រាជធានីភ្នំពេញ ៖ ផែនការទាញយកដំណក់ប្រេងក្នុងដែនសមុទ្រកម្ពុជា ជាព័ត៌មានមួយដែលពលរដ្ឋខ្មែរបានតាមដាន និងទន្ទឹងរង់ចាំជិត១០ឆ្នាំមកហើយ គ្រាដែលប្រមុខរាជរដ្ឋាភិបាលបានប្រកាសកន្លងមកថា កម្ពុជានឹងទទួលបានដំណក់ប្រេងក្នុងឆ្នាំ២០១២ ។ ប៉ុន្ដែក្រោយពីផែនការនេះបរាជ័យម្ដងជាពីរដងមក ដំណឹងនេះបានដក់ជាប់ក្នុងចិត្តរបស់មហាជនរហូត…
រាជធានីភ្នំពេញ ៖ ផែនការទាញយកដំណក់ប្រេងក្នុងដែនសមុទ្រកម្ពុជា ជាព័ត៌មានមួយដែលពលរដ្ឋខ្មែរបានតាមដាន និងទន្ទឹងរង់ចាំជិត១០ឆ្នាំមកហើយ គ្រាដែលប្រមុខរាជរដ្ឋាភិបាលបានប្រកាសកន្លងមកថា កម្ពុជានឹងទទួលបានដំណក់ប្រេងក្នុងឆ្នាំ២០១២ ។
ប៉ុន្ដែក្រោយពីផែនការនេះបរាជ័យម្ដងជាពីរដងមក ដំណឹងនេះបានដក់ជាប់ក្នុងចិត្តរបស់មហាជនរហូត ។ ទោះបីជាយ៉ាងនេះក្ដី កម្ពុជាមិនបានបោះបង់នូវផែនការទាញយកធនធានរ៉ែប្រេងពីបាតសមុទ្រមួយនេះទេ ហើយរហូតមកពេលនេះ មានការអះអាងថា កម្ពុជានឹងទទួលបានដំណក់ប្រេង៣០ម៉ឺនបារ៉ែលក្នុង១ថ្ងៃនៅចុងឆ្នាំ២០១៩ខាងមុខ ។ តើកម្ពុជាអាចសម្រេចជោគជ័យជាប្រវត្តិសាស្ត្រនូវផែនការមួយនេះមែនឬទេ ?
យោងតាមអគ្គនាយកប្រេងកាតនៃក្រសួងរ៉ែ និងថាមពល លោក ជៀប សួរ បានលើកឡើងនៅក្នុងសន្និសីទព័ត៌មានកាលពីពេលថ្មីៗនេះថា នៅក្នុងឆ្នាំ២០១៩ខាងមុខនេះ កម្ពុជានឹងបានដំណើរការគម្រោងអភិវឌ្ឍន៍ធំៗចំនួនពីរ គឺគម្រោងអភិវឌ្ឍន៍ប្រេងកាតប្លុកA និងគម្រោងរោងចក្រចម្រាញ់ប្រេងផងដែរ ក្នុងនោះចំពោះការអភិវឌ្ឍអណ្តូងប្រេងកាតប្លុកA គឺបានកំពុងសម្រួលលើកិច្ចការមួយចំនួនជាមួយក្រសួង ហើយគណៈកម្មការអន្តរក្រសួង បានពិនិត្យជាប្រចាំលើកការងារវាយតម្លៃបច្ចេកទេស និងមានការប្រជុំជាមួយក្រុមហ៊ុនជារៀងរាល់ខែផងដែរ ដើម្បីឈានទៅអនុវត្តក្នុងដំណើរការឆ្ពោះទៅផលិតប្រេង ។
យោងតាមសេចក្តីប្រកាសព័ត៌មានរបស់ ក្រុមហ៊ុនKRISENGERGY បានឲ្យដឹងកាលពីពេលថ្មីៗនេះថា ក្រុមហ៊ុន SJ Production Barge Ltd ដែលជាបុត្រសម្ព័ន្ធរបស់ខ្លួន បានផ្តល់កិច្ចសន្យាទៅឲ្យក្រុមហ៊ុនKeppel Shipyard Ltd ដើម្បីធ្វើការកែលម្អ និងធ្វើឲ្យប្រសើរឡើងនូវនាវាផលិតកម្មរបស់ខ្លួន ដែលមានតម្លៃ២២លានដុល្លារអាមេរិក ។
