រាជធានីភ្នំពេញ ៖ មានការភ្ញាក់ផ្អើលមួយបានកើតឡើងបន្ទាប់ពីគេបានប្រទះឃើញសពស្ត្រីមិនស្គាល់អត្តសញ្ញាណម្នាក់ត្រូវឃាតករមិនស្គាល់មុខសម្លាប់រួចញាត់ចូលក្នុងការុងមួយ ហើយដឹកតាមរថយន្តយកទៅប្លុងចោលនៅក្នុងគុម្ពោតព្រៃក្បែរចិញ្ចើមផ្លូវមួយកន្លែង ។ ហេតុការណ៍នេះបានបង្កឱ្យមនុស្សរាប់រយនាក់ផ្អើលនាំគ្នាទៅចោមរោមមើលយ៉ាងកកកុញ កាលពីវេលាម៉ោង១០និង៤៥នាទីព្រឹកថ្ងៃទី៤ មិថុនា
រាជធានីភ្នំពេញ ៖ មានការភ្ញាក់ផ្អើលមួយបានកើតឡើងបន្ទាប់ពីគេបានប្រទះឃើញសពស្ត្រីមិនស្គាល់អត្តសញ្ញាណម្នាក់ត្រូវឃាតករមិនស្គាល់មុខសម្លាប់រួចញាត់ចូលក្នុងការុងមួយ ហើយដឹកតាមរថយន្តយកទៅប្លុងចោលនៅក្នុងគុម្ពោតព្រៃក្បែរចិញ្ចើមផ្លូវមួយកន្លែង ។ ហេតុការណ៍នេះបានបង្កឱ្យមនុស្សរាប់រយនាក់ផ្អើលនាំគ្នាទៅចោមរោមមើលយ៉ាងកកកុញ កាលពីវេលាម៉ោង១០និង៤៥នាទីព្រឹកថ្ងៃទី៤ មិថុនា នៅគុម្ពោតព្រៃមួយស្ថិតនៅតាមបណ្តោយផ្លូវទំនប់សណ្តស្ទឹងព្រែកត្នោត (ផ្លូវទំនប់ ៧មករា) ក្នុងភូមិបាគូ សង្កាត់ដង្កោ ខណ្ឌដង្កោ ។
នេះជាករណីលើកទី១ហើយនៅឆ្នាំនេះ ដែលជាករណីឃាតកម្មសម្លាប់មនុស្សច្រកការុងដឹកយកមកប្លុងចោលនៅតំបន់ជាយក្រុង ។ ស្ត្រីរងគ្រោះមិនត្រូវបានគេស្គាល់ឈ្មោះនោះទេ ប៉ុន្តែស្ត្រីរងគ្រោះមានអាយុប្រហែល២០ឆ្នាំ និងមិនទាន់ដឹងថាមានទីលំនៅនៅឯណានៅឡើយទេ ហើយសពដែលក្រុមឃាតករសម្លាប់ញាត់ចូលក្នុងការុងមួយនោះគឺមានរុំកន្សែងពោះគោទៀតផង ។ ប្រជាពលរដ្ឋនៅក្បែរកន្លែងកើតហេតុនេះបាននិយាយថា កាលពីវេលាម៉ោង១២ពាក់កណ្តាលអធ្រាត្រថ្ងៃទី៣ មិថុនា គេបានឃើញរថយន្តមិនស្គាល់ម៉ាកមួយគ្រឿងជាប្រភេទរថយន្តទេសចរណ៍ធុនតូចបើកទៅឈប់នៅទីនោះ ក៏ប៉ុន្តែគេមិនបានចាប់អារម្មណ៍ថា រថយន្តនោះឈប់ធ្វើអ្វីនោះឡើយ។
រហូតមកដល់វេលាព្រឹកក៏មានក្មេងៗ២ទៅ៣នាក់ដែលដើររើសអេតចាយបានប្រទះឃើញមានការុងមួយរាងប៉ោងធំ ពួកគេបាននាំគ្នាស្រាយមាត់ការុងដោយរំពឹងថា ប៉ះចំលាភធំហើយ ។ ប៉ុន្តែផ្ទុយទៅវិញ នៅពេលស្រាយមាត់ការុងនោះហើយ ស្រាប់តែមើលទៅក៏ប្រទះឃើញសពស្ត្រីម្នាក់បណ្តាលឱ្យមានការភ្ញាក់ផ្អើលឡើងតែម្តង ។ មន្ត្រីប៉ូលិសមូលដ្ឋានបានសន្និដ្ឋានជាជំហានដំបូងថា ស្ត្រីរងគ្រោះស្លាប់ដោយសារអំពើឃាតកម្ម ហើយត្រូវគេសម្លាប់នៅកន្លែងផ្សេង រួចច្រកក្នុងការុងដឹកតាមរថយន្តយកមកប្លុងចោលនៅទីនោះ ។
