រាជធានីភ្នំពេញ៖ ជនសង្ស័យ២នាក់ដែលតែងតែធ្វើសកម្មភាពជួញដូរគ្រឿងញៀនយ៉ាងសកម្មនៅប្លុកផ្ទះជួលក្នុងភូមិជង្រុកនោះត្រូវបានវែកមុខហើយ ដោយត្រូវបានកម្លាំងនគរបាលផ្នែកប្រឆាំងគ្រឿងញៀន និងកម្លាំងនគរបាលផ្នែកអន្តរាគមន៍ខណ្ឌពោធិ៍សែនជ័យបើកប្រតិបត្តិការស្រាវជ្រាវរហូតកំណត់បានមុខសញ្ញារួចក៏ចុះធ្វើការចាប់ខ្លួនបានទាំង២នាក់តែម្ដង។
ការចាប់ខ្លួននោះបានធ្វើឡើងកាលពីវេលាម៉ោង១និង២០នាទីរសៀលថ្ងៃទី៣ ខែវិច្ឆិកា ឆ្នាំ២០១៨ នៅចំណុចផ្ទះគ្មានលេខ ផ្លូវលំ ភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ក្នុងការចុះបង្ក្រាបនោះ កម្លាំងនគរបាលបានរកឃើញថ្នាំញៀនចំនួន២៤កញ្ចប់ ក្នុងនោះកញ្ចប់ធំចំនួន២កញ្ចប់ ,កញ្ចប់ធំល្មមចំនួន៣កញ្ចប់ និងកញ្ចប់តូចចំនួន១៩កញ្ចប់ ,ជញ្ជីងសម្រាប់ថ្លឹងថ្នាំញៀន១គ្រឿង ,ដែកចំពុះទង់១ ,កាំបិតផ្គាក់១ ព្រមទាំងឧបករណ៍សម្រាប់កាច់សោរកម៉ូតូ១កំប្លេរផងដែរ។
នគរបាលបានឱ្យដឹងថា ជនសង្ស័យដែលត្រូវសមត្ថកិច្ចចាប់ខ្លួនទាំង២នាក់ខាងលើ ម្នាក់ឈ្មោះ រស់ រិទ្ធី ភេទប្រុស អាយុ២៨ឆ្នាំ ជាអ្នកជួញដូរគ្រឿងញៀន និងម្នាក់ទៀតឈ្មោះ អួន សិទ្ធី ភេទប្រុស អាយុ៣៩ឆ្នាំ ជាអ្នកជួញដូរគ្រឿងញៀនជាមួយគ្នា ហើយជនសង្ស័យទាំង២នាក់ នេះស្នាក់នៅក្នុងភូមិខាងលើជាមួយគ្នា។
នៅមុនពេលឈានដល់ការចាប់ខ្លួនជនសង្ស័យទាំង២នាក់ខាងលើ កម្លាំងនគរបាលទាំង២ផ្នែកបានបើកធ្វើការស្រាវជ្រាវ ដើម្បីរកមុខសញ្ញាដែលប្រព្រឹត្តបទល្មើសនៅក្នុងមូលដ្ឋាន។
បន្ទាប់មកបានទទួលព័ត៌មានពីប្រជាពលរដ្ឋថាបានដឹង និងស្គាល់ជនសង្ស័យទាំង២នាក់នោះគឺជាមុខសញ្ញាជួញដូរគ្រឿងញៀនយ៉ាងសកម្ម។
ប្រភពដដែលបានបន្តថា ក្រោយពីកំណត់បានមុខសញ្ញាខាងលើនេះរួចហើយ កម្លាំងសមត្ថកិច្ចក៏បានចុះទៅធ្វើការឃាត់ខ្លួន ព្រមទាំងរឹបអូសយកវត្ថុតាងពាក់ព័ន្ធទាំងអស់នោះ។
បន្ទាប់មកបានជនសង្ស័យទាំង២នាក់ខាងលើត្រូវបានសមត្ថកិច្ចនាំទៅធ្វើការសាកសួរនិងកសាងសំណុំរឿងរង់ចាំបញ្ជូនទៅកាន់សាលាដំបូងរាជធានីភ្នំពេញដើម្បីចាត់ការតាមច្បាប់៕
ចែករំលែកព័តមាននេះ