រាជធានីភ្នំពេញ ៖ បើតាមការអះអាងពីមន្ត្រីរាជរដ្ឋាភិបាលបានឲ្យដឹងនៅថ្ងៃខាងមុខនេះ កម្ពុជានឹងមានមន្ទីរពេទ្យទំនើបដែលជាកិច្ចសហប្រតិបត្តិការរវាងកម្ពុជានឹងមានមន្ទីរពេទ្យបរទេសទំនើបសម្រាប់ព្យាបាលជំងឺប្រជាពលរដ្ឋក្រីក្រឥតគិតថ្លៃ ។
មន្ទីពេទ្យនេះត្រូវបានរាជរដ្ឋាភិបាល និងក្រុមហ៊ុនឯកជនបរទេសសហការគ្នាក្នុងការជួយព្យា បាលដល់អ្នកក្រីក្រមិនយកថ្លៃប៉ុណ្ណោះទេ ប៉ុន្តែថែមទាំងជាមន្ទីរពេទ្យបែបទំនើប និងគ្រូពេទ្យជំនាញៗដែលនឹងធ្វើពលរដ្ឋកម្ពុជាដែលមានជីវភាពធូរធាមួយចំនួនមិនចាំបាច់ចេញទៅព្យាបាលនៅក្រៅប្រទេសទៀតឡើយ ។
នេះបើតាមលោក ស៊ាងប៊ុនលាង អនុរដ្ឋលេខាធិការក្រសួងមហាផ្ទៃ និងជាទីប្រឹក្សាផ្ទាល់របស់សម្តេចអគ្គមហាសេនាបតីតេជោ ហ៊ុន សែន ក្នុងពិធីចុះអនុស្សារណៈនៃការយោគយល់គ្នាស្តីពីការអភិវឌ្ឍសាខាសាកលវិទ្យាល័យ និងមន្ទីរពេទ្យវេជ្ជសាស្ត្រ CAITLAN RAU កាលពីល្ងាចថ្ងៃទី១២ ខែវិច្ឆិកា ឆ្នាំ២០១៨ កន្លងមក ។ លោកបានបញ្ជាក់ថា ក្រោមកិច្ចសហប្រតិបត្តិគម្រោងបង្កើតមន្ទីរពេទ្យវេជ្ជសាស្ត្រ CAITLAN RAU ដែលវិនិយោគដោយ UDECM Inc មកពីប្រទេសសហរដ្ឋអាមេរិកនឹងសាងសង់នៅកម្ពុជា ហើយនឹងធ្វើការព្យាបាលជូនពលរដ្ឋកម្ពុជាដោយឥតគិតថ្លៃ ។ ផ្តើមចេញពីសេវាមិនគិតថ្លៃនេះដែរនឹងជួយកាត់បន្ថយនូវភាពក្រីក្រដល់ពលរដ្ឋកម្ពុជា និងជាពិសេសវាក៏ជាផ្នែកមួយជួយឱ្យមានការងារធ្វើមួយចំនួនទៀតដល់ពលរដ្ឋកម្ពុជា ។
លោកទីប្រឹក្សាសម្តេចតេជោរូបនេះក៏បានឱ្យដឹងដែរថា ក្រៅពីធ្វើការព្យាបាលដល់ពលរដ្ឋកម្ពុ ជាឥតគិតថ្លៃមួយនេះ ក្រុមហ៊ុនក៏នឹងមានសាកលវិទ្យាល័យសម្រាប់ផ្តល់នូវការបណ្តុះបណ្តាលផ្នែកវេជ្ជសាស្ត្រដល់គ្រូពេទ្យសម្រាប់បង្កើនលើសមត្ថភាពបន្ថែមទៀតផង ។ ជាមួយគ្នានេះក៏នឹងបង្កើតបន្ថែមនូវមន្ទីរពេទ្យថ្នាក់អន្តរជាតិសម្រាប់ព្យាបាលជូនពលរដ្ឋកម្ពុជាក៏ដូចជា ជនជាតិបរទេសនាថ្ងៃខាងមុខថែមទៀត ។
ទន្ទឹមជាមួយគ្នានេះ លោកបណ្ឌិតបានលើកឡើងផងថា ក្រោមការដឹកនាំរបស់សម្តេចតេជោហ៊ុន សែន ប្រទេសជាតិកម្ពុជាមិនត្រឹមតែមានសុខសន្តិភាពទេ គេឃើញមានការរីកចម្រើនគ្រប់វិស័យក្នុងនោះវិស័យសុខាភិបាលត្រូវបានទទួលការរីកចម្រើនជាបន្តបន្ទាប់ និងពិសេសមិនថា ទីក្រុងភ្នំពេញទេ សូម្បីតែនៅតាមទីជនបទក៏ត្រូវបានទទួលអភវិឌ្ឍន៍ និងយកចិត្តទុកដាក់ផងដែរ ។
