រាជធានីភ្នំពេញ ៖ ប៉ោ ភារិទ្ធ(យ៉េន ឌីណា) មកពីសមាគមកីឡាប្រដាល់ក្រសួងកសិកម្ម អាចប្រឈមនឹងការដាក់ពិន័យពីសហព័ន្ធកីឡាប្រដាល់គុនខ្មែរ រយៈពេល៦សប្ដាហ៍ បន្ទាប់ពីគេសង្ស័យថា កីឡាកររូបនេះមានចេតនាចង់លក់ការប្រកួតក្នុងជំនួបមិត្តភាពអន្តរជាតិជាមួយកីឡាករថៃឈ្មោះKolapdamនៅលើសង្វៀនទូរទស្សន៍ស៊ីអិនស៊ីកាលពីថ្ងៃអាទិត្យ…
រាជធានីភ្នំពេញ ៖ ប៉ោ ភារិទ្ធ(យ៉េន ឌីណា) មកពីសមាគមកីឡាប្រដាល់ក្រសួងកសិកម្ម អាចប្រឈមនឹងការដាក់ពិន័យពីសហព័ន្ធកីឡាប្រដាល់គុនខ្មែរ រយៈពេល៦សប្ដាហ៍ បន្ទាប់ពីគេសង្ស័យថា កីឡាកររូបនេះមានចេតនាចង់លក់ការប្រកួតក្នុងជំនួបមិត្តភាពអន្តរជាតិជាមួយកីឡាករថៃឈ្មោះKolapdamនៅលើសង្វៀនទូរទស្សន៍ស៊ីអិនស៊ីកាលពីថ្ងៃអាទិត្យ ទី៤ វិច្ឆិកា កន្លងមកនេះ។
ប៉ោ ភារិទ្ធ ត្រូវបានលោកអាជ្ញាកណ្ដាល លោក អុិន ខេមរិន្ទ ព្រមានម្ដងនៅក្នុងទឹកទី២ដោយសារតែមើលឃើញថា ការប្រកួតរបស់គេប្រៀបដូចប្រឡែងគ្នាលេង ។ លុះចូលទឹកទី៣ គេនៅតែបន្តធ្វើបែបនេះទៀត ទើបលោកអាជ្ញាកណ្ដាលសម្រេចបញ្ឈប់ការប្រកួតដោយមិនប្រកាសលទ្ធផល។
លោក មាស សុគ្រី ប្រធានគណៈកម្មការវិនិច្ឆ័យបានឱ្យដឹងថា តាមច្បាប់របស់សហព័ន្ធកីឡាប្រដាល់គុនខ្មែរ កាលណាមានកីឡាករណាម្នាក់ធ្វើខុសនឹងច្បាប់ប្រកួតដូចជាប្រកួតមិនអស់ពីសមត្ថភាពរហូតដល់ថ្នាក់ត្រូវអាជ្ញាកណ្ដាលដេញចុះពីលើសង្វៀនបែបនេះ លើកទី១ត្រូវជាប់ពិន័យលែងឱ្យឡើងសង្វៀនប្រកួតរយៈពេល៦សប្ដាហ៍ស្មើនឹង១ខែកន្លះ ។ បើមានជាលើកទី២ត្រូវជាប់ពិន័យរយៈ៣ខែ និងលើកទី៣លែងឱ្យឡើងសង្វៀនប្រកួតតែម្ដង។
ដូច្នេះ ប៉ោ ភារិទ្ធ ដែលទើបតែមានកំហុសជាលើកទី១អាចនឹងប្រឈមការពិន័យរយៈពេល១ខែកន្លះ ។ ចំពោះប្រាក់តម្លៃខ្លួនវិញនោះនៅមិនទាន់ដឹងថាយ៉ាងណានោះទេ វាអាស្រ័យទៅលើ ការពិចារណារបស់សហព័ន្ធតែប៉ុណ្ណោះ ថាតើគេពិតជាមានចេតនាឬអចេតនា។
លោក ម៉ា ស៊ីថេត ប្រធានគ្រប់គ្រងកម្មវិធីប្រកួតកីឡាប្រដាល់ប្រចាំស្ថានីយទូរទស្សន៍ស៊ីធីអិន បានឱ្យដឹងថា ប៉ោ ភារិទ្ធ ពិតជាត្រូវបានអាជ្ញាកណ្ដាលបណ្ដេញចុះពីលើសង្វៀនមែន ដោយត្រូវបានគេចោទប្រកាន់ថា ប្រកួតមិនអស់ពីសមត្ថភាព ។ ថ្វីដ្បិតតែលោកជាអ្នករ៉ាប់រងក្នុងការបើកប្រាក់រង្វាន់មែន តែលោកនៅរង់ចាំមើលរបាយការណ៍របស់សហព័ន្ធកីឡាប្រដាល់គុនខ្មែរសិន ថាតើគេពិតជាមានកំហុសធ្ងន់ធ្ងរបែបនេះមែនឬអត់ ទោះបីយ៉ាងណាលោកមិនដាច់មនោសញ្ចេតនាពេកនោះទេ ។ លោកក៏មានការសោកស្ដាយផងដែរ ចំពោះប៉ោ ភារិទ្ធ ដែលធ្វើបែបនេះបណ្ដាលឱ្យប៉ះពាល់អារម្មណ៍ម្ចាស់ឧបត្ថម្ភកម្មវិធី។
ដោយឡែកចំពោះលទ្ធផលនៃការប្រកួតគូផ្សេងទៀតនៅក្នុងថ្ងៃនោះដែរ កីឡាករ ហ៊ឹម
សេរី មកពីក្លិបតាព្រហ្មមានជ័យ បានផ្ដួលកីឡាករអ៊ីរ៉ង់ Morteza Sardarian ឱ្យសន្លប់នៅត្រឹមទឹកទី៤ និងកីឡាករ ទេស ជីវ៉ា មកពីក្លិបកងពលតូចលេខ៧០ បានយកឈ្នះកីឡាករថៃOrono Sor Ratana Rongrot ដោយពិន្ទុ៕
ចែករំលែកព័តមាននេះ