រាជធានីភ្នំពេញ ៖ ក្នុងន័យចែករំលែកមេរៀនដ៏សែនជូរចត់ក្នុងរបបខ្មែរក្រហមជូនជនរួមជាតិ និងអន្ដរជាតិទាំងបច្ចុប្បន្ន និងអនាគត មន្ដ្រីការទូតមួយរូបបានសហការជាមួយអ្នកសារព័ត៌មានកម្ពុជាចងក្រងសៀវភៅថ្មីដែលមានចំណងជើងថា «របបមច្ចុរាជ» ដែលមានទាំងភាសាខ្មែរ និងភាសាអង់គ្លេសមានកម្រាស់ជាង១០០ទំព័រ ចេញផ្សាយជាផ្លូវការ កាលពីថ្ងៃទី៣ មិថុនា ឆ្នាំ២០១៣
រាជធានីភ្នំពេញ ៖ ក្នុងន័យចែករំលែកមេរៀនដ៏សែនជូរចត់ក្នុងរបបខ្មែរក្រហមជូនជនរួមជាតិ និងអន្ដរជាតិទាំងបច្ចុប្បន្ន និងអនាគត មន្ដ្រីការទូតមួយរូបបានសហការជាមួយអ្នកសារព័ត៌មានកម្ពុជាចងក្រងសៀវភៅថ្មីដែលមានចំណងជើងថា «របបមច្ចុរាជ» ដែលមានទាំងភាសាខ្មែរ និងភាសាអង់គ្លេសមានកម្រាស់ជាង១០០ទំព័រ ចេញផ្សាយជាផ្លូវការ កាលពីថ្ងៃទី៣ មិថុនា ឆ្នាំ២០១៣ ។ លោកឡុង កែម ឯកអគ្គរាជទូតកម្ពុជា ប្រចាំរដ្ឋគុយវែតបានចងក្រងសៀវភៅមួយក្បាលនោះ ហើយបានស្នើឱ្យលោកឆាយ សុផល ជាអ្នកសារព័ត៌មានដែលមានបទពិសោធន៍ក្នុងការសរសេរព័ត៌មាន និងការសរសេរសៀវភៅជួយកែសម្រួល និងបន្ថែមខ្លឹមសារ និងរូបថតដើម្បីឱ្យសៀវភៅជាប្រវត្ដិសាស្រ្ដនេះមានលក្ខណៈជាវិជ្ជាជីវៈ និងសមស្របតាមស្ដង់ដាសៀវភៅ ។
ថ្លែងនៅក្នុងសន្និសីទសារព័ត៌មានដែលធ្វើឡើងនៅក្លឹបអ្នកកាសែតកម្ពុជា កាលពីថ្ងៃទី៣ មិថុនា ឆ្នាំ២០១៣ លោកឆាយ សុផល ឱ្យដឹងថា សៀវភៅ «របបមច្ចុរាជ» ជាសៀវភៅថ្មីមួយទៀតដែលជាស្នាដៃរបស់អ្នកនិពន្ធ និងកែសម្រួលដោយផ្ទាល់របស់ជនរងគ្រោះជាជនជាតិកម្ពុជា ដោយមិនមានការកែសម្រួលពីជនបរទេសឡើយ ។ មានអ្នកនិពន្ធជាច្រើនជាជនជាតិខ្មែររស់នៅបរទេស និងជនជាតិបរទេសបានសរសេរសៀវភៅស្ដីពីអំពើដ៏សែនយង់ឃ្នងព្រៃផ្សៃរបស់ពួកខ្មែរក្រហមធ្វើឱ្យមនុស្សស្លាប់ជិត២លាននាក់ ដោយសារការសម្លាប់ ការធ្វើទារុណកម្ម ការបង្អត់អាហារ និងការធ្វើការបាក់កម្លាំង ក្នុងចន្លោះឆ្នាំ១៩៧៥ដល់១៩៧៩ ។
នាថ្ងៃ១៧ មេសា ឆ្នាំ១៩៧៥ ការចាកចេញពីភ្នំពេញដោយតក់ក្រហល់ ហើយមានជីវភាពថ្មីដោយមានការងារចម្លែកៗរបស់អង្គការលើដែនដីបដិវត្ដន៍ ការកប់មនុស្សក្នុងរណ្ដៅរួម ការត្រៀមខ្លួនរបស់លោកក្នុងការធ្វើអត្ដឃាតជាមួយកូនប្រុស និងការបាត់បង់ជីវិតប្អូនថ្លៃ និងក្មួយលើទឹកដីបដិវត្ដន៍ ។ លោកឡុង កែម បានសរសេរនៅក្នុងទំព័រថ្លែងអំណរគុណថា «ដោយមានបំណងរួមចំណែកក្នុងការរក្សាទុកព្រឹត្ដិការណ៍មួយចំនួនដែលបានកើតមានក្នុងជីវិតខ្ញុំផ្ទាល់ និងជាមរតកបន្សល់ទុកសម្រាប់អនុជនជំនាន់ក្រោយ ខ្ញុំសូមឧទ្ទិសនូវសមិទ្ធផលនេះឱ្យទៅជាកម្លាំងជំរុញស្មារតីស្នេហាជាតិ ការពារនូវបូរណភាពទឹកដីដ៏ពិសិដ្ឋរបស់កម្ពុជា ឱ្យបានគង់វង្ស រីកចម្រើនជាអមតៈ និងជាការការពារកុំឱ្យស្រមោលអតីតកាល ដូចរបបមច្ចុរាជនេះកើតមានឡើងវិញជាដាច់ខាត» ។
លោកឡុង កែម បន្ដថា «ដើម្បីចៀសវាងគ្រោះមហន្ដរាយបែបនេះដល់សង្គមជាតិជាលើកទី២ យើងជាកុលបុត្រ កុលធីតាខ្មែរត្រូវតែខិតខំរៀនសូត្រ ស្រាវជ្រាវផ្ដល់ចំណេះដឹងឱ្យខ្លួន គ្រួសារ និងសង្គមជាតិ ។ បើសង្គមយើងសម្បូរដោយបញ្ញវន្ដ នោះពួកគេនឹងជួយប្រទេសជាតិអភិវឌ្ឍ ជួយដល់អ្នកដឹកនាំឱ្យមានបញ្ញាញាណក្នុងការស្វែងរកមាគា៌ល្អ សម្រាប់ដឹកនាំឱ្យបានសមស្រប និងសេចក្ដីប៉ងប្រាថ្នារបស់ប្រជាជន ។ លោកឆាយ សុផល បានកោតសរសើរដល់លោកឡុង កែម បើទោះបីជាលោកមមាញឹកក្នុងការងារការទូតក៏ដោយ តែលោកបានឆ្លៀតពេលចងក្រងសៀវភៅដែលជាឯកសារប្រវត្ដិសាស្រ្ដដ៏មានតម្លៃនេះ សម្រាប់មនុស្សជំនាន់ក្រោយសិក្សាស្វែងយល់ ៕
ចែករំលែកព័តមាននេះ