់វាអាចបង្កជាជំងឺលើក្រចកថែមទៀត ។ បើសិនជាអ្នកមានជំងឺនេះ ក្រចកងាយនឹងចេញជាពណ៌លឿង ដែលមានលក្ខណៈ ឆ្នូតៗ ឬ អុជៗ ។ ពេលខ្លះក្រចកទាំងមូលទៅជាលឿងតែម្តងក៏មានដែរ ។ អាការ ផ្សេងៗទៀតមានដូចជា ក្រចកទៅជាក្រាស និងមានក្លិនស្អុយ ។
៣-កង្វះជីវជាតិ ៖ គ្រូពេទ្យនិយាយថា ពណ៌របស់ក្រចកពេលខ្លះអាចបញ្ជាក់ថា មនុស្សម្នាក់នោះកំពុងតែកង្វះជីវជាតិ ឬជាតិរ៉ែ ។ ឧទាហរណ៍ ក្រចកដែលមានពណ៌លឿងគឺច្រើនតែជាការកង្វះវីតាមីន B12 ឬកង្វះជាតិស័ង្កសី ។ ដូច្នេះករណីនេះ ពេលខ្លះថ្នាំបំប៉នអាចជួយបាន ប៉ុន្តែអ្នកក៏ត្រូវតែមានតុល្យភាពលើការទទួលទានអាហារមានជីវជាតិដែរ ។
៤-មានជំងឺ ៖ មានជំងឺពាក់ព័ន្ធមួយចំនួនដែលត្រូវបានគេដឹងថាធ្វើឲ្យក្រចកប្រែទៅជាពណ៌លឿង ។ ជំងឺមួយក្នុងចំណោមនោះគឺជាជំងឺទឹកនោមផ្អែមតែម្តង ។ ការណ៍ពិតនោះគឺថា ជំងឺនេះអាចធ្វើឲ្យខ្សោយរបត់ឈាមរត់ទៅចុងដៃចុងជើង ដែលជាហេតុនាំឲ្យក្រចកកង្វះអុកស៊ីសែន និងជីវជាតិដែលវាត្រូវការដើម្បីមានសុខភាពល្អ ។
អ្នកជំនាញនិយាយថា ការដែលក្រចកទៅជាពណ៌លឿងអាចដោយសារតែបញ្ហាណាមួយនៅលើក្រពេញទីរ៉ូអ៊ីតដែរ ។ បញ្ហាសុខភាពជាច្រើនដែលទាក់ទងនឹងឈាម បេះដូង និងសួតក៏ត្រូវបានគេដឹងថា អាចធ្វើឲ្យក្រចកប្រែទៅជាលឿងដែរ (ប្រភពពី៖ Health.com.kh) ៕
ចែករំលែកព័តមាននេះ