រាជធានីភ្នំពេញ ៖ រោងចក្រផលិតទឹកស្អាតនិរោធជំហានទី១ ស្ថិតនៅក្នុងសង្កាត់និរោធ ខណ្ឌមានជ័យ កសាងឡើងក្រោមហិរញ្ញប្បទានពីទីភ្នាក់ងារបារាំងសម្រាប់ការអភិវឌ្ឍ(AFD) និងហិរញ្ញប្បទានពីទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញ សរុបថវិកាទាំងអស់ចំនួន៩០,៤លានដុល្លារអាមេរិក ត្រូវបានប្រារព្ធពិធីសម្ពោធដាក់ឱ្យដំណើរការជាផ្លូវការក្រោមអធិបតីភាពដ៏ខ្ពង់ខ្ពស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅ ព្រឹកថ្ងៃទី៤ មិថុនា ។
ក្នុងឱកាសនោះមានការនិមន្ត និងអញ្ជើញចូលរួមពីសម្តេចព្រះពោធិវ័ង្សកិត្តិបណ្ឌិត អំ លឹមហេង ព្រះសង្ឃនាយករងទី២នៃព្រះរាជាណាចក្រកម្ពុជា ព្រះថេរានុត្ថរៈ លោក គូម៉ាម៉ារូ យូ ជិ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា លោកSerge Mostura ឯកអគ្គរដ្ឋទូតបារាំងប្រចាំព្រះរាជាណាចក្រកម្ពុជា ព្រមទាំងសមាជិក សមាជិការដ្ឋសភា ព្រឹទ្ធសភា រាជរដ្ឋាភិបាល ភ្ញៀវជាតិ-អន្តរជាតិ ប្រជាពលរដ្ឋ លោកគ្រូអ្នកគ្រូ និងសិស្សានុសិស្សយ៉ាងច្រើនកុះករ ។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍សម្តែងនូវការអរគុណចំពោះរដ្ឋាភិបាលបារាំង និងរដ្ឋាភិបាលជប៉ុន ដែលមានជំនឿជឿជាក់មកលើរាជរដ្ឋាភិបាលកម្ពុជា។ រដ្ឋាភិបាលប្រទេសទាំងពីរនេះ បានចុះហត្ថលេខាផ្តល់ហិរញ្ញប្បទានមុនពេលបោះឆ្នោតមកដល់ នេះគឺជាការបង្ហាញពីជំនឿទុកចិត្ត ចំពោះស្ថិរភាពនយោបាយរបស់កម្ពុជា ដែលគម្រោងនានាមិនត្រូវបានបង្អាក់នៅក្នុងរយៈកាលនៃការបោះឆ្នោតនោះទេ ។ មានភាពខុសគ្នាកាលពីឆ្នាំ២០០៣ ដែលប្រទេសមួយចំនួនយល់ថា ត្រូវរង់ចាំក្រោយការបោះឆ្នោត ឬរហូតដល់ប្រទេសមួយចំនួនក៏ដូចជាដៃគូមួយចំនួនរង់ចាំបង្កើតរដ្ឋាភិបាលថ្មីក្នុងរយៈពេលនៃការជាប់គាំងខាងនយោបាយ ។
សម្តេចតេជោនាយករដ្ឋមន្ត្រីមានប្រសាសន៍បន្តថា នេះមិនមែនជាសារនយោបាយមួយទេ ប៉ុន្តែវាជារឿងពិតមួយដែលបាននិងកំពុងកើតនៅក្នុងទឹកដីនៃព្រះរាជាណាចក្រកម្ពុជា ។ ទន្ទឹមនឹងនេះ សម្តេចបានថ្លែងនូវអំណរគុណលោកឯកអគ្គរដ្ឋទូតប្រទេសបារាំង