ប៉ុន្តែទោះជាយ៉ាងណា គេពុំទាន់ដឹងថា ឃាតកម្មនេះជារឿងគំនុំ ឬក៏ជាការរំលោភសម្លាប់ ឬជាអំពើប្លន់សម្លាប់នោះទេ ព្រោះពេលនេះកំពុងស្ថិតក្នុងការស្រាវជ្រាវរបស់សមត្ថកិច្ចនៅឡើយ ហើយនៅក្បែរកន្លែងកើតហេតុ ប៉ូលិសបានរកឃើញស្រោមអនាម័យមិនទាន់ប្រើ១ប្រអប់ ។ ក្រោយពេលមានហេតុការណ៍នេះកើតឡើង មានមនុស្សម្នាជាច្រើនរយនាក់បាននាំគ្នាទៅចោមរោមមើលយ៉ាងកកកុញ ប៉ុន្តែពុំមានអ្នកណាម្នាក់ស្គាល់នោះឡើយ ដោយសារសពស្ថិតនៅក្នុងការុងមិនអាចមើលមុខឃើញទេ គឺចេញតែម្រាមដៃមកក្រៅបន្តិចប៉ុណ្ណោះ ។
សមត្ថកិច្ចមូលដ្ឋានរួមទាំងសមត្ថកិច្ចជំនាញបច្ចេកទេសពេទ្យ និងមន្ត្រីតុលាការដែលបានចុះទៅកាន់កន្លែងកើតហេតុភ្លាមៗនោះក៏មានវត្តមានលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញផងដែរ ។ ទោះជាយ៉ាងណា សពមិនត្រូវបានធ្វើកោសល្យវិច័យនៅនឹងកន្លែងកើតហេតុនោះទេ ហើយត្រូវបានដឹកចេញទៅកាន់វត្តឫស្សីសាញ់ស្ថិតក្នុងសង្កាត់ព្រៃស ដើម្បីធ្វើការពិនិត្យនៅទីនោះ ។ តាមប្រភពព័ត៌មានពីកន្លែងធ្វើកោសល្យវិច័យលើសពស្ត្រីរងគ្រោះបានឱ្យដឹងថា ការសម្លាប់ស្ត្រីរងគ្រោះនេះគឺជារឿងឃាតកម្ម ។ សពស្ថិតក្នុងសភាពអាក្រាតកាយដែលរុំដោយភួយពណ៌ក្រហម និងអាចស្លាប់ក្នុងចន្លោះពេល៣ថ្ងៃកន្លងមកហើយ ព្រោះសពបានហើម មើលមុខលែងស្គាល់ទៅហើយ ។ សពអាចស្លាប់ដោយការរឹត.ក ព្រោះមានស្នាមនៅក និងមានខ្សែនីឡុងផងដែរ ។
បុរសម្នាក់ដែលបាត់ភរិយានៅខេត្តតាកែវ ក៏ត្រូវបានហៅឱ្យមកពិនិត្យសពដែរ តែមិនអាចស្គាល់បានទេ ព្រោះសពហើមមើលមិនយល់ ឯការចំណាំពីសម្លៀកបំពាក់ក៏មិនអាចទៅរួច ព្រោះសពមានភាពអាក្រាតកាយ ។ ទោះជាយ៉ាងណា គេដាក់មន្ទិលសង្ស័យថា ការសម្លាប់នេះអាចធ្វើឡើងនៅក្នុងបន្ទប់ផ្ទះសំណាក់ ឬបន្ទប់ជួលណាមួយ ហើយឃាតករអាចជាដៃគូស្នេហាផងដែរ ព្រោះតែសពមិនមានស្លៀកពាក់ទេ គឺកាយអាក្រាត ។ នៅពេលនេះសមត្ថកិច្ចកំពុងដុតដៃដុតជើងស្រាវជ្រាវស្វែងរកឃាតករក្នុងករណីឃាតកម្មនេះហើយ ៕
ចែករំលែកព័តមាននេះ