រាជធានីភ្នំពេញ ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា កាលពីថ្ងៃទី៣ ខែមិថុនា ឆ្នាំ២០១៣ បានអញ្ជើញចូលរួមក្នុងពិធីបើកការប្រកួតកីឡាបាល់ទាត់ពានរង្វាន់មិត្តភាពយុវជនអន្តរក្រសួង-ស្ថាប័នលើកទី១ ឆ្នាំ២០១៣ នៅទីលានបាល់ទាត់រ៉ាម៉ាហ្វូតបលក្លិប ។
រាជធានីភ្នំពេញ ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា កាលពីថ្ងៃទី៣ ខែមិថុនា ឆ្នាំ២០១៣ បានអញ្ជើញចូលរួមក្នុងពិធីបើកការប្រកួតកីឡាបាល់ទាត់ពានរង្វាន់មិត្តភាពយុវជនអន្តរក្រសួង-ស្ថាប័នលើកទី១ ឆ្នាំ២០១៣ នៅទីលានបាល់ទាត់រ៉ាម៉ាហ្វូតបលក្លិប ។
ពានរង្វាន់បាល់ទាត់មិត្តភាពយុវជនអន្តរក្រសួង-ស្ថាប័ននេះបង្កើតឡើងក្នុងគោលបំណងលើកកម្ពស់ស្មារតីសាមគ្គីភាព មិត្តភាព និងពង្រីកកិច្ចសហប្រតិបត្តិការដែលជាការចូលរួមចំណែកយ៉ាងសំខាន់ក្នុងការជំរុញទឹកចិត្តឱ្យយុវជនលេងកីឡា ដើម្បីសុខភាពល្អមាំមួនទាំងផ្លូវកាយ ទាំងផ្លូវចិត្ត ទន្ទឹមគ្នានឹងការផ្តល់ឱកាសដល់យុវជនក្នុងការបញ្ចេញនូវសមត្ថភាព និងទេពកោសល្យរបស់ខ្លួននៅក្នុងវិស័យកីឡា ។
លោក ហ៊ុន ម៉ានី មានប្រសាសន៍ថា ការប្រកួតកីឡានេះជាការផ្តល់ឱកាសថ្មីមួយទៀតឱ្យយុវជនមកពីបណ្តាក្រសួង-ស្ថាប័ននានាដែលមានមុខងារ និងវិជ្ជាជីវៈផ្សេងគ្នាក្នុងព្រះរាជាណាចក្រកម្ពុជាបានជួបជុំគ្នា បង្កើត បង្កើន និងពង្រីកចំណងមិត្តភាពក្នុងចំណោមយុវជន ព្រមទាំងស្វែងយល់ពីគ្នាទៅវិញទៅមកដើម្បីក្លាយទៅជាបណ្តាញទំនាក់ទំនងមួយរួបរួមគ្នាក្នុងការបង្កើតបរិយាកាសស្និទ្ធស្នាល ចេះអត់ឱនអធ្យាស្រ័យ និងគោរពគ្នាទៅវិញទៅមក ទោះក្នុងលក្ខណៈជាបុគ្គលក្តី ជាលក្ខណៈក្រុម ឬស្ថាប័នក្តី ពោលគឺសុទ្ធសឹងជាវត្ថុបំណងដ៏ល្អ និងសុច្ចរិតនៃការរៀបចំការប្រកួតកីឡានេះឡើង ។
លោកបញ្ជាក់ថា សហភាពសហព័ន្ធយុវជនកម្ពុជាជឿជាក់ថា ការលេងកីឡារបស់យុវជន ក៏នឹងរួមចំណែកប្រើប្រាស់ពេលវេលាទំនេរពីការងាររបស់ខ្លួនមកលេងកីឡា ជាជាងយកពេលវេលាទៅប្រព្រឹត្តអំពើអបាយមុខណាមួយ។ ក្នុងស្មារតីនេះហើយដែលសហភាពសហព័ន្ធយុវជនកម្ពុជា ដែលពីមុនជាសមាគមយុវជនកម្ពុជា បានរៀបចំការប្រកួតពានរង្វាន់សុកឃ័រលីកឆ្នាំ២០១២ ដែលនាពេលនោះជាការប្រកួតរវាងក្រុមកីឡាករដែលមិនមែនជាអាជីព ឬជំនាញបាល់ទាត់ឡើយ ប៉ុន្តែគ្រាន់តែបានឆ្លងកាត់ការហ្វឹកហាត់មួយចំនួនតាមភាពអំណោយផលជាក់ស្តែងនៃពេលវេលា ដែលមានគោលបំណងតែមួយដូចគ្នាទៅនឹងស្មារតីនៃគណៈកម្មការរៀបចំការប្រកួតកីឡាមិត្តភាព យុវជនអន្តរក្រសួង-ស្ថាប័ននាពេលនេះផងដែរ។
លោកសង្ឃឹមថា តំណាងកីឡាករទាំង៨ស្ថាប័ន ក៏ដូចជាអ្នកពាក់ព័ន្ធទាំងអស់នៅក្នុងការប្រកួតដណ្តើមពានរង្វាន់មិត្តភាពយុវជនអន្តរក្រសួង-ស្ថាប័ន នឹងចូលរួមប្រកួតដោយក្តីរីករាយ ប្រកួតប្រជែងឱ្យអស់ពីសមត្ថភាពដោយសុច្ចរិតភាព និងភាពអធ្យាស្រ័យខ្ពស់ ៕
ចែករំលែកព័តមាននេះ