រាជធានីភ្នំពេញ ៖ អាជ្ញាធររាជធានីភ្នំពេញស្នើឲ្យគ្រប់ខណ្ឌសង្កាត់ និងនគរបាលប៉ុស្តិ៍ត្រូវយកចិត្តទុកដាក់ឃ្លាំមើល និងមានវិធានការយ៉ាងម៉ឺងម៉ាត់បំផុត ចំពោះជនដែលបានដើរបិទស្ទីកគ័រ ឬចងបដា តាមបង្គោលភ្លើង ,ដើមឈើ ,…
រាជធានីភ្នំពេញ ៖ អាជ្ញាធររាជធានីភ្នំពេញស្នើឲ្យគ្រប់ខណ្ឌសង្កាត់ និងនគរបាលប៉ុស្តិ៍ត្រូវយកចិត្តទុកដាក់ឃ្លាំមើល និងមានវិធានការយ៉ាងម៉ឺងម៉ាត់បំផុត ចំពោះជនដែលបានដើរបិទស្ទីកគ័រ ឬចងបដា តាមបង្គោលភ្លើង ,ដើមឈើ , របងអាគារ ការរដ្ឋាន និងចែកខិតប័ណ្ណតាមភ្លើងស្តុបត្រូវធ្វើការអប់រំ ឬតម្រូវឲ្យធ្វើកិច្ចសន្យាចំពោះមុខសមត្ថកិច្ចឲ្យបានច្បាស់លាស់ ព្រមទាំងតម្រូវឲ្យចុះប្រមូលឲ្យបានស្អាតនូវសម្ភារដែលបានបង្កឲ្យបាត់បង់សោភណ្ឌភាព និងរបៀបរៀបរយសង្គម ។
ក្នុងករណីមិនរាងចាលត្រូវធ្វើការផាកពិន័យទៅតាមស្ថានទម្ងន់ទោសដែលសាមីជនបានប្រព្រឹត្ត ឬផ្អាកអាជីវកម្ម បើក្នុងករណីធ្ងន់ធ្ងរត្រូវបញ្ជូនខ្លួនទៅតុលាការតែម្តង ។ អនុវត្តតាមចំណាររបស់លោក ឃួង ស្រេង អភិបាលរាជធានីភ្នំពេញ និងកំណត់ហេតុនៃកិច្ចប្រជុំស្តីពីការណែនាំ និងចាត់វិធានការលើការបិទស្ទីកគ័រ និងដាក់ផ្ទាំងផ្សព្វផ្សាយពាណិជ្ជកម្មអនាធិបតេយ្យនៅក្នុងភូមិសាស្ត្ររាជធានីភ្នំពេញ កាលពីថ្ងៃទី២៨ កញ្ញានេះ មន្ត្រីរដ្ឋបាលរាជធានីភ្នំពេញសហការជាមួយអាជ្ញាធរខណ្ឌទាំង១២ មន្ទីរព័ត៌មាន មន្ទីរវប្បធម៌ និងវិចិត្រសិល្បៈ និងក្រុមហ៊ុនផ្សព្វផ្សាយពាណិជ្ជកម្ម RKS បានចុះទៅបកស្ទីកគ័រ ដែលត្រូវគេបិទតាមបង្គោលភ្លើង ,ដើមឈើ ,របងអាគារ និងការរដ្ឋាននានា ដើម្បីលើកកម្ពស់សោភណ្ឌភាព និងសណ្តាប់ធ្នាប់ទីក្រុង ។
លោកស្រី ចន្ទ័ សុគន្ធា នាយិការទីចាត់ការអន្តរវិស័យរដ្ឋបាលរាជធានីភ្នំពេញបានឲ្យដឹងថា រដ្ឋបាលរាជធានីភ្នំពេញបានផ្សព្វផ្សាយសេចក្តីណែនាំក៏ដូចសេចក្តីជូនដំណឹងច្រើនលើកច្រើនសារ និងប្រើពេលយូរមកហើយ ប៉ុន្តែសង្កេតឃើញរូបភាពអនាធិបតេយ្យនេះ នៅតែកើតមានដដែល ។ ជាក់ស្តែងក្នុងកំណត់ហេតុនៃកិច្ចប្រជុំកាលពីថ្ងៃទីពុធ កន្លងមកនេះរដ្ឋបាលរាជធានីភ្នំពេញបានស្នើឲ្យក្រុមហ៊ុនដែលបានផ្សព្វផ្សាយពាណិជ្ជកម្មដោយគ្មានការអនុញ្ញាតទាំងអស់ ត្រូវរុះរើបដា និងបកស្ទីកគ័រចេញពីបង្គោលភ្លើង ,ដើមឈើជាដើមចេញឲ្យអស់ និងត្រូវបញ្ឈប់សកម្មភាពដើរបិទស្គីកគ័រ និងចងបដាផ្សព្វផ្សាយពាណិជ្ជកម្មបែបអនាធិបតេយ្យជាបន្តទៅទៀត ។
លោកស្រី ចន្ទ័ សុគន្ធា បានបញ្ជាក់ថា យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញបានប្រកាស និងជូនដំណឹងកន្លងមកហើយ គឺរដ្ឋបាលរាជធានីភ្នំពេញ ស្នើឲ្យអាជ្ញាធរគ្រប់លំដាប់ថ្នាក់រួមទាំងសាលាខណ្ឌ សង្កាត់ និងនគរបាលប៉ុស្តិ៍ត្រូវយកចិត្តទុកដាក់សហការឃ្លាំមើល និងមានវិធានការយ៉ាងម៉ឺងម៉ាត់បំផុត ចំពោះ ជនដែលបានប្រព្រឹត្តនូវសកម្មភាពដើរបិទស្ទីកគ័រ ឬចងបដាតាមបង្គោលភ្លើង ,ដើមឈើ,របងអាគារ និងការដ្ឋាន និងចែកខិតប័ណ្ណតាមភ្លើងស្តុបត្រូវធ្វើការអប់រំ ឬតម្រូវឲ្យធ្វើកិច្ចសន្យា ចំពោះមុខសមត្ថកិច្ចឲ្យបានច្បាស់លាស់ ព្រមទាំងតម្រូវឲ្យចុះប្រមូលឲ្យបានស្អាតនូវសម្ភារៈដែលបានបង្កឲ្យបាត់បង់សោភណ្ឌភាព និងរបៀបរៀបរយសង្គម ។
លោកស្រី បានបញ្ជាក់ថា សេចក្តីជូនដំណឹងដដែលនោះបានបញ្ជាក់ថា ក្នុងករណីមិនរាងចាលត្រូវធ្វើការផាកពិន័យទៅតាមស្ថានទម្ងន់ទោសដែលសាមីជនបានប្រព្រឹត្ត ឬផ្អាកអាជីវកម្មក្នុងករណីធ្ងន់ធ្ងរ ត្រូវបញ្ជូនខ្លួនទៅតុលាការតែម្តង ៕
ចែករំលែកព័តមាននេះ