រាជធានីភ្នំពេញ ៖ ស្ត្រីចំណាស់ម្នាក់ត្រូវបានគេប្រទះឃើញចងកសម្លាប់ខ្លួននៅលើដើមស្វាយ១ដើម បង្កឲ្យមានការភ្ញាក់ផ្អើលយ៉ាងខ្លាំង។ ក្រោយពេលកើតហេតុខាងក្រុមគ្រួសារសាច់ញាតិ និងអ្នកភូមិបានរារាំង មិនឲ្យអ្នកក្រៅចូលទៅជិតឡើយ។ សូម្បីតែមន្ត្រីកងរាជអាវុធហត្ថខណ្ឌពោធិ៍សែនជ័យក៏មិនត្រូវបានអនុញ្ញាត ឲ្យចូលទៅពិនិត្យដែរ គឺមានតែនគរបាលប៉ុស្តិ៍ភ្លើងឆេះរទេះប៉ុណ្ណោះដែលបានចូលទៅពិនិត្យមើល និងធ្វើកំណត់ហេតុប្រគល់សាកសពឲ្យទៅក្រុមគ្រួសារនាំយកទៅធ្វើបុណ្យ។
ហេតុការណ៍នោះបានកើតឡើង កាលពីវេលាម៉ោង២ និង២០នាទីរសៀល ថ្ងៃទី០៣ ខែតុលា ឆ្នាំ២០១៨ នៅចំការស្វាយលើទួលនាយក ស្ថិតនៅភូមិភ្លើងឆេះរទេះលិច សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ។ ស្ត្រីខាងលើនោះមានឈ្មោះ ហែន ណាវី អាយុ៥២ឆ្នាំ មានស្រុកកំណើតនៅក្នុងភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពងស្ពឺ សព្វថ្ងៃស្នាក់នៅខាងប្ដីក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ។
អ្នកដឹងហេតុការណ៍បានលួចបង្ហើប្រាប់ថា ស្ត្រីខាងលើបានយកខ្សែគោចងកជាប់នឹងមែកស្វាយ បណ្ដាលឲ្យស្លាប់ និងជើងស្ទើរតែដល់ដីថែមទៀតផង។ ចំណែកឯមូលហេតុដែលគាត់ចងកសម្លាប់ខ្លួនពិតប្រាកដនោះ មិនត្រូវបានដឹងច្បាស់ឡើយ។ គ្រាន់តែដឹងខ្លះៗថាគាត់តូចចិត្តនឹងខ្លួនឯងដែលមានជំងឺប្រចាំកាយតែប៉ុណ្ណោះ តែមិនបានដឹងថាជំងឺអ្វីនោះទេ ហើយបន្ទាប់ពីបាត់គាត់ក្រុមគ្រួសារតាមរកឃើញគាត់ចងកស្លាប់បែបនេះ បាត់ទៅហើយ។
ទាក់ទិនទៅនឹងហេតុការណ៍នោះក្រុមគ្រួសារសពមិនបានប្ដឹងអ្វីឡើយ គឺសុំឲ្យតែនគរបាលប៉ុស្តិ៍ ភ្លើងឆេះរទេះ ជួយចេញលិខិតសម្រាប់នាំសពទៅធ្វើបុណ្យបូជាប៉ុណ្ណោះ។ ព្រោះបើគ្មានលិខិតអនុញ្ញាតពីនគរបាល ពួកគាត់ក៏មិនអាចនាំយកសពទៅបូជាបានដែរ។ មិនតែប៉ុណ្ណោះ ខណៈនោះដែរក្រុមគ្រួសារសាច់ញាតិ និងអ្នកភូមិបានដាក់រាយកម្លាំងជុំវិញកន្លែងកើតហេតុបានរារាំងមិនឲ្យអ្នកក្រៅចូលទៅជិតឡើយ។ សូម្បីតែមន្ត្រីកងរាជអាវុធ ហត្ថខណ្ឌពោធិ៍សែនជ័យក៏មិនត្រូវបានអនុញ្ញាតឲ្យចូលទៅពិនិត្យដែរ៕
ចែករំលែកព័តមាននេះ