និងប្រទេសជប៉ុនដែលបានចូលរួមនៅថ្ងៃនេះជាមួយនឹងការបំពេញនូវកិច្ចការទាំងឡាយដែលជំរុញក្នុងទំនាក់ទំនងកិច្ចសហប្រតិបត្តិការជាមួយព្រះរាជាណាចក្រកម្ពុជា ។ ជាមួយប្រទេសជប៉ុន ឆ្នាំនេះជាខួបលើកទី៦០ នៃទំនាក់ទំនងរវាងកម្ពុជា-ជប៉ុនផងដែរ ជួនគ្នានឹងព្រះករុណាព្រះមហាក្សត្រនៃព្រះរាជាណាចក្រកម្ពុជា ព្រះអង្គព្រះជន្ម៦០ព្រះវស្សា ។ ចំណុចនេះជាការគាប់ជួនគ្នាយ៉ាងខ្លាំងណាស់នៅក្នុងទំនាក់ទំនង ពេលដែលព្រះករុណាព្រះមហាក្សត្រព្រះអង្គ ទ្រង់ប្រសូតគឺមានទំនាក់ទំនងរវាងកម្ពុជា និងជប៉ុនដែលទើបនឹងប្រារព្ធព្រះរាជពិធីថ្វាយព្រះអង្គកាលពីខែកន្លងទៅ ។
ដោយឡែក ចំពោះបារាំងគឺមានចំណងទាក់ទងយូរអង្វែងណាស់ អ្វីៗគឺបានដំណើរការទៅមុខ ខ្ញុំសូមបន់ស្រន់និងជួយជ្រោមជ្រែង ដើម្បីឱ្យទំនាក់ទំនងកម្ពុជា-បារាំងកាន់តែដំណើរការទៅមុខបន្តទៀត ។ ពាក់ព័ន្ធនឹងកិច្ចពង្រឹងពង្រីកទំនាក់ទំនងកិច្ចសហប្រតិបត្តិការថែមទៀត សម្តេចតេជោ នាយករដ្ឋមន្ត្រី ហ៊ុន សែន គូសបញ្ជាក់ ថា ខ្ញុំពិតជាមិនឱ្យមិត្តភក្តិមានការខកចិត្តទេ មិត្តភក្តិជួយយើង យើងក៏ជួយមិត្តភក្តិវិញដែរ ។ នៅត្រង់ថា រដ្ឋាភិបាលរបស់មិត្តភក្តិ ពិតជាមានការលំបាក ប្រសិនបើយើងអភិវឌ្ឍន៍ទៅវាគ្មានតម្លាភាព គ្មានប្រសិទ្ធភាពខាងសេដ្ឋកិច្ច នោះរដ្ឋសភានៃប្រទេសទាំងនោះនឹងមានការដេញដោលសួររដ្ឋាភិបាលរបស់គេស្តីអំពីបញ្ហាទាក់ទិននៅនឹងអភិបាលកិច្ច…។
ដូច្នេះហើយ ក្នុងចំណុចនេះ សម្តេចបានសង្កត់ធ្ងន់ថា រាជរដ្ឋាភិបាលកម្ពុជានឹងបន្តការខិតខំទៅលើកំណែទម្រង់ទាំងឡាយដែលខ្លួនបាននិងកំពុងធ្វើ ហើយនឹងបន្តធ្វើទៅមុខទៀតទាក់ទងនឹងការជំរុញការអភិវឌ្ឍ ទាក់ទងនឹងបញ្ហាទាំងឡាយដែលជាស្នូលនៃយុទ្ធសាស្ត្រចតុកោណ ដើម្បីកំណើនការងារសមធម៌ និងប្រសិទ្ធភាព ដែលមានអភិបាលកិច្ចជាស្នូលសម្រាប់ការអភិវឌ្ឍ ហើយកុំឱ្យអ្វីដែលជាសមិទ្ធផលដែលបានប្រសូតនៅថ្ងៃនេះវាបាត់បង់ប្រសិទ្ធភាព ។
