រាជធានីភ្នំពេញ ៖ ក្រុមប្រឹក្សាយុវជនអាស៊ី សហការជាមួយសហភាពសហព័ន្ធយុវជនកម្ពុជា បានរៀបចំប្រារព្ធបើកវេទិកាយុវជនអាស៊ីឆ្នាំ២០១៣ ក្រោមប្រធានបទ«យុវជននិង សន្តិភាព៖ ការពង្រឹងសន្តិភាព ស្ថិរភាព និងការអភិវឌ្ឍតាមរយៈការអប់រំ » ដើម្បីឆ្លុះបញ្ចាំងពីការប្តេជ្ញាចិត្តទាំងអស់គ្នាចំពោះតួនាទីយ៉ាងសំខាន់របស់យុវជន ក្នុងការកសាងវប្បធម៌សន្តិភាព និងការអភិវឌ្ឍនៅទូទាំងពិភពលោក ។
វេទិកាយុវជនអាស៊ីឆ្នាំ២០១៣ នេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី៣១ឧសភា នៅសណ្ឋាគារអាំងទែរកុងទីណង់តាល់ ដោយមានការអញ្ជើញចូលរួមពីគណៈប្រតិភូយុវជនមកពី២៤ប្រទេសនៅលើពិភពលោក និងសមាជិកក្រុមប្រឹក្សាយុវជនអាស៊ី ដូចជាម៉ាឡេស៊ី កម្ពុជា ចិន ប្រ៊ុយណេ សាធារណរដ្ឋកូរ៉េ ម៉ុងហ្គោលី …ជាដើម ដែលពិធីនេះប្រារព្ធធ្វើចាប់ពីថ្ងៃទី៣១ ឧសភា ដល់ថ្ងៃទី២ មិថុនា ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍៍បើកវេទិកាយុវជនអាស៊ីឆ្នាំ២០១៣ នេះ ថា វេទិកាយុវជនអាស៊ីនាថ្ងៃនេះបានប្រារព្ធឡើង នៅក្នុងប្រទេសមួយដែលធ្លាប់បានឆ្លងកាត់សង្គ្រាមរាំុំរ៉ៃ ការកាប់សម្លាប់រង្គាលនៃរបបប្រល័យពូជសាសន៍ និងការបែកបាក់ផ្ទៃក្នុងជាច្រើនទសវត្សដែលកើតចេញពីការបញ្ជ្រាបនិងបំពាក់ពីសំណាក់មជ្ឈដ្ឋានខាងក្រៅមកក្នុងសង្គមកម្ពុជានូវមនោគមវិជ្ជានៃនយោបាយសង្គ្រាមត្រជាក់ ។
សម្តេចតេជោ ហ៊ុន សែន មានប្រសាសន៍បន្តថា ទម្រាំបានទទួលនូវសន្តិភាព ការបង្រួបបង្រួមជាតិ និងភាពសុខដុមរមនាពេញលេញដូចពេលនេះ ទឹកដីនិងប្រជាជាតិដ៏កម្សត់មួយនេះបានឆ្លងកាត់នូវការបាត់បង់ ទុក្ខវេទនា និងសោកនាដកម្មដ៏ធំធេងនិងច្រើនលើសលប់ ដែលមិនអាចនឹងពណ៌នាឱ្យអស់សេចក្តីបាន ។ រហូតមកដល់ពេលនេះ ថ្វីដ្បិតថាប្រទេសនិងប្រជាជនកម្ពុជាទាំងមូលសម្រេចបាននូវសុខសន្តិភាព និងការបង្រួបបង្រួមជាតិដ៏ពេញលេញនៅក្រោមដំបូលរដ្ឋធម្មនុញ្ញតែមួយ ព្រះមហាក្សត្រតែមួយអង្គ និងរាជរដ្ឋាភិបាលតែមួយក៏ពិតមែន ក៏ប៉ុន្តែ ប្រជាជាតិយើងនៅមិនទាន់អាចជម្នះរួចផុតទាំងស្រុងនៅឡើយទេ នូវផលវិបាកអាក្រក់នានាដែលជាស្លាកស្នាម និងកាកសំណល់ទាំងជារូបវ័ន្ត ទាំងជាអរូបវ័ន្ត នៃសង្គ្រាមរ៉ាំរ៉ៃ និងសោកនាដកម្មពីអតីតកាលថ្មីៗកន្លងមកនេះ ។
