រាជធានីភ្នំពេញ ៖ ជនរងគ្រោះនៅក្នុងរបបប្រល័យពូជសាសន៍ខ្មែរក្រហម បានប្រកាសធ្វើមហាបាតុកម្មមួយនៅថ្ងៃទី៩ មិថុនា ខាងមុខនេះដើម្បីទាមទារឱ្យលោកកឹម សុខា ប្រធានស្ដីទីគណបក្សសង្គ្រោះជាតិ សុំទោសចំពោះពលរដ្ឋដែលបានបាត់បង់ជីវិតនៅគុកទួលស្លែង(មន្ទីរឃុំឃាំងស-២១)ជាសាធារណៈដោយសារតែលោកកឹម សុខា និយាយថា គុកទួលស្លែងជាកន្លែងសិប្បនិម្មិត ។
រាជធានីភ្នំពេញ ៖ ជនរងគ្រោះនៅក្នុងរបបប្រល័យពូជសាសន៍ខ្មែរក្រហម បានប្រកាសធ្វើមហាបាតុកម្មមួយនៅថ្ងៃទី៩ មិថុនា ខាងមុខនេះដើម្បីទាមទារឱ្យលោកកឹម សុខា ប្រធានស្ដីទីគណបក្សសង្គ្រោះជាតិ សុំទោសចំពោះពលរដ្ឋដែលបានបាត់បង់ជីវិតនៅគុកទួលស្លែង(មន្ទីរឃុំឃាំងស-២១)ជាសាធារណៈដោយសារតែលោកកឹម សុខា និយាយថា គុកទួលស្លែងជាកន្លែងសិប្បនិម្មិត ។
មានប្រសាសន៍ក្នុងសន្និសីទសារព័ត៌មានកាលពីព្រឹកថ្ងៃទី៤ មិថុនា នៅក្នុងបរិវេណសារមន្ទីរប្រល័យពូជសាសន៍ទួលស្លែង លោក ជុំ ម៉ី អ្នកដែលនៅរស់រានមានជីវិតពីមន្ទីរឃុំឃាំងនេះបានលើកឡើងថា នេះជាសន្និសីទលើកទី២ និងជាថ្ងៃចុងក្រោយដែលរូបលោកក៏ដូចជាបងប្អូនដែលរងគ្រោះនៅក្នុងរបបប្រល័យពូជសាសន៍ឱ្យលោកកឹម សុខា មកសុំទោសនៅក្នុងអតីតគុកទួលស្លែងនៅចំពោះមុខអ្នករងគ្រោះ និងអុជធូបបីសរសៃចំពោះផ្នូរអ្នកដែលស្លាប់នៅក្នុងរបបប្រល័យពូជសាសន៍ ។
លោកជុំ ម៉ី បានបន្តថា អ្នកដែលរងគ្រោះក្នុងរបបប្រល័យពូជសាសន៍ និងអ្នកនៅរស់រានមានជីវិតពីគុកទួលស្លែង មិនសុខចិត្តចំពោះការនិយាយរបស់លោកកឹម សុខា ដែលថា គុកទួលស្លែងជាកន្លែងសិប្បនិមិ្មត ហើយបើមិនបានមកសុំទោសនោះនឹងនាំគ្នាធ្វើមហាបាតុកម្មធំមួយនៅទីលានប្រជាធិបតេយ្យដែលនឹងមានអ្នកចូលរួមរហូតដល់២ម៉ឺននាក់ ហើយ២ពាន់នាក់នឹងដង្ហែទៅកាន់ទីស្នាក់ការគណបក្សសង្គ្រោះជាតិដើម្បីឱ្យលោកកឹម សុខា សុំទោសចំពោះពាក្យសម្ដីដែលគាត់និយាយកន្លងមក ។
លោកជុំ ម៉ី បានបន្ថែមថា គោលបំណងនៃការធ្វើសន្និសីទសារព័ត៌មានលើកទី២នេះគឺដើម្បីបង្ហាញថា លោកកឹម សុខា មិនបានមកសុំទោសចំពោះអ្នករងគ្រោះនៅក្នុងរបបប្រល័យពូជសាសន៍តាមការទាមទារពីសន្និសីទលើកមុននោះទេ ។ ការនិយាយរបស់លោកកឹម សុខា បានធ្វើឱ្យប៉ះពាល់ផ្លូវចិត្តមនុស្សជាច្រើន សូម្បីប្រជាជនខ្មែរដែលរស់នៅឯបរទេសក៏មិនសុខចិត្តនឹងពាក្យសម្ដីនេះដែរ ហើយពួកគេសូមចូលរួមសោកស្ដាយ និងចូលរួមការឈឺចាប់ដែលអ្នកនយោបាយមួយរូបហ៊ាននិយាយបែបនេះ ហើយពួកគេសូមគាំទ្រទាំងស្រុងក្នុងការធ្វើមហាបាតុកម្មនាពេលខាងមុខ ។