សម្តេចតេជោនាយករដ្ឋមន្ត្រីបានស្នើឱ្យរដ្ឋាករទឹកស្វយ័តក្រុងភ្នំពេញត្រូវបន្តជំហានវិនិយោគតទៅទៀត ។ បានសេចក្តីថា ការរីកចម្រើនរបស់យើងមិនត្រឹមតែរាជធានីភ្នំពេញមួយទេ គឺប្រទេសកម្ពុជាក៏រីកចម្រើនដូចគ្នាដែរ។ ទីក្រុងនិងជនបទ កំពុងបោះជំហានព្រមៗគ្នាជាមួយនឹងហេដ្ឋារចនាសម្ព័ន្ធ ជាមួយនឹងការផ្តល់ទៅទីជនបទ ដើម្បីកាត់បន្ថយគម្លាតរវាងទីក្រុងនឹងជនបទតាមរយៈការផ្តល់ជូនដល់ជនបទ ជាមួយនឹងហេដ្ឋារចនាសម្ព័ន្ធ ការតភ្ជាប់ ហើយជំរុញវិស័យអប់រំ វិស័យសុខាភិបាល និងវិស័យដទៃទៀតសម្រាប់ឱ្យជនបទទទួលបាន ។
សម្តេចតេជោ នាយករដ្ឋមន្ត្រី មានប្រសាសន៍រំលឹកដាស់តឿនដល់រដ្ឋាករទឹកក៏ដូចជាផ្នែករដ្ឋនិងផ្នែកឯកជននៅរាជធានីភ្នំពេញ ថា គប្បីត្រូវតែរៀបចំឱ្យមានបំពង់បង្ហូរទឹកតម្រង់ឆ្ពោះទៅរោងចក្រ សហគ្រាស សណ្ឋាគារ និងក្រសួង ស្ថាប័នរបស់ខ្លួន ដើម្បីចៀសវាងនូវការលំបាកក្នុងការអន្តរាគមន៍ពន្លត់អគ្គិភ័យដែលតែងតែកើតមានជារឿយៗ ។ សម្តេចបានសង្កត់ធ្ងន់ថា ម្ចាស់ដែលមានបុរី រោងចក្រ សហគ្រាស សណ្ឋាគារ ក៏ត្រូវគិតគូររៀបចំ ត្រូវតែធ្វើ ត្រូវមានការចែកចាយទឹកនៅក្នុងតំបន់បម្រុងទុក ។ បើមិនដូច្នេះទេ ទោះបីមានរថយន្តពន្លត់អគ្គិភ័យប៉ុន្មានក៏នៅតែមិនទាន់សភាពការណ៍នៃការអន្តរាគមន៍ដែរ ។
ទន្ទឹមនឹងការរៀបចំបណ្តាញចែកចាយទៅឱ្យប្រជាពលរដ្ឋ រដ្ឋាករទឹកក៏ត្រូវរៀបចំឱ្យមានបណ្តាញបំពង់បង្ហូរទៅកាន់តំបន់ដែលត្រូវយកទឹកសម្រាប់អន្តរាគមន៍ នៅរោងចក្រ សហគ្រាសក្រុមហ៊ុន ស្ថាប័នរដ្ឋ សណ្ឋាគារ ។ នៅពេលមានសភាពការណ៍ គឺត្រូវចាប់បន្តភ្លាមឱ្យទាន់សភាពការណ៍ ឬយ៉ាងហោចណាស់ រថយន្តពន្លត់អគ្គិភ័យអាចយកទឹកពីទីនោះបន្តឆ្ពោះទៅដោយមិនចាំបាច់បើកមកបូមនៅកន្លែងដែលនៅឆ្ងាយខាតពេលវេលា ។
សម្តេចតេជោ ហ៊ុន សែន បានរំលឹកដាស់តឿនទាំងផ្នែកឯកជន ទាំងផ្នែករដ្ឋ ក៏ដូចជារដ្ឋាករទឹកត្រូវមានបំពង់ចែកចាយ ដើម្បីចៀសវាងនូវការលំបាក គួរបង្កើតតំបន់យកទឹកសម្រាប់រថយន្តពន្លត់អគ្គិភ័យឱ្យបានច្បាស់ ដើម្បីបូមយកទឹកឱ្យបានរហ័ស ត្រូវសហការជាមួយនគរបាលជាតិ សាលាក្រុង រដ្ឋាករទឹក ជាមួយខេត្តកណ្តាលផងដែរ ។