ដូច្នេះបទពិសោធន៍នៃការកសាងសន្ដិភាពក៏ដូចជាការបង្រួមបង្រួមជាតិ និងផ្សះផ្សាជាតិរបស់កម្ពុជា បានមកជាមួយនឹងការបង់ថ្លៃខ្ពស់ណាស់ ។ អាស្រ័យហេតុនេះ ខ្ញុំសូមវាយតម្លៃខ្ពស់ចំពោះប្រធានបទដ៏មានសារសំខាន់នៃវេទិកាយុវជនអាស៊ីឆ្នាំ២០១៣ នេះ ដែលឆ្លុះបញ្ចាំងឱ្យឃើញយ៉ាងប្រត្យក្សអំពីបទពិសោធន៍របស់ប្រទេសមួយចំនួននៅក្នុងតំបន់ដូចជា ប្រទេសកម្ពុជាជាដើម ហើយក៏ផ្សារភ្ជាប់យ៉ាងស្អិតរមួត ទៅនឹងចរន្តបច្ចុប្បន្នភាពរបស់ពិភពលោកដែលជាកម្មវត្ថុនៃការយកចិត្តទុកដាក់ខ្ពស់សម្រាប់ស្រទាប់យុវជនផងដែរ ។
បន្ថែមពីលើនេះ ខ្ញុំមានមោទនភាពដោយឃើញយុវជនយុវនារីនៃបណ្ដាប្រទេសអាស៊ីជាច្រើនកំពុងតែរួមគ្នាធ្វើសកម្មភាពយ៉ាងក្លៀវក្លាដើម្បីគោលដៅសន្ដិភាព វឌ្ឍនភាព និងវិបុលភាពទាំងសម្រាប់សង្គមជាតិរបស់ខ្លួននីមួយៗ ទាំងសម្រាប់តំបន់ និងសាកលលោកដ៏ធំទូលាយ ។ នេះគឺជាស្មារតីពិតនៃកិច្ចសហប្រតិបត្តិការ និងភាពជាដៃគូដែលត្រូវចាក់ឫសគល់ក្នុងស្រទាប់យុវជនដែលជាកម្លាំងស្នូលក្នុងការអភិវឌ្ឍប្រទេសជាតិនីមួយៗក្នុងពេលអនាគត ។
សម្ដេចតេជោនាយករដ្ឋមន្ត្រីបានសម្តែងនូវជំនឿជឿជាក់ថា វេទិកាយុវជនអាស៊ីឆ្នាំ២០១៣នេះ បានសម្រេចជ្រើសរើសយកប្រធានបទគោលដ៏មានសារសំខាន់គឺ«យុវជន និងសន្ដិភាព៖ ការពង្រឹងសន្ដិភាព ស្ថិរភាព និងការអភិវឌ្ឍតាមរយៈការអប់រំ» មកធ្វើជាកម្មវត្ថុនៃការពិភាក្សាដោយក្រសោបបញ្ចូលនូវអនុប្រធានបទមួយចំនួនរួមមាន ១- ការលះបង់ដើម្បីបានសន្ដិភាពមេរៀន និង២-តួនាទីរបស់យុវជនក្នុងការរក្សាសន្ដិភាព និងស្ថិរភាពតាមរយៈការអប់រំនៅក្នុងបរិស្ថាននៃការផ្លាស់ប្ដូរយ៉ាងឆាប់រហ័ស ។
ទាក់ទិននឹងប្រធានបទខាងលើនេះ សម្តេចតេជោ ហ៊ុន សែន គូសបញ្ជាក់ថា ការជ្រើសរើសប្រធានបទនេះគឺពិតជាត្រឹមត្រូវ ចាំបាច់ចំពេលវេលានៅក្នុងបរិការណ៍ដែលពិភពលោកកំពុងរងការគំរាមពីលទ្ធភាពនៃការផ្ទុះឡើងនៃចលនា និងសង្គ្រាមស៊ីវិលនៅតាមប្រទេស និងតំបន់នានាជាច្រើន ។ ខ្ញុំសង្ឃឹមថា ការចែករំលែកនូវការចងចាំ និងបទពិសោធន៍ផ្ទាល់ខ្លួនរបស់ខ្ញុំ ពិតជាអាចចូលរួមចំណែកបានមួយផ្នែកផងដែរដល់ការពិភាក្សារបស់អង្គវេទិកាលើប្រធានបទគោល និងអនុប្រធានបទទី១ ស្តីពីការដកស្រង់មេរៀនពីការលះបង់ដើម្បីសន្តិភាព ។
