រាជធានីភ្នំពេញ ៖ ប្រធានសភាពាណិជ្ជកម្មអឺរ៉ុប បានអះអាងថា នៅដើមឆ្នាំ២០១៩ខាងមុខនេះ ក្រុមវិនិយោគិនមកពីអឺរ៉ុប នឹងមកបណ្តាក់ទុនវិនិយោគនៅកម្ពុជាកាន់ច្រើនថែមទៀត ដោយសារតែការប្រកួតប្រជែងស្មើភាពគ្នា ប្រកបដោយតម្លាភាព និងប្រសិទ្ធភាព…
រាជធានីភ្នំពេញ ៖ ប្រធានសភាពាណិជ្ជកម្មអឺរ៉ុប បានអះអាងថា នៅដើមឆ្នាំ២០១៩ខាងមុខនេះ ក្រុមវិនិយោគិនមកពីអឺរ៉ុប នឹងមកបណ្តាក់ទុនវិនិយោគនៅកម្ពុជាកាន់ច្រើនថែមទៀត ដោយសារតែការប្រកួតប្រជែងស្មើភាពគ្នា ប្រកបដោយតម្លាភាព និងប្រសិទ្ធភាព ។
ថ្លែងនៅក្នុងវេទិកាស្តីពីពន្ធដារ ដែលរៀបចំឡើងដោយសភាពាណិជ្ជកម្មអឺរ៉ុប (EUROCHAM) កាលពីថ្ងៃទី២៥ ខែតុលា កន្លងមកលោក Arnaud Darc ប្រធានសភាពាណិជ្ជកម្មអឺរ៉ុបប្រចាំនៅកម្ពុជា បានលើកឡើងថា តាមរយៈការកែទម្រង់គោលនយោបាយ និងរដ្ឋបាលសារពើពន្ធរបស់អគ្គនាយកដ្ឋនាពន្ធដារ កំពុងទទួលបានការចាប់អារម្មណ៍ពីវិនិយោគិនអឺរ៉ុប ។ លោកបន្ដថា ៖« ការគាំទ្រដល់វិស័យឯកជនក្នុងការពង្រីកនូវការប្រកួតប្រជែងស្មើភាពគ្នា ប្រកបដោយតម្លាភាព ស័ក្តសិទ្ធភាព និងសមធម៌ ក្នុងចំណោមសហគ្រាសទាំងឡាយ ទាំងសហគ្រាសអ្នកជាប់ពន្ធតូច អ្នកជាប់ពន្ធមធ្យម និងអ្នកជាប់ពន្ធធំជាដើម គឺជាកត្តាជំរុញឲ្យវិនិយោគិនមកពីអឺរ៉ុបចាប់អារម្មណ៍វិនិយោគនៅកម្ពុជា »។
បច្ចុប្បន្ននេះ ក្រុមហ៊ុនមកពីបណ្តាប្រទេសជាសមាជិកសហគមន៍អឺរ៉ុបប្រមាណ៥០០ បាននិងកំពុងវិនិយោគនៅកម្ពុជាដែលភាគច្រើនជាក្រុមហ៊ុនបម្រើសេវាកម្មផ្សេងៗ ហើយពួកគេភាគច្រើនមកពីបារាំង អុីតាលី និងអាល្លឺម៉ង់ជាដើម ។
គួររំឭកផងដែរ កាលពីពេលថ្មីនេះ ក្រុមអ្នកវិនិយោគមកពីអឺរ៉ុបមួយក្រុមបានមកស្វែងរកចាប់ដៃគូវិនិយោគលើវិស័យបដិសណ្ឋារកិច្ចនៅកម្ពុជា ។ ថ្លែងនាឱកាសនោះ លោក Christian Puchher នាយកប្រចាំទ្វីបអាស៊ីនៃសណ្ឋាគារHilton បានឲ្យដឹងថា លោកគ្រោងនឹងចាប់ដៃគូជាមួយក្រុមហ៊ុនក្នុងស្រុក ដើម្បីវិនិយោគលើសណ្ឋាគារនាពេលខាងមុខឆាប់ៗនេះនៅប្រទេសកម្ពុជា ។ លោកបន្ដថា ៖« ជាមួយនឹងប្រាក់ចំណូលកើនឡើង និងភាពងាយស្រួលនៃការធ្វើដំណើរតាមយន្តហោះ ភ្ញៀវទេសចរនិងអ្នកជំនួញ បរទេសជាច្រើន ត្រូវបានទាក់ទាញមកកាន់ប្រទេសកម្ពុជា »។
លោក Kevin Beauvais ស្ថាបនិក និងជាអគ្គនាយកនៃក្រុមហ៊ុន Invision Hospitality បានឲ្យដឹងផងដែរថា លោកមានជំនឿយ៉ាងមុតមាំចំពោះប្រទេសកម្ពុជា ហើយរីករាយក្នុងការធ្វើការងារជាមួយអ្នកអភិវឌ្ឍន៍ក្នុងតំបន់ ។ លោកបន្តថា ៖« ជាមួយនឹងការរីកចម្រើននៃវិស័យបដិសណ្ឋារកិច្ចនៅកម្ពុជា យើងនឹងវិនិយោគនៅទីនេះនាពេលអនាគត »។
ចំណែកនាយកគ្រប់គ្រងនៃក្រុមហ៊ុន Savills Hotels លោក Mauro Gasparotti បានថ្លែងផងដែរថា ភាពលូតលាស់យ៉ាងឆាប់រហ័សនៅក្នុងវិស័យបដិសណ្ឋារកិច្ចនៅកម្ពុជា នឹងជំរុញនូវការអភិវឌ្ឍផ្នែកសណ្ឋាគារនាថ្ងៃអនាគត ដែលនាំមកនូវឱកាសថ្មីដ៏សំខាន់សម្រាប់អតិថិជន »។ លោកបន្តថា ៖« ការប្រើប្រាស់សក្តានុពលរបស់ប្រទេស ដែលមានប្រវត្តិសាស្ត្រវប្បធ៌មដ៏រឹងមាំ និងផ្តល់នូវតំបន់បេតិកភ័ណ្ឌដ៏សម្បូរបែប យើងជឿជាក់យ៉ាងមុតមាំថា ប្រទេសកម្ពុជាអាចដើរតាមគន្លងប្រទេសថៃ និងវៀតណាម ដើម្បីក្លាយជាទិសដៅទេសចរណ៍នៅថ្ងៃឈប់សម្រាក ដែលត្រូវបានទទួលស្គាល់ជាសាកល »៕
ចែករំលែកព័តមាននេះ