ក្រុមហ៊ុន KRISENERGY បាននិងកំពុងរុករកប្រេងពីតំបន់ប្លុកA ដែលមានទំហំ៣ពាន់គីឡូម៉ែត្រការ៉េ ដែលជាតំបន់មានជម្រៅទឹកចន្លោះពី៥០ទៅ៨០ម៉ែត្រ ។ ក្រុមហ៊ុនបានប្រកាសថា ៖« ខ្លួននឹងអាចទាញយកដំណក់ប្រេងបាន៣០ម៉ឺនបារ៉ែលក្នុង១ថ្ងៃ នៅចុងឆ្នាំ២០១៩ខាងមុខនេះនៅដែនសមុទ្ររបស់កម្ពុជា »។
បើតាមការបញ្ជាក់ពីលោក ជៀប សួរ អគ្គនាយកប្រេងកាតនៃក្រសួងរ៉ែ និងថាមពល បានឲ្យដឹងថា បន្ទាប់ពីការចុះហត្ថលេខាជាមួយរាជរដ្ឋាភិបាល ក្រុមហ៊ុន KRISENERGY បានអនុវត្តការងារជាច្រើនដូចជា ការយកគំរូទឹកសមុទ្រនៅតំបន់ប្លុកAយកទៅវិភាគ និងនៅថ្ងៃទី១៣ ខែមីនា ខាងមុខនេះ ក្រុមហ៊ុននឹងបញ្ជូនកប៉ាលទៅមួយទៀត ដើម្បីសិក្សាពីសណ្ឋានដី នឹងចាប់ផ្តើមសាងសង់មូលដ្ឋានប្រេងកាត ។
លោកបន្តថា ៖« បច្ចុប្បន្នក្រុមហ៊ុនកំពុងគូសប្លង់គម្រោងសាងសង់ ហើយសម្រាប់ជំហានបន្ទាប់ គឺការដាក់ដេញថ្លៃការសាងសង់មូលដ្ឋាននោះ ។ ក្រោយពីគម្រោងអភិវឌ្ឍន៍ខាងលើ ក្រុមហ៊ុនបានសិក្សារួចហើយ ក្នុងការបញ្ជូនផលិតកម្មញែកល្បាយប្រេង និងការដាក់ឲ្យដេញថ្លៃក្នុង ពេលឆាប់ៗផងដែរ » ។ លោកបញ្ជាក់ថា ទាក់ទិននឹងគម្រោងអភិវឌ្ឍន៍អណ្តូងប្រេងប្លុកAនេះ ក្រុមហ៊ុនតែងតែចូលរួមប្រជុំបច្ចេកទេសជាមួយក្រសួង និងការធ្វើប្រជាមតិជាមួយអ្នកនេសាទ នៅក្នុងទឹកដីខេត្តកោះកុង ព្រះសីហនុ និងខេត្តកំពត រួមជាមួយអាជ្ញារខេត្ត ស្រុក ដើម្បីធ្វើការពិគ្រោះបល់ ដើម្បីឈានដល់ដំណើរការខួងអណ្តូងប្រេងកាត នៅលើគម្រោងអភិវឌ្ឍន៍របស់ខ្លួននៅក្នុងពេលឆាប់ៗខាងមុខនេះ ។
គួររំឭកថា រដ្ឋាភិបាលកម្ពុជាបានចុះកិច្ចព្រមព្រៀងជាមួយក្រុមហ៊ុន KRISENERGY កាលពីចុងឆ្នាំ២០១៧កន្លងមក ដើម្បីអនុញ្ញាតឲ្យក្រុមហ៊ុននេះធ្វើសកម្មភាពរបស់ខ្លួនទាញយកប្រេងពីតំបន់ប្លុកA នៅក្នុងដែនទឹកកម្ពុជា ដែលស្ថិតនៅក្បែរដែនសមុទ្រអន្តរជាតិ ។
យោងតាមការព្យាករពីរាជរដ្ឋាភិបាលកន្លងមកបានរំពឹងថា កម្ពុជាអាចនឹងទទួលបានផលពីដំណក់ប្រេងរបស់ខ្លួនប្រមាណ៥០០លានដុល្លារក្នុង១ឆ្នាំ ៕
ចែករំលែកព័តមាននេះ