ដោយឡែកសម្រាប់ប្រធានបទទី២ សម្តេចតេជោ ហ៊ុន សែន បានបង្ហាញថា បទពិសោធន៍ពីបដិវត្តន៍អារ៉ាប់ថ្មីៗនេះ និងសង្គ្រាមស៊ីវិលដែលកំពុងតែកើតឡើងនាពេលបច្ចុប្បន្ននៅតាមតំបន់មួយចំនួនដែលពិបាករំពឹងថាអាចនឹងចប់នាពេលណានោះ នឹងអាចជួយរំលឹកដាស់តឿនដល់យុវជនគ្រប់រូបឱ្យចាំជានិច្ចអំពីកាតព្វកិច្ចរបស់ខ្លួន និងអំពីសារសំខាន់ក្នុងការរក្សាការពារនូវដើមឈើសន្តិភាពដែលកំពុងតែផ្តល់ផលដល់យើងទាំងអស់គ្នានាពេលនេះ និងក្នុងអនាគត ។
សម្តេចតេជោ ហ៊ុន សែន ក្រើនរំលឹកថា ការលង់អារម្មណ៍ដោយមិនបានពិចារណាគ្រប់ជ្រុងជ្រោយទៅលើវោហារសាស្ត្រ និងទិសស្លោកនយោបាយដែលគ្មានការទទួលខុសត្រូវ ហើយភាគច្រើនត្រូវបាននាំចូលពីមជ្ឈដ្ឋានខាងក្រៅមកនោះ អាចនឹងនាំមកនូវគ្រោះថ្នាក់ដ៏ធំធេងដល់សង្គមជាតិទាំងមូលសម្រាប់រយៈកាលវែងទៅមុខ ។
ប្រសិនបើយុវជនបន្តវេនជំនាន់បច្ចុប្បន្នមិនមានជំហររឹងមាំទេនោះ ផ្លែផ្កានៃសន្តិភាព និងការអភិវឌ្ឍដែលយុវជនជំនាន់មុនសម្រេចបាននាពេលកន្លងមក អាចនឹងត្រូវរលាយបាត់បង់អស់ទៅវិញក្នុងរយៈពេលតែមួយប៉ប្រិចភ្នែក ហើយប្រទេសជាតិនឹងអាចធ្លាក់ចូលទៅក្នុងរណ្តៅនៃអស្ថិរភាពដូចជាសង្គ្រាមស៊ីវិលដែលបាននិងកំពុងកើតមានឡើងនៅក្នុងពិភពអារ៉ាប់ និងអាហ្វ្រិកខាងជើងដូច្នេះដែរ ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងថា វេទិកាយុវជនអាស៊ីឆ្នាំ២០១៣ ប្រព្រឹត្តទៅក្នុងពេលវេលាមួយដែលប្រជាជន និងព្រះរាជាណាចក្រកម្ពុជាទាំងមូលកំពុងទទួលផលនៃសេចក្តីសប្បាយរីករាយ សុខសន្តិភាពពេញបរិបូរណ៍ ស្ថិរភាពនយោបាយ និងវិបុលភាពផ្នែកសេដ្ឋកិច្ច សង្គមគ្រប់វិស័យ និងជឿជាក់ថា លោក លោកស្រីជាប្រតិភូបរទេសដែលធ្លាប់បានមកទស្សនកិច្ចរាជធានីភ្នំពេញ កាលពី២០ ឬ១០ឆ្នាំមុន លោក លោកស្រី ពិតជានឹងសង្កេតឃើញថា រាជធានីភ្នំពេញនាពេលបច្ចុប្បន្នបានប្រែមុខមាត់ និងរីកចម្រើនលូតលាស់ក្នុងល្បឿនមួយយ៉ាងលឿន ។
