រាជធានីភ្នំពេញ ៖ ការធ្វើកសិកម្មតាមកិច្ចសន្យា ជាយុទ្ធសាស្ត្រថ្មីរបស់រាជរដ្ឋាភិបាលកម្ពុជា ក្នុងរក្សាតម្លៃផលិតផលកសិកម្មរបស់កសិករ និងដើម្បីលើកស្ទួយវិស័យកសិកម្មដែលជាវិស័យសំខាន់មួយក្នុងការជួយជំរុញកំណើនសេដ្ឋកិច្ច ។ ដោយមើលឃើញពីផលប្រយោជន៍យ៉ាងសម្បើមនៃការធ្វើកសិកម្មតាមកិច្ចសន្យានេះ រដ្ឋមន្ត្រីក្រសួងកសិកម្ម រុក្ខាប្រមាញ់…
រាជធានីភ្នំពេញ ៖ ការធ្វើកសិកម្មតាមកិច្ចសន្យា ជាយុទ្ធសាស្ត្រថ្មីរបស់រាជរដ្ឋាភិបាលកម្ពុជា ក្នុងរក្សាតម្លៃផលិតផលកសិកម្មរបស់កសិករ និងដើម្បីលើកស្ទួយវិស័យកសិកម្មដែលជាវិស័យសំខាន់មួយក្នុងការជួយជំរុញកំណើនសេដ្ឋកិច្ច ។ ដោយមើលឃើញពីផលប្រយោជន៍យ៉ាងសម្បើមនៃការធ្វើកសិកម្មតាមកិច្ចសន្យានេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញឲ្យវិស័យឯកជន ចូលរួមក្នុងការវិនិយោគជាមួយកសិករឲ្យបានកានតែច្រើនថែមទៀត ។
លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និង នេសាទ បានមានប្រសាសន៍ថា ការធ្វើកសិកម្មតាមកិច្ចសន្យាជាមួយកសិករ រហូតមកដល់ពេលនេះបានធ្វើស្ទើរតែគ្រប់រាជធានី-ខេត្តទៅហើយ ដោយក្នុងនោះមានក្រុមហ៊ុនមួយចំនួនបាននិងកំពុងធ្វើកិច្ចសន្យាជាមួយកសិករ ។ លោករដ្ឋមន្ត្រីថ្លែងថា ៖« កិច្ចការនេះ យើងបានមើលឃើញថាទទួលជោគជ័យគួរឲ្យកត់សម្គាល់ ហើយប្រជាជនមានការសប្បាយចិត្ត ដោយគាត់រំពឹងថានឹងទទួលបានតម្លៃខ្ពស់ នៅពេលដែលគាត់លក់ផលិតផលរបស់គាត់នៅរដូវប្រមូលផល ជាពិសេសក៏គ្មានការបារម្ភថា ខ្វះទីផ្សារនៅពេលមានផលិតផលច្រើននោះដែរ »។
លោកបន្តថា ចំណែកវិស័យឯកជនវិញ ដែលបានធ្វើកិច្ចសន្យាជាមួយប្រជាជនក៏មានទំនុកចិត្តខ្ពស់ និងមិនមានការព្រួយបារម្ភខ្វះផលិតផលសម្រាប់នាំចេញនោះដែរ ។ ជាក់ស្ដែងវិស័យឯកជនដែលបានធ្វើកិច្ចសន្យាទិញប្រមូលទិញស្រូវពីប្រជាជន ដែលជាប្រភេទស្រូវក្រអូប និងពេញនិយមនៅលើទីផ្សារអន្តរជាតិនោះ នឹងមិនបាច់ភ័យព្រួយពីការអត់ផលិតផលនោះទេ គឺ ពលរដ្ឋនឹងខិតខំផលិតជូន ដោយពលរដ្ឋរំពឹងលើតម្លៃដែលបានចរចាមុននឹងចាប់ផ្ដើមផលិត ។ លោករដ្ឋមន្ត្រីបន្ថែមថា មុនដំបូងក្រសួងបានចាប់ផ្ដើមអនុវត្ត ការធ្វើកសិកម្មតាមកិច្ចសន្យាតែលើផលិតផលស្រូវមួយមុខប៉ុណ្ណោះ ក៏ប៉ុន្តែរហូតមកដល់ពេលនេះ បានពង្រីកលើផលិតផលដំឡូងមី ដោយរំពឹងថាឆ្នាំនេះ នឹងផលិតបានជាង១៥លានតោន