លោកគូម៉ាម៉ារ៉ូ យូជិ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជាថ្លែងថា គម្រោងនេះនឹងជួយបង្កើនសមត្ថភាពផលិតទឹកស្អាត នៅ រាជធានីភ្នំពេញចំនួន៣៨%បន្ថែមទៀត ។ នេះគឺជាលទ្ធផលដែលកើតចេញពីកិច្ចសហប្រតិបត្តិការ និងកិច្ចសម្របសម្រួលដ៏ជិតស្និទ្ធរវាងប្រទេសផ្តល់ជំនួយដ៏ធំពីរជូនចំពោះប្រទេសកម្ពុជាគឺប្រទេសជប៉ុន និងប្រទេសបារាំង ។ លោកឯកអគ្គរាជទូតជប៉ុនបន្តថារដ្ឋាភិបាលជប៉ុនបានយកចិត្តទុកដាក់ផ្តល់ជំនួយជាយូរមកហើយ ដើម្បីកែលម្អធ្វើឱ្យប្រសើរឡើងវិស័យផ្គត់ផ្គង់ទឹកស្អាតនៅកម្ពុជា គឺចាប់តាំងពីទសវត្សរ៍ឆ្នាំ១៩៩០មកម៉្លេះ ។ នៅប៉ុន្មានឆ្នាំថ្មីៗនេះ ប្រទេសជប៉ុនបាននិងកំពុងអនុវត្តផ្តល់ជំនួយដើម្បីពង្រឹង និងពង្រីកសមត្ថភាពផលិតទឹកស្អាតនៅទីក្រុងពីរបន្ថែមទៀត គឺស្ថានីយផលិតទឹកស្អាត និងបណ្តាញចែកចាយទឹកស្អាតនៅតំបន់ប្រជុំជនខេត្ត ។ សារលិខិតប្តូរនៃជំនួយឥតសំណងសម្រាប់ផ្គត់ផ្គង់ទឹកស្អាតនៅខេត្តកំពង់ចាម និងខេត្តបាត់ដំបង មានទឹកប្រាក់៣.៣៥៥លានយ៉េនគឺប្រហែលស្មើនឹង៣៣លានដុល្លារអាមេរិក ត្រូវចុះហត្ថលេខានៅថ្ងៃទី៥ មិថុនា រវាងរដ្ឋាភិបាលជប៉ុន និងរាជរដ្ឋាភិបាលកម្ពុជា ។
ខ្ញុំសង្ឃឹមដោយស្មោះសរថា គម្រោងសហប្រតិបត្តិការដែលអនុវត្តប្រកបដោយជោគជ័យ រួមទាំងរោងចក្រផលិតទឹកស្អាតដែលបានដាក់ឱ្យដំណើរការសម្ពោធនៅថ្ងៃនេះ នឹងជួយពង្រឹងជាបន្តទៀតនូវទំនាក់ទំនងមិត្តភាពដែលមានជាយូរអង្វែងមកហើយរវាងប្រជាជនជប៉ុននិងប្រជាជនកម្ពុជា ។
លោក Serge Mostura ឯកអគ្គរដ្ឋទូតបារាំងប្រចាំនៅកម្ពុជាថ្លែងថា ភាពជាដៃគូរវាងរដ្ឋាករទឹកស្វយ័តក្រុងភ្នំពេញនិងទីភ្នាក់ងារបារាំងសម្រាប់ការអភិវឌ្ឍ បានចារឹកនៅក្នុងប្រវត្តិសាស្ត្រដ៏យូរអង្វែងមួយ ដែលបានចាប់ផ្តើមឡើងតាំងពីដើមទសវត្សឆ្នាំ១៩៩០មកម្ល៉េះ។ គ្រាន់តែរោងចក្រផលិតទឹកស្អាតនិរោធជំហានទី១នេះបានដាក់ឱ្យដំណើរការភ្លាម រដ្ឋាករទឹកស្វយ័តក្រុងភ្នំពេញ កំពុងរៀបចំ សាងសង់រោងចក្រផលិតទឹកស្អាតនិរោធជំហានទី២ទៀត ។
កាលដើមខែមីនា ឆ្នាំនេះ មានពិធីចុះហត្ថលេខាលើកម្ចីសម្បទាន ដោយផ្ទាល់លើកទី៣នូវទឹកប្រាក់៣០លានអឺរ៉ូ សម្រាប់សាងសង់រោងចក្រផលិតទឹកស្អាតនិរោធជំហានទី២ដែលអាចមានសមត្ថភាពផលិតទឹកស្អាតចំនួន២៦០.០០០ម៉ែត្រគូបក្នុងមួយថ្ងៃ សម្រាប់លទ្ធភាពឆ្លើយតបទៅនឹងតម្រូវការទឹកស្អាតនៅក្នុងទីក្រុងភ្នំពេញនិងតំបន់ជាយក្រុងរហូតដល់ឆ្នាំ២០២០ ។ ក្នុងរយៈពេល១២ខែចុងក្រោយនេះ ប្រទេសបារាំងបានយល់ព្រមផ្ដល់ជំនួយជាទឹកប្រាក់ចំនួន៧០លានអឺរ៉ូសម្រាប់ប្រទេសកម្ពុជា ជាគម្រោងយ៉ាងច្រើនដែលព្រះរាជាណាចក្រកម្ពុជា និងទីភ្នាក់ងារបារាំងសម្រាប់ការអភិវឌ្ឍនឹងត្រូវអនុវត្ដនៅបណ្ដាឆ្នាំខាងមុខ ។
