លោក Tommy Kim ប្រកាសបើកកម្មវិធី Kickboxing ថ្មី«ដួលកន្លែងណា ងើបកន្លែងហ្នឹង»ដើម្បីបង្កើនសមត្ថភាពកីឡាករយើង
- ភ្នំពេញ
រាជធានីភ្នំពេញ ៖ ទោះបីលទ្ធផលរួម កម្ពុជាឈ្នះ១ និងជប៉ុនឈ្នះ២ ក្នុងការប្រកួតប្រដាល់លក្ខណៈ Kickboxing ក្នុងព្រឹត្តិការណ៍ KNOCK OUT 68 នៅប្រទេសជប៉ុន កាលពីថ្ងៃទី៥ ខែកញ្ញា ឆ្នាំ២០២៦ យ៉ាងណាក៏ដោយក៏លោក គីម ស្រ៊ុនកុសល (Tommy Kim) អគ្គលេខាធិការសហព័ន្ធកីឡាឃីកបុកស៊ីងកម្ពុជា និងជាប្រម៉ូទ័រកីឡាប្រដាល់ដ៏ល្បីមួយរូបរបស់កម្ពុជាបានថ្លែងថា ការចូលរួមប្រកួតរបស់កីឡាករប្រដាល់កម្ពុជាបានឆ្លុះបញ្ចាំងពីស្មារតីកីឡាដ៏រឹងមាំបន្ទាប់ពីការប្រកួត។
លោក Tommy Kim បន្តថា នេះជាបទពិសោធន៍ និងជាមេរៀនដ៏មានតម្លៃបំផុតសម្រាប់កីឡាករយើងក្នុងការឈានជើងចូលក្នុងសង្វៀនកម្រិតអន្តរជាតិដែលមានច្បាប់វាយខុសពីគុនខ្មែរ ។ ជាមួយគ្នានេះ លោកបានប្រកាសពីការបង្កើតកម្មវិធី Kickboxing ថ្មីផងដែរ។
ចំពោះគោលបំណងនៃការបង្កើតកម្មវិធីប្រដាល់ Kickboxingថ្មី ដែលឈរលើស្មារតី «ដួលកន្លែងណា ងើបកន្លែងហ្នឹង»របស់លោក Tommy Kim ត្រូវបានគេអះអាងថា គឺចង់ពង្រឹងសមត្ថភាពបន្ថែមលើចំណុចខ្វះខាតរបស់កីឡាករយើងដូចជាពង្រឹងច្ចេកទេស និងយុទ្ធសាស្ត្រដោយបង្កើនការយល់ដឹងឱ្យកាន់តែច្បាស់ពីច្បាប់ និងទម្រង់ប្រកួតបែប Kickboxing ដែលមិនមានការប្រើកែង ឬចាប់បោកដូចគុនខ្មែរ ។
បង្កើតភាពស៊ាំនឹងសង្វៀនមួយនេះតាមរយៈការបង្កើតកម្មវិធីប្រកួតក្នុងស្រុកឱ្យបានច្រើន ដើម្បីឱ្យកីឡាករកម្ពុជាយើងមានឱកាសប្រកួត និងអភិវឌ្ឍសមត្ថភាពជាប្រចាំត្រៀមដណ្ដើមជ័យជម្នះលើឆាកអន្តរជាតិនាពេលខាងមុខ ។ បើកផ្លូវទៅកាន់ពិភពលោកតាមរយៈការសហការជាមួយស្ថាប័នអន្តរជាតិធំៗ ដូចជា WKN (World Kickboxing Network) និង IKC (International Kickboxing Council) ។ ការពង្រឹងសមត្ថភាពផ្នែក Kickboxing នឹងជួយជំរុញឱ្យកីឡាករកម្ពុជាកាន់តែមានឱកាសចេញទៅប្រកួតដណ្តើមខ្សែក្រវាត់លំដាប់ពិភពលោក។
គួរឱ្យដឹងផងដែរថា ការប្រកួតប្រដាល់លក្ខណៈ Kickboxing ក្នុងព្រឹត្តិការណ៍ KNOCK OUT 68ដែលរៀបចំឡើងនៅប្រទេសជប៉ុន កាលពីថ្ងៃទី៥ ខែកញ្ញា ឆ្នាំ២០២៦ កម្ពុជាបានបញ្ជូនកីឡាករជើងខ្លាំង៣រូបឱ្យទៅចូលរួមប្រកួតជាមួយកីឡាករជើងខ្លាំងជប៉ុន ។
ជាលទ្ធផល កីឡាករកម្ពុជាឈ្នះ១ និងចាញ់២ក្នុងនោះកីឡាករអេ អាំម៉ារីនភូថង ផ្ដួលកីឡាករជប៉ុន Terashima Hikaru ក្នុងទឹកទី២។
ចំណែកកីឡាករ ម៉ឺន មេឃា ចាញ់សន្លប់ក្រោមកណ្ដាប់ដៃកីឡាករជប៉ុន Rikito ក្នុងទឹកទី២វិញដែរ ខណៈកីឡាករគោរមៈ ច័ន្ទរាជ្យ ចាញ់ពិន្ទុកីឡាករជប៉ុន Leona Petta ៕
ចែករំលែកព័តមាននេះ