លោកជុំ ម៉ី បញ្ជាក់ថា ហេតុអ្វីបានជាលោកកឹម សុខា ហ៊ាននិយាយថា គុកទួលស្លែងជាកន្លែងសិប្បនិម្មិត ? ឬក៏លោកកឹម សុខា គាត់ធ្លាប់រស់នៅកន្លែងហ្នឹងបានជាគាត់ដឹង ?« ខ្ញុំចង់ឱ្យកឹម សុខា ដែលនិយាយថា សំឡេងគាត់ត្រូវកាត់តមកនិយាយទល់មុខខ្ញុំ ដោយមានអ្នកច្បាប់មកជាមួយផងថាតើសំឡេងគាត់ត្រូវកាត់តមែនឬមិនមែន ? ពាក្យដែលលោកកឹម សុខា និយាយបែបនេះ ពិតជាឈឺចាប់ខ្លាំងណាស់ វាប្រៀបដូចជាដំបៅដែលជិតជាហើយបានក្លាយរើឡើងវិញ ។ ជនរងគ្រោះនៅក្នុងរបបប្រល័យពូជសាសន៍៣ឆ្នាំ៨ខែ ២០ថ្ងៃមានការឈឺចាប់ណាស់ ចុះហេតុអ្វីលោកកឹម សុខានិយាយដូចជាមិនដឹងអ្វីសោះ » ។
លោក ជុំ មីុ បានបន្ថែមថា ចំពោះការធ្វើមហាបាតុកម្មនៅពេលខាងមុខនេះមិនមានពាក់ព័ន្ធនឹងនយោបាយទេ គឺជាការធ្វើឡើងដោយកំហឹងចិត្តជនរងគ្រោះនៅក្នុងរបបប្រល័យពូជសាសន៍ ហើយពួកគាត់បានរស់រានមានជីវិតឡើងវិញ ។ លោកបន្តថា លោកនឹងប្តឹងលោក កឹម សុខា ទៅសាលាក្តីខ្មែរក្រហមពីបទនិយាយមិនពិត និងបង្កាច់បង្ខូច ព្រោះគាត់ចង់បំបាត់ប្រវត្តិសាស្ត្រខ្មែរ ។
លោក ម៉ន សុធា ដែលជាជនរងគ្រោះនៅក្នុងរបបខ្មែរក្រហមដែរបានមានប្រសាសន៍ក្នុងសន្និសីទសារព័ត៌មាននេះដែរថា លោកមានការឈឺចាប់ខ្លាំងណាស់ដែលអ្នកនយោបាយគឺលោក កឹម សុខា និយាយកាឡៃប្រវត្តិសាស្ត្រដ៏សែនឈឺចាប់ក្នុងរបបខ្មែរក្រហម ដែលប្រជាពលរដ្ឋខ្មែរគ្រប់រូបសុទ្ធតែបានឆ្លងកាត់ បានដឹង និងមិនចង់ ជួប ។ លោក ម៉ន សុធា បន្តថា រូបលោកត្រូវបានរបបខ្មែរក្រហមធ្វើបាបវេទនាយ៉ាងខ្លាំង ហើយរបបខ្មែរក្រហមបានសម្លាប់ឪពុកម្តាយ និងប្អូនប្រុសលោកថែមទៀត ។ «ដូច្នេះខ្ញុំមិនសុខចិត្តទេ ខ្ញុំតស៊ូធ្វើយ៉ាងណាឱ្យលោក កឹម សុខា មកសុំទោសដល់វិញ្ញាណក្ខន្ធអ្នកដែលបានស្លាប់ក្នុងរបបខ្មែរក្រហម និងអ្នកនៅរស់រានមានជីវិតសព្វថ្ងៃនេះ» ។
ជាចុងក្រោយ លោក ជុំ មីុ បញ្ជាក់ថា ដោយសារតែថ្ងៃនេះរយៈពេល១០ថ្ងៃ ដែលទុកឱ្យលោក កឹម សុខា សុំទោស វាបានហួសកំណត់ទៅហើយ ហើយលោក កឹម សុខា នៅតែមិនសុំទោសទៀត ដូច្នេះលោកសូមប្រកាន់ជំហរថា នឹងបន្តការទាមទារឱ្យអ្នកនយោបាយរូបនេះទទួលខុសត្រូវចំពោះការនិយាយតែផ្តេសតែផ្តាសថា គុកទួលស្លែងជាគុកសិប្បនិម្មិត ផ្ទុយពីប្រវត្តិសាស្ត្រដែលកើតមានឡើងនៅទីនេះ ។ យើងឃើញហើយថា នៅទីនេះមានរូបខ្ញុំផ្ទាល់ ក្មួយនង ក្មួយចាន់ថុល ក្មួយស្រីជិន ម៉េត សុទ្ធតែជាអ្នករស់រានមានជីវិតពីមន្ទីរស-២១ ហើយយើងទាំងអស់គ្នាសុទ្ធតែជាជនរងគ្រោះ ។ យើងបានចូលរួមជាមួយតុលាការខ្មែរក្រហម ដើម្បីស្វែងរកការពិត និងយុត្តិធម៌រហូតមេគុកទួលស្លែងត្រូវបានកាត់ទោសជាប់ពន្ធនាគារអស់មួយជីវិត យើងក៏បានទទួលយុត្តិធម៌ និងទទួលបានសំណងផ្លូវចិត្តផងដែរ ។