នៅឆ្នាំ២០១៣នេះ ជាមួយនឹងកម្ចីសម្បទានទី១ដល់ព្រះរាជាណាចក្រកម្ពុជាក្នុងទឹកប្រាក់២០លានអឺរ៉ូ គឺសម្រាប់វិស័យធារាសាស្រ្ដដែលជាវិស័យនៃសហប្រតិបត្ដិការជាប្រវត្ដិសាស្រ្ដរវាងប្រទេសកម្ពុជា និងប្រទេសបារាំង ហើយក៏ជាភាពជោគជ័យមួយផងដែរ ។ លោកស៊ុយ សែម រដ្ឋមន្ដ្រីក្រសួងឧស្សាហកម្មរ៉ែ និងថាមពល ថ្លែងថា ចាប់តាំងពីឆ្នាំ១៩៩៣ រហូតមកដល់ដើមឆ្នាំ២០១៣នេះ សេវាផ្គត់ផ្គង់ទឹកស្អាតត្រូវបានពង្រីកពី២០%រហូតដល់៨៥% នៅរាជធានីភ្នំពេញ ក្នុងនោះបានពង្រីកសមត្ថភាពផលិតពី៦៥.០០០ម៉ែត្រគូបក្នុងមួយថ្ងៃដល់៣៣៦.០០០ម៉ែត្រគូបក្នុងមួយថ្ងៃ និងផ្គត់ផ្គង់ទឹកប្រកបដោយគុណភាពស្របតាមស្ដង់ដាទឹកផឹកថ្នាក់ជាតិ និងស្របតាមស្ដង់ដាគុណភាពទឹកស្អាតរបស់អង្គការសុខភាពពិភពលោកជូនប្រជាពលរដ្ឋ២៤ម៉ោងក្នុងមួយថ្ងៃ និង៧ថ្ងៃក្នុងមួយសប្ដាហ៍ ។
លោករដ្ឋមន្ដ្រីបន្ដថា តម្រូវការទឹកស្អាតទូទាំងប្រទេសមានសន្ទុះកើនឡើងយ៉ាងឆាប់រហ័ស ជាពិសេសនៅរាជធានីភ្នំពេញដែលជាមធ្យមមានអតិថិជនថ្មីប្រមាណ១៤.០០០គ្រួសារត្រូវបានផ្គត់ផ្គង់ទឹកស្អាតបន្ថែមក្នុងមួយឆ្នាំៗចាប់តាំងពីឆ្នាំ២០០៤រហូតមក ។ ដើម្បីឆ្លើយតបទៅនឹងសំណូមពរប្រើប្រាស់ទឹកនៅរាជធានីភ្នំពេញដែលចេះតែកើនឡើងយ៉ាងគំហុក រាជរដ្ឋាភិបាលបានអនុញ្ញាតឱ្យរដ្ឋាករទឹកស្វយ័តក្រុងភ្នំពេញទទួលហិរញ្ញប្បទានផ្ទាល់លើកទី២ពីទីភ្នាក់ងារសម្រាប់ការអភិវឌ្ឍបារាំង (AFD) និងហិរញ្ញប្បទានពីទីភ្នាក់ងារសហប្រតិបត្ដិការអន្ដរជាតិនៃប្រទេសជប៉ុន (JICA) ព្រមទាំងថវិកាបដិភាគផ្ទាល់របស់អង្គភាព ដើម្បីសាងសង់រោងចក្រផលិតទឹកស្អាតនិរោធជំហានទី១ ដែលមានសមត្ថភាពផលិតទឹក១៣០.០០០ម៉ែត្រគូបក្នុងមួយថ្ងៃ និងបានគិតគូរសម្រាប់ពង្រីកបន្ថែមសមត្ថភាពផលិតទឹកស្អាត១៣០.០០០ម៉ែត្រគូបក្នុងមួយថ្ងៃទៀតនៅពេលអនាគត គឺសាងសង់រោងចក្រផលិតទឹកស្អាតនិរោធជំហានទី២ ៕
ចែករំលែកព័តមាននេះ