ខេត្តរតនគិរី ៖ ក្រុមអ្នករត់តាក់ស៊ីខ្មែរមានប្រភេទរថយន្តទួរីស និងសាំងយ៉ុងនៃចំណតផ្សារក្រុងបានលុងទាំងអស់មានប្រតិកម្មយ៉ាងខ្លាំង បន្ទាប់ពីខ្លួនអស់ម៉ូយដឹក ដោយសារក្រុមអ្នករត់តាក់ស៊ីវៀតណាមចូលមកដណ្តើមម៉ូយរបស់ពួកគាត់ដល់ក្នុងដីខ្មែរក្រុងបានលុងតែម្តង ។
ប្រភពព័ត៌មានឱ្យដឹងថា នារយៈពេល២-៣ខែចុងក្រោយនេះ មានក្រុមអ្នករត់តាក់ស៊ីវៀតណាម ប្រើរថយន្តប្រភេទ១៥កៅអី និង២៥កៅអី ពី៦-៧គ្រឿងជារៀងរាល់ថ្ងៃ ចូលមកដឹកកភ្ញៀវជាជនជាតិខ្មែរ និងជនជាតិវៀតណាម ពីក្រុងបានលុងទៅកាន់វៀតណាម តាមច្រកទ្វារអន្តរជាតិអូយ៉ាដាវ ។ ហេតុការណ៍នេះបានបង្កជាប្រតិកម្មពីសំណាក់ក្រុមអ្នករត់តាក់ស៊ីខ្មែរដែលបានត្អូញត្អែថា ខ្លួនអត់មានម៉ូយជិះដូចមុនទៀតទេ ។
ក្រុមអ្នករត់តាក់ស៊ីខ្មែរបានសំណូមនៅថ្ងៃទី៥ មិថុនា ២០១៣ នេះ ដល់អាជ្ញាធរខេត្ត និងម្ចាស់ចំណតផ្សារបានលុង មេត្តាជួយដោះស្រាយបញ្ហានេះ ដោយដីខ្មែរទុកសិទ្ធិឱ្យខ្មែររកស៊ីផង ចំណែកក្រុមតាក់ស៊ីវៀតណាម សូមចាំទទួលម៉ូយត្រឹមច្រកទ្វារអន្តរជាតិអូយ៉ាដាវបានហើយ កុំចូលមកលុកលុយដណ្តើមម៉ូយដល់ក្នុងផ្សារបានលុង ដែលជាទីកន្លែងចាប់ម៉ូយរបស់ក្រុមអ្នករត់តាក់ស៊ីខ្មែរដែលបានបង់ថ្លៃចំណតមិនដែលអាក់ខាននោះ ៕
ចែករំលែកព័តមាននេះ