រាជធានីភ្នំពេញ ៖ ការសាងសង់ព្រលានយន្តហោះអន្តរជាតិខេត្តកោះកុងបានផ្អាកមួយរយៈហើយ ដោយសារការធ្លាក់ភ្លៀងខ្លាំងនារដូវវស្សាកន្លងមកនេះ ។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សិរីវុត្ថា បានថ្លែងឲ្យដឹងកាលពីព្រឹកថ្ងៃទី៩ វិច្ឆិកា ម្សិលមិញថា ការសាងសង់ព្រលានយន្តហោះនេះបានផ្អាកសកម្មភាពមួយរយៈហើយ ដោយពួកគេអះអាងថា ការធ្វើការដ្ឋានមានការលំបាក ព្រោះមានភ្លៀងធ្លាក់ខ្លាំងពេក។ លោកបន្តថា ក្រុមហ៊ុនសាងសង់ព្រលានយន្តហោះនេះ មិនបានជូនដំណឹងមកយើងពីពេលវេលា នឹងចាប់ផ្តើមសាងសង់ព្រលាននេះជាថ្មីទេ ។
លោកបញ្ជាក់ថា ៖« ព្រលានយន្តហោះនេះសាងសង់លឿនឬយឺតអាស្រ័យលើល្បឿន នៃការអភិវឌ្ឍន៍រមណីយដ្ឋាន និងមជ្ឈមណ្ឌលពាណិជ្ជកម្មរបស់ពួកគេនៅក្នុងស្រុកថ្មបាំង និងបុទុមសាគរ ក្នុងខេត្តកោះកុង »។ លោកបន្ថែមថា ៖« តាមព័ត៌មានដែលខ្ញុំទទួលបាន គឺក្រុមហ៊ុននេះសាងសង់សម្រាប់យន្តហោះក្នុងស្រុក ដើម្បីបង្កើនការលក់គម្រោងអចលនទ្រព្យរបស់ពួកគេប៉ុណ្ណោះ »។
ក្រុមហ៊ុន Tianjin Union Development Group (TUDG)បានទទួលដីសម្បទានពីរដ្ឋាភិបាលជាង៥ម៉ឺនហិកតា ដែលគ្របដណ្តប់ស្រុកពីររបស់ខេត្តកោះកុង និងជាអ្នកសាងសង់ព្រលានយន្តហោះអន្តរជាតិថ្មីនេះ។ ក្រុមហ៊ុននេះគ្រោងបោះទុនវិនិយោគប្រមាណ៥.០០០លានដុល្លារអាមេរិក ។
លោក ស៊ិន ចាន់សិរីវុត្ថា បានរំលឹកថា សកម្មភាពឈូសឆាយទីតាំងសាងសង់ព្រលានយន្តហោះអន្តរជាតិថ្មីនេះ បានចាប់ផ្តើមតាំងពីដើមឆ្នាំនេះ ប៉ុន្តែសកម្មភាពហាក់មានភាពយឺតៗ ដោយសាររដូវភ្លៀង ប៉ុន្តែនៅពេលបញ្ចប់រដូវភ្លៀងសកម្មភាពនៃការសាងសង់ នឹងត្រូវពន្លឿនហើយ ។
ទោះជាយ៉ាងណាតាមព័ត៌មានរបស់ក្រុមហ៊ុននេះ នាពេលកន្លងមកបានឲ្យដឹងថា រាជរដ្ឋាភិបាលកម្ពុជាបានអនុម័តនូវគម្រោងសាងសង់ព្រលានយន្តហោះអន្តរជាតិថ្មី ដែលវិនិយោគដោយក្រុមហ៊ុនTianjin Union Development Group ជាក្រុមហ៊ុនដែលបាននិងកំពុងវិនិយោគលើរមណីយដ្ឋានទេសចរណ៍លំដាប់អន្តរជាតិនៅខេត្តកោះកុង ។
តំណាងក្រុមហ៊ុនលោកស្រី ប៊ែលឡា ហ្សាងធ្លាប់បានលើកឡើងថា ការធ្វើផែមការសាងសង់ព្រលានយន្តហោះលំដាប់អន្តរជាតិនេះ បានបញ្ចប់ហើយ និងកំពុងត្រៀមរៀបចំផែនការដើម្បីធ្វើការសាងសង់ ។ ព្រលានយន្តហោះនេះ អាចទទួលអ្នកដំណើរបាន១០លាននាក់ក្នុង១ឆ្នាំ និងអាចចុះចតយន្តហោះខ្នាតធំBoing៣៨០ ហើយក្រុមហ៊ុនបានធ្វើការសិក្សាពីភូមិសាស្ត្រ និងកំណត់ទីតាំងសម្រាប់ព្រលានយន្តហោះនេះរួចហើយ ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា ការមានព្រលានយន្តហោះថ្មីមួយទៀត នឹងហុចសក្តានុពលសម្រាប់វិស័យអាកាសចរណ៍នៅកម្ពុជា ជាពិសេសផ្តល់ឲ្យមានជម្រើសកាន់តែច្រើនថែមទៀត សម្រាប់ក្រុមហ៊ុនអាកាសចរណ៍នានា ដែលអាចហោះហើរត្រង់មកកម្ពុជា ហើយប្រសិនជាព្រលានថ្មីនេះមានស្តង់ដាអន្តរជាតិ វានឹងអាចទាក់ទាញក្រុមហ៊ុនអាកាសចរណ៍មកពីប្រទេសថៃ និងខេត្តរបស់ថៃដែលជាប់នឹងកម្ពុជា អាចភ្ជាប់បណ្តាញហោះហើរទៅវិញទៅមក ។
លោកបន្តថា ៖« ខ្ញុំស្វាគមន៍គំរោងវិនិយោគដ៏ល្អនេះ ដែលវានឹងជួយជំរុញកំណើនសេដ្ឋកិច្ច និងទាក់ទាញទេសចរមកទស្សនាកម្ពុជា កាន់តែច្រើនថែមទៀត »។
ការវិនិយោគនេះជាផ្នែកមួយនៃវិថីសូត្រ ខ្សែក្រវាត់មួយ ផ្លូវមួយ របស់ប្រទេសចិន មកកម្ពុជា ដែលរដ្ឋាភិបាលប្រទេសទាំងពីរ បានគាំទ្រគ្នាទៅវិញទៅមក ហើយកម្ពុជារំពឹងថា នឹងទទួលបានភ្ញៀវទេសចរចិន២លាននាក់នៅឆ្នាំ២០២០ខាងមុខនេះ ៕
ចែករំលែកព័តមាននេះ