ខេត្តកំពត ៖ គ្រោះថ្នាក់ចរាចរណ៍រវាងម៉ូតូបុកជាមួយម៉ូតូ ក្នុងទិសដៅបញ្ជ្រាសទិសគ្នា បណ្តាលឱ្យបុរស២នាក់រងរបួសធ្ងន់ ។ ហេតុការណ៍ខាងលើនេះកើតឡើងកាល ពីវេលាម៉ោង៦និង៥០នាទីព្រឹកថ្ងៃទី២៨ ខែតុលា ឆ្នាំ២០១៨នៅត្រង់ចំណុចកំណាត់ផ្លូវលេខ៧៣៥…
ខេត្តកំពត ៖ គ្រោះថ្នាក់ចរាចរណ៍រវាងម៉ូតូបុកជាមួយម៉ូតូ ក្នុងទិសដៅបញ្ជ្រាសទិសគ្នា បណ្តាលឱ្យបុរស២នាក់រងរបួសធ្ងន់ ។
ហេតុការណ៍ខាងលើនេះកើតឡើងកាល ពីវេលាម៉ោង៦និង៥០នាទីព្រឹកថ្ងៃទី២៨ ខែតុលា ឆ្នាំ២០១៨នៅត្រង់ចំណុចកំណាត់ផ្លូវលេខ៧៣៥ តាមបណ្តោយឆ្នេរព្រែកកំពង់បាយស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត។
ប្រភពសមត្ថកិច្ចចរាចរខេត្តបានឲ្យដឹងថា ភាគីម៉ូតូមួយគ្រឿងធុនសេ១២៥ ពណ៌ខ្មៅ ស៊េរី២០១៥ មានដឹកមាន់ ដែលបើកបរដោយឈ្មោះសើ ភីអ៊ីន ភេទប្រុស អាយុ២៨ឆ្នាំ ជាខ្មែរអ៊ិស្លាម រស់នៅភូមិកំពង់កណ្តាល ឃុំជុំគ្រៀល ស្រុកទឹកឈូ ខេត្តកំពត បានរងរបួសធ្ងន់សន្លប់នៅកន្លែងកើតហេតុ ។ ចំណែកភាគីម្ខាងទៀតជិះម៉ូតូធំប្រភេទច្នៃ មិនស្គាល់ម៉ាក និងគ្មានស្លាកលេខ បើកបរដោយបុរសជាជនជាតិបរទេសម្នាក់ មិនស្គាល់អត្តសញ្ញាណ បានរងរបួសត្រង់ភ្នែកម្ខាង។
តាមប្រភពពីសាក្សីដែលឃើញហេតុការណ៍បានឱ្យដឹងថា មុនពេលកើតហេតុ បានឲ្យសមត្ថកិច្ចចរាចរណ៍ដឹងថា នៅ មុនពេលកើតហេតុ គេឃើញម៉ូតូធំមិនស្គាល់ម៉ាកជិះដោយជនបរទេសម្នាក់ធ្វើដំណើរមកពីទិសខាងកើតយ៉ាងលឿន លុះមកដល់ផ្លូវកែងម៉ូតូនោះបានបត់មកខាងឆ្វេងដៃដោយមិនបានបន្ថយល្បឿននោះទេគឺបើកបរក្នុងល្បឿនលឿនហើយរោទិ៍ម៉ាស៊ីនឡើងរំពងទៀតផង។
ដោយសារតែបត់ផ្លូវកែងមិនបង្អង់ ក៏បានបុកជាមួយម៉ូតូធុនសេ១២៥ ពណ៌ខ្មៅ ស៊េរី២០១៥ ដែលបើកបរដោយបុរសខ្មែរអ៊ិស្លាមយ៉ាងពេញទំហឹង បណ្តាលឲ្យម៉ូតូធុនសេ១២៥រងការខូចខាតកង់ឡើងលេខ៨ ហើយមាន់ដែលដឹកលើម៉ូតូជ្រុះ រប៉ាត់រប៉ាយពេញផ្លូវ រីឯអ្នកបើកបររងរបួសធ្ងន់សន្លប់ ។
ចំណែកភាគីម៉ូតូរបស់ជនបរទេសគ្រាន់តែដាច់កញ្ចក់ ហើយអ្នកបើកបររងរបួសបែកភ្នែកម្ខាងធ្ងន់ធ្ងរ ហើយក៏ត្រូវបានសមត្ថកិច្ចយកប្រង់ការពេទ្យដែលនៅក្បែរនោះ សែងចូលមន្ទីរពេទ្យដើម្បីជួយសង្គ្រោះភ្លាមៗដែរ។
ក្រោយពេលកើតហេតុ ម៉ូតូទាំងពីរគ្រឿងត្រូវបានសមត្ថកិច្ចចរាចរខេត្តយកទៅរក្សាទុកនៅការិយាល័យចរាចរផ្លូវគោកស្នងការដ្ឋាននគរបាលខេត្តរង់ចាំភាគីទាំង២ចូលទៅដោះស្រាយតាមផ្លូវច្បាប់៕
ចែករំលែកព័តមាននេះ