លោក ជុំ មីុ បន្ថែមថា ឌុច ធ្វើខុសបានសារភាពទទួលកំហុស និងទទួលខុសត្រូវក្នុងនាមជាមេគុក រីឯលោក កឹម សុខា ដែលជាមេបក្សស្តីទី១រូបដែរ បែរជាកំសាកមិនហា៊នទទួលខុសត្រូវ ។ ផ្ទុយទៅវិញបែរជាប្រកែកយ៉ាងដាច់អហង្ការមិនទទួលស្គាល់សម្តីរបស់ខ្លួន ហើយខិតខំបង្វែររឿងបុគ្គលដែលធ្វើខុសទៅជារឿងផ្សេងដែលដុតរោលកម្ដៅដល់រូបលោក និងជនរងគ្រោះដទៃទៀតឱ្យឡើងកម្ដៅកាន់តែខ្លាំងឡើងៗ ។ លោក ជុំ មីុ បញ្ជាក់ថា ចំពោះការសុំធ្វើមហាបាតុកម្មនៅថ្ងៃទី៩ មិថុនា ខាងមុខ លោកនឹងដាក់ពាក្យសុំទៅសាលារាជធានីភ្នំពេញ និងក្រសួងមហាផ្ទៃ នៅពេលឆាប់ៗនេះ ។
ជុំវិញការមិនមានវត្តមានរបស់លោកប៊ូ ម៉េង ដែលជាអតីតអ្នករងគ្រោះនៅមន្ទីរស-២១ ក្នុងរបបកម្ពុជាប្រជាធិបតេយ្យដែរ និងជាអនុប្រធានសមាគមជនរងគ្រោះក្នុងរបបកម្ពុជាប្រជាធិបតេយ្យ«ក្សេមក្សាន្ត» កាលពីថ្ងៃទី៣ មិថុនា លោកបានប្រកាសថា ក្នុងករណីដែលលោកជុំ ម៉ី ប្រកាសធ្វើបាតុកម្មប្រឆាំងលោកកឹម សុខា នោះ គឺលោកធ្វើក្នុងនាមផ្ទាល់របស់គាត់មិនមែនតាងនាមសមាគមក្សេមក្សាន្តឡើយ ។
ក្នុងរឿងនេះទៀតលោកបានប្រកាសហើយប្រកាសទៀតថា លោកនៅអព្យាក្រឹត ហើយនឹងមិនចូលរួមក្នុងបាតុកម្មនោះ ទេ ។ សមាគមក្សេមក្សាន្តមានគោលការណ៍ផ្សះផ្សាជាតិ មិនមានគោលការណ៍បំបែកបំបាក់ជាតិទេ ។ លោកប៊ូ ម៉េងបានប្រកាសថា លោកសូមធ្វើសេចក្ដីថ្លែងការណ៍ជាលាយលក្ខណ៍អក្សរនេះព្រោះលោកធ្លាប់បានប្រកាសជាញឹកញយថា លោកនៅអព្យាក្រឹត ប៉ុន្តែនៅតែមានពាក្យចចាមអារា៉មថា លោកនឹងចូលរួមធ្វើបាតុកម្ម ។
មុននេះ លោកកឹម សុខា បានប្រកាសថា លោកមិនសុំទោសទេ ព្រោះមិនបាននិយាយអ្វីដែលខុសហើយបានសង្ស័យថា សំឡេងរបស់លោកដែលនិយាយនោះត្រូវបានកាត់ត ។ ទោះបីជាបែបណា បញ្ហានេះរីករាលដាលកាន់តែធំហើយ មួយវិញទៀតនោះរដ្ឋសភាក៏បានប្រកាសពីកិច្ចប្រជុំវិសាមញ្ញរបស់ខ្លួននៅថ្ងៃទី៧ មិថុនា ខាងមុខនេះដែរដើម្បីពិភាក្សាអនុម័តសេចក្ដីស្នើច្បាប់ស្ដីពីការប្រឆាំងការមិនទទួលស្គាល់ឧក្រិដ្ឋកម្មក្នុងរយៈកាលនៃកម្ពុជាប្រជាធិបតេយ្យ ៕
ចែករំលែកព័តមាននេះ