ខេត្តកំពង់ចាម ៖ ក្នុងចំណោម១០ស្រុក-ក្រុងរបស់ខេត្តកំពង់ចាម មានភ្នំគួរឱ្យកត់សម្គាល់មានតែ៥ស្រុកប៉ុណ្ណោះ ។ ស្រុកទាំង៥ដែលមានភ្នំគឺ១-ស្រុកបាធាយ ២-ស្រុកជើងព្រៃ ៣-ស្រុកកំពង់សៀម ៤-ស្រុកចំការលើ និងស្រុកស្ទឹងត្រង់ ហើយនៅលើភ្នំខ្លះមានប្រាសាទបុរាណ ទាក់ទាញភ្ញៀវជាតិនិងអន្តរជាតិមកកកម្សាន្តលេងឬវត្តអារាមសម្រាប់ពុទ្ធសាសនិកគោរពប្រណិបត្រ បួងសួងសុំសេចក្តីសុខសាន្តផងដែរ ។
លោក ចក់ សុខគង់ ប្រធានការិយាល័យវប្បធម៌ស្រុកបាធាយ ប្រាប់ឲ្យដឹងនៅព្រឹកថ្ងៃទី៧ កញ្ញា២០១៨ថា នៅក្នុងស្រុកបាធាយទាំងមូលមានភ្នំជាច្រើនរួមមាន
១-ភ្នំធំ ស្ថិតនៅឃុំជាលា ក្នុងតែធ្វើអាជីវកម្ម ។ ២-ភ្នំជាលា ក្នុងមានវត្តនៅលើកំពូលភ្នំ ។៣-ភ្នំបែកពាង មានអមដោយភ្នំតូចៗជាច្រើនទៀតមានផ្ទះនៅជើងភ្នំ ។ ៤-ភ្នំតាំងស្រែ មានវត្តនៅលើកំពូលភ្នំ ក្នុងឃុំតាំងក្រាំង ហើយមួយផ្នែកនៃភ្នំបានធ្វើអាជីវកម្មយកថ្ម ។
៥-ភ្នំជើងឆ្នុក មានវត្តនៅលើកំពូលភ្នំ ៦-ភ្នំដិល ។ មានវត្តនៅលើភ្នំស្ថិតក្នុងឃុំតាំងក្រាំង។ ៧-ភ្នំបាធាយ មានវត្តនៅជើងភ្នំ ក្នុងឃុំបាធាយ ។ ៨-ភ្នំទ្រព្យមានប្រាសាទបុរាណ ដែលនៅជើងភ្នំមិនត្រូវបានអនុញ្ញាតឲ្យធ្វើអាជីវកម្មនោះទេ ។
លោកអូត ឈាងលី អភិបាលស្រុកជើងព្រៃប្រាប់ថា នៅក្នុងស្រុកជើងព្រៃមានភ្នំតែមួយទេឈ្មោះភ្នំជើងព្រៃ ស្ថិតិនៅឃុំគោករវៀង ស្រុកជើងព្រៃ ដោយមានប្រាសាទនៅលើភ្នំ។ ទាំងរដូវប្រាំងនិងវស្សាមានពលរដ្ឋជិតឆ្ងាយបាននាំគ្នាមកលេងជាហូរហែ ។ នៅជុំវិញភ្នំក្នុងរង្វង់៣០០ម៉ែត្រត្រូវបានការពារជាសម្បត្តិរបស់រដ្ឋ ដោយមិនបានចេញប្លង់ឲ្យពលរដ្ឋណាម្នាក់ជាកម្មសិទ្ធិទេ ។
លោក លឿង រ៉ាម៉ូ អភិបាលរងស្រុកចំការលើ ឲ្យដឹងថា ក្នុងស្រុកចំការលើមានភ្នំចំនួន៤ក្នុងនោះមាន ១-ភ្នំទែត ២-ភ្នំអណ្តូងប្រេង ៣-ភ្នំកៃកើត ក្នុងឃុំបុសខ្នុរ ។ ៤-ឈ្មោះ-ភ្នំពេញថ្មីនៅលើភ្នំនេះមានវត្តស្ថិតក្នុងឃុំចំការអណ្តូង ។ លោក ជួន សុផាត ប្រធានមន្ទីរវប្បធម៌និងវិចិត្រសិល្បៈខេត្តឲ្យដឹងថា នៅស្រុកកំពង់សៀមមាន ៖
១-ភ្នំប្រុស-ភ្នំស្រី ដែលនៅលើភ្នំប្រុសមានវត្តដោយមានព្រះសង្ឃគង់នៅជាច្រើនអង្គ ហើយក៏ជាទីកន្លែងទេសចរណ៍ដោយបានស្រូបយកភ្ញៀវជាតិនិងអន្តរជាតិមកកម្សាន្តជា ហូរហែ ។ ក្រៅពីនេះក៏មានភ្នំតូចៗជាច្រើនទៀតនៅជាប់នឹងភ្នំស្រីផងដែរ ។
២-ភ្នំហាន់ជ័យ ស្ថិតនៅក្នុងឃុំហាន់ជ័យ មានប្រាសាទបុរាណនៅលើនោះនិងមានវត្តថែមទៀត ហើយនៅចង្កេះភ្នំក៏មានប្រសាទបុរាណ១ ។ ទីនេះជាកន្លែងតំបន់ទេសចរណ៍ ដោយមានភាពទាក់ទាញភ្ញៀវជាតិនិងអន្តរជាតិមកលេងរាល់ថ្ងៃ ។
លោក អ៊ូ វេង ប្រធានការិយាល័យវប្បធម៌ស្រុកស្ទឹងត្រង់បានប្រាប់ថា នៅក្នុងស្រុករបស់លោកមានភ្នំចំនួន៣គឺ៖
១-ភ្នំបឹងដែង មានប្រសាទព្រះមហោសថសុវណ្ណគិរីបឹងដែង ។ ២-ភ្នំបឹងកេត នៅនឹងចង្កេះភ្នំមានប្រាសាទព្រះអង្គគុហ៍ នៅទីនេះឲ្យតែដល់រដូវបុណ្យទានម្តងៗ មានមនុស្សមកលេងច្រើនកុះករ ។៣-ភ្នំចារនៅលើភ្នំមានវត្តបុរាណ ដែលបានជួសជុលដោយមានព្រះសង្ឃគង់នៅ ក្នុងឃុំអារក្សត្នោតហើយត្រូវបានពលរដ្ឋតែងតែនាំគ្នាគោរពប្រណិបត្រផងដែរ ៕
ចែករំលែកព័តមាននេះ