ជំងឺរលាកសាច់បំពង់ក គឺជាការរលាកក្រពេញអាមីដាល (ដុំសាច់មួយគូនៅខាងក្នុងក្រោយបំពង់កផ្នែកខាងលើ) ។ មុខងារចម្បងនៃក្រពេញអាមីដាល គឺចាប់ ឬបញ្ឈប់បាក់តេរី ឬវីរុសដែលចូលក្នុងបំពង់ក ។
អ្នកដែលមានជំងឺរលាកសាច់បំពង់កនឹងជួបប្រទះនូវអាការមិនស្រួលមួយចំនួនដូចជា រមាស់ឈឺក្នុងបំពង់ក, ក្ដៅខ្លួន, ក្លិនមាត់មិនល្អ, ពិបាកទទួលទានអាហារភេសជ្ជៈ និងនិយាយ ។ ជួនកាលក៏មានការឈឺចាប់ក្នុងត្រចៀកទាំងសងខាង និងរាងកាយទាំងមូលផងដែរ ។ ទោះជាយ៉ាងណា ការទទួលទានអាហារ និងភេសជ្ជៈមួយចំនួនខាងក្រោមនេះនៅពេលកើតជំងឺរលាកសាច់បំពង់ក គឺប្រសើរបំផុត ក៏ព្រោះវាអាចសម្រាលស្ថានភាពនៃជំងឺ ហើយថែមទាំងជួយឲ្យឆាប់ជាសះស្បើយបានផងដែរ ។
១.ការ៉េម ៖ កុំបារម្ភ! អ្នកអាចទទួលទានការ៉េមរសជាតិណាមួយក៏បានដែលអ្នកចូលចិត្ត បើទោះជាអ្នកកំពុងកើតជំងឺរលាកសាច់បំពង់កក៏ដោយ ។ ភាពត្រជាក់នឹងជួយបន្ថយការឈឺចាប់ ព្រមទាំងការរលាកដែលទាក់ទងជាមួយស្ថានភាពនៃជំងឺ ។ គ្រាន់តែប្រាកដថាមិនញ៉ាំច្រើន ហើយទទួលទានទឹកមួយកែវ បន្ទាប់ពីការ៉េម ដើម្បីសម្អាតជាតិស្ករ ឬជាតិផ្អែមដែលជាប់នឹងបំពង់ក ។
២.យ៉ាអួកក ៖ អាហារត្រជាក់មួយមុខទៀតដែលអ្នកអាចទទួលទាននៅពេលកើតជំងឺរលាកសាច់បំពងក គឺយ៉ាអួ ឬទឹកដោះគោជូរកក ។ យ៉ាអួជួយផ្ដល់នូវបាក់តេរី ល្អៗដល់រាងកាយដែលជួយពង្រឹងប្រព័ន្ធភាពស៊ាំរបស់អ្នក ។
៣.ទឹកក្រូចឆ្មារ ៖ ទឹកក្រូចឆ្មារ គឺជាភេសជ្ជៈដែលជួយពង្រឹងដល់ប្រព័ន្ធភាពស៊ាំ ។ អ្នកអាចបន្ថែមទឹកកកចូលដើម្បីសម្រួលដល់បំពង់ក ខណៈដែលរាងកាយទទួលបាននូវវីតាមីន គ្រប់គ្រាន់ ធ្វើឲ្យប្រព័ន្ធភាពស៊ាំកាន់តែប្រសើរឡើង ។ ដើម្បីទទួលបានលទ្ធផលកាន់តែប្រសើរ ចូរបន្ថែមទឹកឃ្មុំបន្តិចចូលក្នុងទឹកក្រូចឆ្មារ។
៤.តែខ្ញី ៖ មិនចូលចិត្តទទួលទានរបស់ត្រជាក់មែនទេ ចូរទទួលទានតែខ្ញី ក្ដៅៗមួយពែង នៅពេលអ្នកជួបប្រទះនូវអាការរំខាននៃជំងឺរលាកសាច់បំពង់ក ។ ខ្ញីមានលក្ខណសម្បត្តិប្រឆាំងការរលាក និងបាក់តេរី ដូច្នេះការទទួលទានតែខ្ញី គឺជួយឲ្យអ្នកឆាប់ជាសះស្បើយ ។ កុំភ្លេចបន្ថែមទឹកឃ្មុំចូលបន្តិចផង ដើម្បីទទួលបានលទ្ធផលកាន់តែប្រសើរ ។
៥.ស៊ុតក្រឡុកចៀន ៖ នៅពេលកើតជំងឺរលាកសាច់បំពង់ក គឺអ្នកនឹងពិបាកក្នុងការទទួលទានអាហារ រឹងៗ។ ការទទួលទានស៊ុតក្រឡុកចៀន គឺពិតជាមានប្រយោជន៍ ក៏ព្រោះវាទន់ងាយលេបចូល ហើយមានផ្ទុកសម្បូរទៅដោយសារធាតុចិញ្ចឹមផងដែរ (ប្រភពពី៖ Health.com.kh) ៕
ចែករំលែកព័តមាននេះ