ខេត្តកំពង់ចាម ៖ នារសៀលថ្ងៃទី០៨ តុលា ២០១៨ ឃាតកលាក់មុខពិតជាសាហាវណាស់ ដោយបានឆក់យកអាយុជីវិតរបស់ពលរដ្ឋ បន្តបន្ទាប់ដល់ទៅ០៥នាក់ និងរងរបួសចំនួន០៤នាក់ នៅក្នុងហេតុការណ៍គ្រោះថ្នាក់ចរាចរណ៍ ដែលបានកើតឡើងនៅលើផ្លូវជាតិលេខ៦ ក្នុងឃុំបាធាយ និងឃុំផ្អាវ ស្រុកបាធាយ ហើយអ្នករងរបួសត្រូវបានគេបញ្ជូនមកសង្គ្រោះនៅ មន្ទីរពេទ្យបង្អែកស្រុកផងដែរ ។
លោកវរសេនីយ៍ត្រី សុខ សូល អធិការរងនគរបាលស្រុកបាធាយ ទទួលផែនសណ្តាប់ធ្នាប់ប្រាប់ថា ករណីគ្រោះថ្នាក់ចរាចរណ៍ទី០១ បានកើតឡើងនៅវេលាម៉ោង៣ និង៣៥នាទីរសៀល ថ្ងៃខាងលើត្រង់ចំណុចខាងជើងស្ពានលេខ៣១ ក្នុងភូមិបាធាយ ឃុំបាធាយ ស្រុកបាធាយ ដោយម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ កណ្តាល 1X-7965 បើកបរដោយឈ្មោះ សាំង គឹមសៀន ភេទប្រុស អាយុ២៥ឆ្នាំ នៅភូមិព្រែកអញ្ចាញ ឃុំព្រែកថ្មី ស្រុកមុខកំពូល ខេត្តកណ្តាល ដោយមានឌុបមនុស្សចំនួន ៣នាក់ បានជិះទៅបុកគោយន្តកន្ត្រៃ ពីខាងក្រោយក្នុងទិសដៅពីត្បូងទៅជើងទិសដៅស្របគ្នា។
ហេតុការណ៍នេះបណ្តាលឲ្យអ្នកបើកបរម៉ូតូស្លាប់២នាក់ ក្មេងប្រុសតូច បេង ធារ៉ា អាយុ៩ឆ្នាំ(ស្លាប់) នៅភូមិគោករវៀង ឃុំខ្នុរដំបងស្រុកជើងព្រៃ ខេត្តកំពង់ចាម។ ចំណែកអ្នករងរបួស២នាក់វិញមានឈ្មោះ ផល សុខលាភ ភេទប្រុស អាយុ២៣ឆ្នាំ នៅភូមិព្រែកអញ្ចាញ ឃុំព្រែកថ្មី ស្រុកមុខកំពូល ខេត្តកណ្តាល ២-ឈ្មោះ រ៉ន រុន ភេទប្រុស អាយុ២៣ឆ្នាំ នៅភូមិជាមួយនឹងអ្នកទី១ដែរ។ មូលហេតុគ្រោះថ្នាក់នេះដោយ សារតែអ្នកបើកបរម៉ូតូខ្វះការប្រុងប្រយ័ត្ន ទើបបណ្តាលឲ្យទៅបុកគោយន្តពីក្រោយ ហើយអ្នកបើកបរ គោយន្ត ឈ្មោះ ធន់ ពៅ ភេទប្រុស អាយុ២៩ឆ្នាំ នៅភូមិទួលដំណាក់ ឃុំចុងដូង ស្រុកបាធាយ ខេត្តកំពង់ធំ មិនរងរបួសនោះទេ។
លោកវរសេនីយ៍ត្រី សុខ សូល អធិការរងនគរបាលស្រុកបាធាយ ប្រាប់បន្តថា ចំពោះករណីទី២វិញ កើតឡើងនៅវេលាម៉ោង៤ និង២០នាទីល្ងាច ថ្ងៃទី០៨ តុលា ២០១៨ ត្រង់ចំណុចផ្លូវបំបែកជាបួន ភូមិផ្អាវ ឃុំផ្អាវ ស្រុកបាធាយ មានករណីគ្រោះថ្នាក់ចរាចរណ៍បានកើតឡើង រវាងរថយន្តឡិចស៊ីសពណ៌ស្ករ ពាក់ស្លាកលេខ ភ្នំពេញ 2M-6417 បើកបរដោយឈ្មោះ ស៊ីម ស៊ាន់ ភេទប្រុស អាយុ៤៦ឆ្នាំ មានស្រុកកំណើតនៅស្រុកកំពង់សៀម ខេត្តកំពង់ចាម បានបើកបរក្នុងទិសដៅ ពីជើងទៅត្បូង។ ដោយបានរេចង្កូតទៅឆ្លងផ្លូវចូលទៅម្ខាងទៀតបុកជាមួយនឹងរថយន្តធុនធំ ម៉ាកហ៊ីយ៉ានដាយ ពាក់ស្លាកលេខ សៀមរាប 3A-2455 បើកបរដោយឈ្មោះ គិន វ៉ាន់ធី ភេទប្រុស អាយុ៣៥ឆ្នាំ នៅភូមិស្វាយទាប ឃុំស្វាយទាប ស្រុកចម្ការលើ ខេត្តកំពង់ចាម ក្នុងទិសដៅពីត្បូងទៅជើង ដោយបានបុកគ្នាលាន់ដូចរន្ទះ។
ករណីទី២នេះ បណ្តាលឲ្យស្លាប់មនុស្សដែលជិះលើរថយន្តឡិចស៊ីស ចំនួន០៣នាក់ ១-ឈ្មោះ ហង់ សារ៉េត ភេទស្រី អាយុ៤៥ឆ្នាំ (ប្រពន្ធអ្នកបើកបរ) ២-ស៊ីម វិច្ឆិកា ភេទប្រុស អាយុ១៧ឆ្នាំ (ជាកូន) ៣-ស៊ីម កុសល ភេទប្រុស អាយុ១៨ឆ្នាំ(កូន)។ ចំណែកអ្នករងរបួសមាន០២នាក់ ១-អ្នកបើកបររថយន្តឡិចស៊ីស ត្រូវស្រាល ២-តន់ ចាន់តូ ភេទប្រុស អាយុ១៣ឆ្នាំ ត្រូវជាក្មួយអ្នកបើកបរ របួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ។
សមត្ថកិច្ចមូលដ្ឋានបញ្ជាក់ថា «អ្នករថយន្តឡិចស៊ីស កំពុងតែបើកនៅលើដងផ្លូវជាតិលេខ៦ ស្រាប់តែមានម៉ូតូ០១គ្រឿងបានជិះឆ្លងពីខាងមុខត្រង់ផ្លូវបំបែក ជាបួនស្របពេលដែលរថយន្តបានប្រឹងគេចក៏ចូលរថយន្តធំលាន់ជាខ្លាំងដោយបានផ្ទុះពោងសុវត្ថិភាព ហើយរថយន្តរងការខូចខាតជាដំណំបណ្តាលឲ្យស្លាប់ភ្លាមៗដល់ទៅ០៣នាក់»។ វត្ថុតាងទាំង០២ករណី ត្រូវបានសមត្ថកិច្ចនាំមករក្សាទុកនៅអធិការដ្ឋាននគរបាលស្រុកបាធាយ ដើម្បីរង់ចាំដោះស្រាយតាមច្បាប់ ៕
ចែករំលែកព័តមាននេះ