ខណៈឆ្នាំមុន ផលិតបានតែជាង១១លានតោនប៉ុណ្ណោះ ។ ក្រៅពីផលិតផលស្រូវ និងដំឡូងមី ពេលនេះ ក៏មានផលិតស្វាយមួយទៀតដែរ ដែលកំពុងធ្វើកិច្ចសន្យាជាមួយកសិករក្នុងការប្រមូលទិញ ។ លោករដ្ឋមន្ត្រីបញ្ជាក់ថា ៖« ផលិតផលទាំងបុន្មាននេះ គឺសុទ្ធតែមានតម្លៃល្អប្រសើរ បន្ទាប់ពីបានធ្វើកិច្ចសន្យារវាងអ្នកទិញនិងអ្នកផលិត ហើយវានឹងជំរុញឲ្យការផលិតផលិតផលកសិកម្មក្នុងស្រុកយើងនឹងកាន់តែល្អប្រសើរ »។
លោក តាន់ មុនីវណ្ណ អនុប្រធានសភាពាណិជ្ជកម្មកម្ពុជា បានមានប្រសាសន៍ថា បើទោះបីជាវិស័យផ្សេងទៀត បានរីកចម្រើន និងរួមចំណែកខ្ពស់ក្នុងកំណើនសេដ្ឋកិច្ចក៏ដោយក្តី វិស័យកសិកម្មនៅតែចាត់ទុកថា ជាវិស័យសំខាន់ក្នុងកំណើនសេដ្ឋកិច្ចដែរ ដូច្នេះវិស័យកសិកម្មនៅតែមានអាទិភាពខ្ពស់ក្នុងការវិនិយោគ ។
លោកបន្ដថា ការធ្វើកសិកម្មតាមកិច្ចសន្យា ជារឿងមួយដែលមិនទទួលផលបានភ្លាមៗ ហើយក៏មានការពិបាកដែរ ដោយសារតែរាជរដ្ឋាភិបាលនៅមានការខ្វះខាតទុនច្រើន ប៉ុន្តែកិច្ចការនេះនឹងរលូននៅរយៈអនាគតដ៏ខ្លីខាងមុខនេះ ។
លោកមានប្រសាសន៍ថា ៖« តាមរយៈអនុក្រឹត្យរបស់រាជរដ្ឋាភិបាលដែលបានចុះ កាលពីពេលថ្មីៗនេះ គឺបានជួយដល់វិស័យSMEច្រើន ក្នុងការជំរុញការកែច្នៃមុននាំចេញ។ តាមរយៈអនុក្រឹត្យនេះ នឹងជួយអនុគ្រោះពន្ធដល់SME ពីបីទៅ៥ឆ្នាំ ។ ម្យ៉ាងទៀត អគ្គនាយកដ្ឋានពន្ធដារ នឹងជំរុញឲ្យវិស័យ SME កាន់តែមានទឹកចិត្តក្នុងការផលិត ដោយសហគ្រាសខ្នាតតូចណាដែលមានចំណូលក្រោម២៥០លានរៀល នឹងត្រូវបានអនុគ្រោះពន្ធតែម្ដង »។លោកបន្តថា តាមរយៈអនុក្រឹត្យនេះដែរ វាជាឱកាសសម្រាប់វិស័យSME ក្នុង ការផលិតសម្រាប់នាំចេញឲ្យបានកាន់តែច្រើន ហើយក៏អាចកាត់បន្ថយបាននូវការនាំចូលផលិតផលដែលកម្ពុជាមានស្រាប់ពីប្រទេសក្រៅបានមួយចំនួនផងដែរ ។
យោងតាមសេចក្តីព្រាងច្បាប់ថវិកាឆ្នាំ២០១៩ របស់រាជរដ្ឋាភិបាលកម្ពុជា បានព្យាករណ៍ថា វិស័យកសិកម្មអាចសម្រេចបានកំណើនក្នុងរង្វង់១,៨% ដែលទ្រទ្រង់ដោយអនុវិស័យដំណាំ និងជលផល ។ អនុវិស័យដំណាំត្រូវបានរំពឹងថា នឹងមានកំណើនប្រហាក់ប្រហែលឆ្នាំមុន ដោយសារភាពអំណោយនៃកត្តាអាកាសធាតុ ភាពប្រសើរឡើងនៃប្រព័ន្ធធារាសាស្ត្រ និងការកើនឡើងនៃថ្លៃអង្ករនៅលើទីផ្សារអន្តរជាតិ ព្រមទាំងការកើនឡើងនៃដំណាំបម្រើឲ្យការនាំចេញផ្សេងទៀត ដូចជាកៅស៊ូ និងចេកជាដើម ៕
ចែករំលែកព័តមាននេះ