ខេត្តកំពត ៖ ព័ត៌មានមិនច្បាស់ការមួយបានចេញពីខេត្តកំពត កាលពីព្រឹកថ្ងៃទី៤ មិថុនា ត្រូវបានគេរាយការណ៍ទៅវិទ្យុក្នុងស្រុកមួយថា មានយន្តហោះស្លាបកាត់មួយគ្រឿងហោះហើរលើតំបន់ជួរភ្នំកំចាយទឹកឈូរ បានធ្លាក់នៅចំណុចទំនប់វារីអគ្គិសនីភ្នំកំចាយទឹកឈូរ ។ ព័ត៌មាននេះបានបង្កឱ្យមានការភ្ញាក់ផ្អើលដល់គ្រប់ស្រទាប់មជ្ឈដ្ឋានប្រជាពលរដ្ឋ មន្ត្រីរាជការនៅក្នុងខេត្តរហូតមានការភ្ញាក់ផ្អើលទូទាំងប្រទេសទៀតផង ។ នេះក៏ដោយសារតែព័ត៌មានខាងលើបានផ្សព្វផ្សាយលឿនពេក និងខ្វះការពិចារណា ។
ទំនប់វារីអគ្គិសនីដែលជាចំណុចលេចចេញនូវព័ត៌មានចចាមអារ៉ាមនេះគឺមានចម្ងាយជាង១០គីឡូម៉ែត្រពីក្រុងកំពត ស្ថិតក្នុងភូមិស្នំប្រាំពីរ ឃុំមាក់ប្រាង ស្រុកទឹកឈូរ ។ ប្រជាពលរដ្ឋដែលធ្វើអាជីវកម្មដឹកអុសពី តំបន់នោះបានឱ្យដឹងថា មុនដំបូងពួកគាត់បាន ឃើញយន្តហោះស្លាបកាត់ធុនតូចមួយគ្រឿង ដែលពួកគាត់មិនស្គាល់ម៉ាកបានហោះហើរក្រឡឹងជុំវិញជួរភ្នំបូកគោភ្នំកំចាយទឹកឈូរ រួចហោះកាត់សំដៅទៅទំនប់ទឹកវារីអគ្គិសនី ។ លុះដល់កន្លែងស្តុបទឹកខាងមុខទំនប់ ជាជ្រលងជ្រោះភ្នំព័ទ្ធជុំវិញ គេឃើញយន្តហោះនោះបន្ទាបខ្លួនពីលើផ្ទៃទឹក កម្ពស់ប្រហែលជា១០មែ៉ត្រដែលទាបជាងខ្នងភ្នំ ។ ចំណែកឯប្រជាពលរដ្ឋនៅក្បែរៗព្រៃភ្នំដែលកំពុងតែតាមមើលនោះ ក៏បាត់លែងឃើញយន្តហោះ ។
ខណៈនោះពួកគាត់នឹកស្មានថាយន្តហោះនោះធ្លាក់ហើយក៏និយាយតាមទូរស័ព្ទមកអ្នកនៅក្នុងភូមិដោយសង្ស័យថា យន្តហោះធ្លាក់ ពីព្រោះពួកគាត់ពុំធ្លាប់ឃើញយន្តហោះប្រភេទនេះហោះលើតំបន់នេះទាបដូច្នេះទេ នាពេលកន្លងមក ។ បន្ទាប់មកអ្នកឮដំណឹងនេះ ក៏រាយការណ៍បន្តទៅវិទ្យុក្នុងស្រុកមួយ ។ នេះមិនខុសពីចាស់ៗពោលថា «ក្អែក១ ក្អែក១០» នោះឡើយ ។ ទោះជាយ៉ាងណា ការផ្តល់ព័ត៌មានមិនច្បាស់ការនេះ បានធ្វើឱ្យមានការភ្ញាក់ផ្អើលដល់ប្រជាពលរដ្ឋទូទាំងប្រទេសតាមរយៈការផ្សាយព័ត៌មានគ្មានការពិត។ មន្ត្រីប៉ូលិសប៉ុស្តិ៍មាក់ប្រាងបានបដិសេធថា ព័ត៌មានដែលធ្វើឱ្យមានការភ្ញាក់ផ្អើលនោះ គឺជាព័ត៌មានមិនពិត៕
ចែករំលែកព័តមាននេះ