រាជធានីភ្នំពេញ ៖ ខណៈរដូវកាន់បិណ្ឌ និងបុណ្យភ្ជុំបិណ្ឌចូលមកដល់ ប្រជាពលរដ្ឋកម្ពុជាដែលតែងគោរពប្រណិប័តន៍ និងប្រកាន់ខ្ជាប់នូវវប្បធម៌ ប្រពៃណី និងទំនៀមទម្លាប់ដ៏ល្អផូរផង់ បាននាំគ្នាធ្វើចង្ហាន់ និងទិញគ្រឿងឧបភោគបរិភោគ ព្រមទាំងទេយ្យទាននានា ទៅកាន់វត្តអារាមដែលនៅជិតលំនៅឋានគ្រប់ៗគ្នា ។
ក្នុងនោះ គេសង្កេតឃើញនៅតាមផ្សារ ហាងលក់គ្រឿងទេស និងគ្រឿងទេយ្យទាននានាពោរពេញដោយមនុស្សម្នាក់ទៅទិញផលិតផលតាមសេចក្ដីតម្រូវការផងដែរ ។ ទោះជាយ៉ាងនេះក្ដី បើតាមអាជីវករលក់គ្រឿងទេយ្យទានមួយចំនួនបាននិយាយថា នៅរដូវបុណ្យភ្ជុំបិណ្ឌឆ្នាំនេះ ការលក់គ្រឿងសម្ភារសម្រាប់ប្រគេនព្រះសង្ឃ ដូចជា សាដក និងត្រៃ ជាដើមនោះ ហាក់មានការថមថយជាងឆ្នាំមុនបន្ដិច ។
អ្នកស្រី រនៈ សុថា ម្ចាស់ហាងរនៈសុថា បានឲ្យដឹងថា ឆ្នាំនេះការលក់សម្ភារថ្វាយព្រះសង្ឃ ដូចជាសាដកជាដើមនោះ មានការថយចុះជាងឆ្នាំមុនៗ ។ តួយ៉ាងមកដល់ថ្ងៃបិណ្ឌទី៨នេះ អ្នកស្រីទើបលក់បានប្រហែល៣០ប្រអប់ប៉ុណ្ណោះ ។ អ្នកស្រីបន្ដថា ៖« កាលពីឆ្នាំមុន ចប់មួយរដូវបុណ្យភ្ជុំបិណ្ឌ ខ្ញុំអាចលក់បានប្រហែល១០០ប្រអប់ តែនៅឆ្នាំនេះវិញមិនរំពឹងនោះទេ ព្រោះមកដល់ថ្ងៃបិណ្ឌទី៨ហើយ ខ្ញុំទើបតែលក់បាន២០ទៅ៣០ប្រអប់ប៉ុណ្ណោះ »។ អ្នកស្រីបញ្ជាក់ថា ៖« ការថយចុះនេះ មិនមែនមានន័យថា ពលរដ្ឋមិននាំគ្នាទៅវត្តនោះទេ តែដោយសារកំណើននៃហាងលក់កើនឡើងច្រើន »។ អ្នកស្រីថា ៖« សូម្បីតែនៅក្បែរវត្តអារាមមួយចំនួន និងតាមផ្លូវសំខាន់មួយចំនួននៅក្នុងភ្នំពេញ ក៏មានហាងលក់ដែរ អីចឹងហើយទើបបានជាទីផ្សារត្រូវចែករំលែកគ្នា ហើយអតិថិជនមិននៅប្រមូលផ្ដុំតែមួយកន្លែង » ។
ស្រដៀងគ្នានេះដែរ អ្នកស្រី ឌួង ស្រីនាង អាជីវករលក់គ្រឿងសក្ការៈបូជា និងគ្រឿងទេយ្យទានសម្រាប់ព្រះសង្ឃ បានឲ្យដឹងដែរថា ក្នុងរដូវភ្ជុំបិណ្ឌរាល់ឆ្នាំ អ្នកស្រីលក់សាដកបានប្រមាណ១០០ថាស ហើយសាដកប្រអប់បានពី៥០ទៅ៦០ តែឆ្នាំនេះចូលដល់ថ្ងៃបិណ្ឌទី៨ហើយ អ្នកស្រីទើបតែលក់បានជាង៤០ថាស និងសាដកប្រអប់បានជាង១០ប៉ុណ្ណោះ ។ អ្នកស្រីបន្ដថា ៖« ការលក់ឆ្នាំនេះ ពិតជាមានការថយចុះ ដោយសារខ្ញុំសង្កេតឃើញថាមានគេលក់ច្រើននៅតាមដងផ្លូវ និងក្បែរវត្តអារាមមួយចំនួនក៏មានអ្នកវេចខ្ចប់លក់ដែរ។ អីចឹងហើយបានជាអតិថិជនមានជម្រើសច្រើន »។
បើតាមអ្នកស្រី ឌួង ស្រីនាង ទោះជាឆ្នាំនេះការលក់ថមថយបន្តិចក្តី ប៉ុន្តែតម្លៃមិនឡើងថ្លៃនោះទេ ពោលគឺដូចឆ្នាំមុនៗដដែល ។ អ្នកស្រីថា ៖« តម្លៃសាដក គឺទៅតាមការវេចខ្ចប់សម្ភារ និងទំហំ គឺមានចន្លោះចាប់ពី១៥.០០០រៀល រហូតដល់៦ម៉ឺនរៀលក៏មានដែរ »៕
ចែករំលែកព័តមាននេះ