ខេត្តរតនៈគិរី ៖ ឱពុកចុងបានចាប់រំលោភកូនដើមរហូតសំរេច៤ដង ហើយត្រូវជនរងគ្រោះប្រាប់បងនាងឱ្យប្តឹងប៉ូលិសស្រុកកូនមុំ ចាប់ខ្លួនជនសង្ស័យជាឱពុកចុង កាលពីម៉ោង៥និង៥៣ នាទីល្ងាច ថ្ងៃទី០៩ ខែតុលា ឆ្នាំ២០១៨ គឺចាប់នៅផ្ទះជនសង្ស័យតែម្តង។
បើតាមរបាយការណ៍សមត្ថកិច្ចស្រុកកូនមុំបានឱ្យដឹងថា ជនសង្ស័យខាងលើឈ្មោះ ជា វិន អាយុ៤៨ឆ្នាំ មុខរបរកសិករ ជាឱពុកចុងនារីរងគ្រោះអាយុ១៥ឆ្នាំ រស់នៅស្រុកកូនមុំ។
ក្នុងករណីខាងលើនេះសមត្ថកិច្ចស្រុក ឱ្យដឹងបន្តថា នៅថ្ងៃកើតហេតុនោះ គឺថ្ងៃបុណ្យភ្ជុំបិណ្ឌ ហើយម្តាយនារីរងគ្រោះអត់បាននៅផ្ទះទេ គឺនាំកូនៗ៣ទៅ៤នាក់ទៀតទៅលេងស្រុកកំណើតបាត់អស់ ដោយទុកនារីរងគ្រោះជាកូនស្រីទី២ ឲ្យនៅផ្ទះតែពីរនាក់ឱពុកចុង ។ ឆ្លៀតមានឱកាសល្អបែបនេះ ឱពុកចុងចាប់អូសដៃនាងចូលទៅក្នុងផ្ទះ ហើយឱ្យនារីរងគ្រោះដេកក្បាលមកសំដៅមាត់ទ្វារ ហើយបើកមាត់ទ្វារផ្ទះតូចល្មមទុកសម្រាប់មើលក្រែងមានអ្នកភូមិមកទាន់។
សមត្ថកិច្ចស្រុកបន្តទៀតថា ពេលឱពុកចុងរំលោភរួច បានគំរាមកំហែងនាងថា បើហ៊ានប្រាប់នរណាម្នាក់បន្តទៀត គេសម្លាប់ចោលមួយពូជ ។
នារីរងគ្រោះបានបញ្ជាក់ប្រាប់សមត្ថកិច្ចទៀតថា ឱពុកចុងធ្លាប់រំលោភនាងក្នុងឆ្នាំ២០១៨នេះ បានសំរេច៤លើករួចមកហើយ នាងក៏ធ្លាប់ប្រាប់ម្តាយអំពីរឿងនេះញឹកញាប់ដែរ ក៏ប៉ុន្តែម្តាយធ្វើប្រងើយ ទើបចុងក្រោយនេះនារីរងគ្រោះសម្រេចចិត្តនាំរឿងខាងលើ ទៅប្រាប់អ្នកភូមិ និងបងស្រីនាង ។ ពេលអ្នកភូមិ និងបងស្រីដឹងបែបនេះ ក៏នាំគ្នាទៅប្តឹងសមត្ថកិច្ចស្រុកកូនមុំ ឱ្យចាប់ខ្លួនតែម្តង ។
សមត្តកិច្ច ប្រាប់បន្តទៀតថា នៅពេលចុះចាប់ខ្លួននោះ ជនសង្ស័យបានដឹងខ្លួន ហើយជនសង្ស័យមានបំណងចង់រត់គេចខ្លួន តែសមត្ថកិច្ចមានគ្នាច្រើន ទើបរត់គេចខ្លួនអត់រួច ហើយនៅពេលសមត្ថកិច្ចចាប់ខ្លួនជនសង្ស័យបាន ក៏ស្រែកប្រាប់ប្រជាការពារថា «ចាំមើលអញ់ចេញពីគុកវិញ អញ់សម្លាប់ក្រុមគ្រួសារនាងឯងចោលទាំងអស់»។
ក្រោយពីសមត្ថកិច្ចឃាត់ខ្លួនបាន ជនសង្ស័យឆ្លើយសារភាពថា ខ្លួនពិតជាបានចាប់រំលោភកូនចុងពិតប្រាកដមែន។ ហើយបច្ចុប្បន្ននេះ ជនសង្ស័យត្រូវបានសមត្ថកិច្ចកសាងសំណុំរឿងបញ្ជួនទៅតុលាការខេត្តនៅព្រឹកថ្ងៃទី១២ ខែតុលា ឆ្នាំ១០៨ រួចរាល់អស់ហើយ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