សមិទ្ធផលជាក់ស្តែងដែលមើលឃើញនាពេលបច្ចុប្បន្ននេះ គឺជាលទ្ធផលដែលបានមកក្រោមការដឹកនាំដ៏ប៉ិនប្រសប់ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ជាពិសេសនយោបាយឈ្នះ-ឈ្នះ នៅឆ្នាំ១៩៩៨ ដែលសម្រេចបាននូវឯកភាពទឹកដីកម្ពុជា បង្រួបបង្រួមជាតិសាសន៍ខ្មែរតែមួយ និងសុខសន្តិភាពពេញលេញ បន្ទាប់ពីប្រទេសនេះបានឆ្លងកាត់សង្គ្រាមបំផ្លិចបំផ្លាញ ភាពប្រទូស្តរា៉យ និងអរិភាពជាច្រើនទសវត្សរ៍ ។
លោកហ៊ុន មា៉នី បន្តថា សម្តេចតេជោនាយករដ្ឋមន្ត្រី មិនត្រឹមតែបាននាំមកនូវសន្តិភាពពេញលេញជូនប្រជាជនកម្ពុជាប៉ុណ្ណោះទេ ប៉ុន្តែថែមទាំងបានលើកតម្កើង និងរំលេចកិត្យានុភាពជាតិនៃព្រះរាជាណាចក្រកម្ពុជា តាមរយៈការចូលរួមដោយស្មើសិទ្ធិ និងស្មើភាពជាមួយបណ្តាប្រទេសនានានៅលើពិភពលោក ចំពោះរាល់កិច្ចការគ្រប់វិស័យទាំងក្នុងកម្រិតតំបន់ និងកម្រិតអន្តរជាតិ ដែលយុវជនជំនាន់ក្រោយសូមចងចាំ និងថែរក្សាជានិច្ចនូវស្នាដៃដ៏ឆ្នើមទាំងនេះ ។
លោក ហ៊ុន ម៉ានី ថ្លែងទៀតថា វេទិកាយុវជនអាស៊ីឆ្នាំ២០១៣ គឺជាវេទិកាចែករំលែកចំណេះដឹង និងផ្លាស់ប្តូរព័ត៌មានក្នុងចំណោមប្រទេសជាសមាជិក នូវប្រធានបទដ៏មានសារសំខាន់ផ្សេងៗជាច្រើន ។ នៅឆ្នាំ២០០៦ ក្រុមប្រឹក្សាយុវជនអាស៊ីបានរៀបចំវេទិកាយុវជនអាស៊ី ដោយជោគជ័យនៅទីក្រុងបាតាំ នៃសាធារណរដ្ឋឥណ្ឌូណេស៊ី ក្រោមប្រធានបទ «គោលដៅអភិវឌ្ឍន៍សហស្សវត្សរ៍ តើអនាគតសម្រេចបានឬទេ ? ។ ឆ្នាំ២០០៧ វេទិកាយុវជនអាស៊ី ប្រារព្ធបានធ្វើនៅសាធារណរដ្ឋប្រជាមានិតចិន ដោយបានលើកទឹកចិត្តដល់យុវជនឱ្យប្រកាន់យកស្មារតីសហគ្រិន ក្រោមប្រធានបទ «អាស៊ីក្នុងដំណើរវិវត្តន៍យុវជនប្រកបដោយសហគ្រិនភាព»។
ដោយឡែក សម្រាប់ឆ្នាំ២០១៣នេះ ក្រុមប្រឹក្សាយុវជនអាស៊ី បានសម្រេចរៀបចំវេទិកាយុវជនអាស៊ី ក្រោមប្រធានបទ «យុវជន និងសន្តិភាព ៖ ការពង្រឹងសន្តិភាព ស្ថិរភាព និងការអភិវឌ្ឍតាមរយៈការអប់រំ» ដែលដំណើរការទន្ទឹមគ្នានឹងសន្និបាតប្រចាំឆ្នាំរបស់ក្រុមប្រឹក្សាយុវជនអាស៊ី នៅរាជធានីភ្នំពេញ ព្រះរាជាណាចក្រកម្ពុជា ៕
ចែករំលែកព័តមាននេះ