លោកអាប៊េតរ៉ាវ (Albert rau) តំណាង UDECM Inc មកប្រទេសសហរដ្ឋអាមេរិកបានឱ្យដឹងថា កិច្ចព្រមព្រៀងរវាងភាគីទាំងពីរ គឺព្រឹត្តិការណ៍ដ៏សំខាន់មួយនៅក្នុងកិច្ចសហការ និងភាពជាដៃគូ ដើម្បីបង្កើតបាននូវមណ្ឌលសុខភាព និងគោលនយោបាយថែទាំសុខភាពនៅកម្ពុជា ។ លោកបានបន្ថែម UDECM នេះបានធ្វើដំណើរយ៉ាងវែងឆ្ងាយនៅក្នុងបណ្តាសុខភាព ហើយពេលនេះ គឺជាពេលវេលាដ៏សំខាន់នៅក្នុងការវិនិយោគ និងកិច្ចខិតខំប្រឹងប្រែងក្នុងប្រព័ន្ធ ថែទាំសុខភាពដោយឥតគិតថ្លៃសម្រាប់ប្រជាជនកម្ពុជា ដើម្បីពង្រឹង និងលើកកម្ពស់សុខភាពសាធារណៈជាទូទៅជាមួយគោលនយោបាយថែទាំសុខភាពប្រកបដោយចិរភាព ។ លោកបានបញ្ជាក់ថា «យើង និងរាជរដ្ឋាភិបាលកម្ពុជាត្រូវបានផ្សារភ្ជាប់គ្នា និងបំពេញបន្ថែមគ្នានូវចក្ខុវិស័យរួមមួយសម្រាប់សុខភាពប្រកបដោយនិរន្តភាពសម្រាប់សុខុមាលភាពប្រជាជនកម្ពុជាទាំងមូល ។ យើងមានគោលដៅប្រកបដោយមហិច្ឆតាដែលតម្រូវឱ្យមានដៃគូគិតគូរនៅថ្នាក់ជាតិ និងថ្នាក់ក្រោមជាតិ» ។ លោកបានបន្ថែមថា សាកលវិទ្យាល័យ និងការបណ្តុះបណ្តាលវិជ្ជាជីវៈថែទាំសុខភាពនឹងរួមបញ្ចូលគ្នានូវការថែទាំសុខភាពគ្រប់ប្រភេទ ដោយផ្តល់ឱ្យពលរដ្ឋកម្ពុជានូវសេវាថែទាំសុខភាពកាន់តែទូលំទូលាយជាងមុនមិនធ្លាប់ដែលកាលពីមុន និងវាក៏ជាកម្រិតអន្តរជាតិដែរ ។ វាជាអាទិភាពរបស់យើងក្នុងការវិនិយោគលើប្រព័ន្ធថែទាំសុខភាពដោយឥតគិតថ្លៃសម្រាប់ប្រទេសកម្ពុជា ។
លោកបន្ថែមថា បញ្ហាប្រឈមសុខភាពសាធារណៈ នាពេលបច្ចុប្បន្ននេះមានភាព ស្មុគស្មាញ ហើយអាចសម្រេចបានដោយធ្វើការរួមគ្នានៅគ្រប់វិស័យទាំងអស់ ។ ពួកគេត្រូវការវិធីសាស្ត្រដ៏សមស្របមួយដែលឈានដល់ការឆ្លងកាត់ប្រព័ន្ធសុខភាព និងចូលទៅក្នុងវិស័យផ្សេងទៀត ដើម្បីកែលម្អសង្គមអប់រំការស្នាក់នៅ និងការដឹកជញ្ជូន ។ បញ្ហាប្រឈមទាំងនេះអំពាវនាវឲ្យមានវិធីថ្មីមួយក្នុងការវិនិយោគ និងការរួមគ្នា ដើម្បីលើកកម្ពស់ការថែទាំសុខភាពដូច្នេះទាំងអស់គ្នាត្រូវមានលទ្ធភាពទទួលបានជិវិតល្អ និងមានសុខភាពល្អ ៕
ចែករំលែកព័តមាននេះ