ADផ្ទាំងផ្សព្វផ្សាយពាណិជ្ជកម្ម

កម្ពុជាអាចចាប់យកកាលានុវត្តភាពចេញពីបដិវត្តន៍ឧស្សាហកម្មទី4

7 ឆ្នាំ មុន

ភ្នំពេញ
០៧ ខែ វិច្ឆិកា ឆ្នាំ ២០១៨ ម៉ោង ១៦:៤១

រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានអះអាងថា កម្ពុជាអាចចាប់យកកាលានុវត្តភាពដែលកើតចេញពីបដិវត្តន៍ឧស្សាហកម្មទី៤ ស្របពេលដែលធនាគារអភិវឌ្ឍន៍អាស៊ី បានសិក្សារកឃើញថា បដិវត្តន៍នេះ នឹងបង្កើតតម្លៃសេដ្ឋកិច្ចដ៏ច្រើនសម្រាប់តំបន់អាស៊ាន ។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានថ្លែងក្នុងពិធីបើកសិក្ខាសាលាកម្រិតខ្ពស់ ដែលសហការរៀបចំដោយធនាគារអភិវឌ្ឍន៍អាស៊ី(ADB) ក្រោមប្រធានបទ « តើបដិវត្តន៍ឧស្សាហកម្មទី៤ និងកិច្ចសហប្រតិបត្តិការក្នុងតំបន់ អាចជំរុញការផ្លាស់ប្តូរចនាសម្ព័ន្ធសេដ្ឋកិច្ចរបស់កម្ពុជា ដោយរបៀបណា ?» កាលពីចុងសប្តាហ៍មុនថា កម្ពុជាអាចចាប់យកកាលានុវត្តភាពទាំងឡាយ ដែលកើតចេញពីបដិវត្តឧស្សាហកម្មទី៤នេះ ។ លោកបន្តថា ៖« កម្ពុជាមានលក្ខណសម្បត្តិជាច្រើនដូចជា ភាគលាភប្រជាសាស្ត្រ គឺកម្ពុជាកាន់តែសម្បូរនូវធនធានយុវជនប្រកបដោយចំណេះដឹង ហើយអាចស្រូបយកនូវបច្ចេកវិទ្យាឌីជីថលបានលឿន និងកំណើនយ៉ាងលឿននូវការប្រើប្រាស់ទូរស័ព្ទចល័ត និងទូរស័ព្ទ រួមជាមួយនឹងអត្រាប្រើប្រាស់ខ្ពស់ ការស្រូបយកបច្ចេកវិទ្យា ពីការវិនិយោគផ្ទាល់ពីបរទេស និងការធ្វើឌីជីថលភាវូបនីយកម្ម យ៉ាងឆាប់រហ័យដែលកំពុងកើតឡើងនៅក្នុងគ្រប់វិស័យដែលសំខាន់ៗផងដែរ »។
យោងតាមកាសិក្សារបស់ADBបានបង្ហាញថា នៅមុនឆ្នាំ២០៣០ បច្ចេកវិទ្យាថ្មីៗនៃបដិវត្តន៍ឧស្សាហកម្ម អាចបង្កើតតម្លៃសេដ្ឋកិច្ច ដែលមានទំហំពី២២០ទៅ៦២៥ពាន់លានដុល្លារ ចូលទៅក្នុងសេដ្ឋកិច្ចនៃតំបន់ASEANផងដែរ ។

លោក វង្សី វិស្សុត បានបន្តថា តាមរយៈបដិវត្តន៍ឧស្សាហកម្មទី៤នេះ អាស៊ានមានសក្តានុពលធំធេងក្នុងការជំរុញសក្តានុពលកំណើនសេដ្ឋកិច្ច និងរក្សានូវកំណើនសេដ្ឋកិច្ចខ្ពស់ និងរឹងមាំសម្រាប់តំបន់របស់យើង តាមរយៈកិច្ចសហប្រតិបត្តិការកាន់តែជិតស្និទ្ធ ក្នុងបរិបទនៃការកើនឡើងភាពតានតឹងផ្នែកពាណិជ្ជកម្ម និងការផ្លាស់ប្តូរយ៉ាងលឿននៃការអភិវឌ្ឍបច្ចេកវិទ្យា ។ លោកបន្តថា បច្ចុប្បន្នពិភពលោក កំពុងឈានចូលទៅកាន់យុគសម័យនៃបដិវត្តន៍ថ្មីមួយ ឬបដិវត្តន៍ឧស្សាហកម្មទី៤ ដែលកំពុងជះឥទ្ធិពលើដំណើការរបស់រដ្ឋាភិបាល, ដំណើការរបស់អាជីវកម្ម និងការរស់នៅរបស់មនុស្សជាតិ ។ ការវិវត្តយ៉ាងលឿនផ្នែកបច្ចេកវិទ្យា បាននិងកំពុងផ្លាស់ប្តូររចនាសម្ព័ន្ធសង្គម សេដ្ឋកិច្ច ហិរញ្ញវត្ថុ និងសន្តិសុខ ដោយរាប់ចាប់តាំងពីការបើកបរដោយស្វ័យប្រវត្តិ, ដ្រូន (Drone), ពាណិជ្ជកម្មអេឡិកត្រូនិក (e-commerce), បច្ចេកវិទ្យាហិរញ្ញវត្ថុ (FinTech), រហូតដល់ការបោះពុម្ព 3D (3D Printing), និងបញ្ញានិមិត្ត (Artificial Intelligence) ជាដើម ។

លោករដ្ឋលេខាធិការបានបន្តថា បដិវត្តន៍ ឧស្សាហកម្មទី៤ នឹងធ្វើការផ្លាស់ប្តូរចនាសម្ព័ន្ធសេដ្ឋកិច្ច ពាណិជ្ជកម្ម និងឧស្សាហកម្ម តាមរយៈការកាត់បន្ថយថ្លៃដើម បង្កើនផលិតភាព និងពង្រីកវិមាត្រសេដ្ឋកិច្ចកាន់តែធំ តាមរយៈប្រព័ន្ធឌីជីថល ដូចជា ការទូទាត់ និងពាណិជ្ជកម្មតាមប្រព័ន្ធអេឡិកត្រូនិក។ ក្នុងន័យនេះ ASEAN អាចក្លាយជាទីតាំងជួរមុខនៃការផ្លាស់ប្តូរ តាមរយៈការនាំមុខមុនគេ នៃការទទួលយកបច្ចេកវិទ្យាដែលថ្មីបំផុត ៕