ខេត្តស្ទឹងត្រែង ៖ រដ្ឋបាលខេត្តស្ទឹងត្រែងមានលោក ជា ថាវរិទ្ធ អភិបាលរងខេត្ត ដឹកនាំកម្លាំងប្រដាប់ អាវុធទាំង៣ប្រភេទ ចុះពិនិត្យស្ថានភាពជាក់ស្តែង និងឱ្យប្រជាពលរដ្ឋបញ្ឈប់ជាបន្ទាន់នូវសកម្មភាពកាប់រានដីព្រៃ…
ខេត្តស្ទឹងត្រែង ៖ រដ្ឋបាលខេត្តស្ទឹងត្រែងមានលោក ជា ថាវរិទ្ធ អភិបាលរងខេត្ត ដឹកនាំកម្លាំងប្រដាប់ អាវុធទាំង៣ប្រភេទ ចុះពិនិត្យស្ថានភាពជាក់ស្តែង និងឱ្យប្រជាពលរដ្ឋបញ្ឈប់ជាបន្ទាន់នូវសកម្មភាពកាប់រានដីព្រៃ មកធ្វើកម្មសិទ្ធផ្ទាល់ខ្លួន។ មន្ត្រីនៃមន្ទីរពាក់ព័ន្ធ កម្លាំងនគរបាល កងរាជអាវុធហត្ថ និងកម្លាំងយោធា បានទៅដល់ ចំណុចទីតាំងឆ្ការព្រៃ ដែលប្រជាពលរដ្ឋជាង២០០គ្រួសារ កំពុងធ្វើសកម្មភាព កាលពីវេលាព្រឹកថ្ងៃទី២១ ខែកញ្ញា ឆ្នាំ២០១៨ ក្នុងភូមិសាស្ត្រទំនប់វារីអគ្គិសនី សេសានក្រោម២ មានទីតាំងនៅភូមិស្តៅ ឃុំស្តៅ និងភូមិភ្លុក ឃុំភ្លុក ស្រុកសេសាន ខេត្តស្ទឹងត្រែង។
ប្រជាពលរដ្ឋម្នាក់ឈ្មោះ ប៊ុត សុខជា តំណាងខ្មែរឥស្លាម ដែលកំពុងកាន់កាប់ដីព្រៃ នៅចំណុចទីតាំងខាងលើបានឱ្យដឹងថា ក្រុមគាត់បានសំណើទៅថ្នាក់លើចំនួន៣.៥៨០ហិកតា ដើម្បីសង់លំនៅ ឋាន និងដីបង្កបង្កើនផល សម្រាប់ប្រជាពលរដ្ឋ៣៩២គ្រួសារ តែការរស់នៅជាក់ស្តែងមានតែ២៧៤ គ្រួសារប៉ុណ្ណោះ ហើយសង់លំនៅដ្ឋានសម្រេចរួចរាល់បាន២៣០គ្រួសារ។ ប្រជាពលរដ្ឋដដែលបានបន្តថា ការកាប់រានព្រៃនេះ គឺមានរយៈពេលជាង៣ខែហើយ ដែលគ្រួសារនីមួយៗកាប់តាមលទ្ធភាព ដែលអាចយកបាន ដោយមិនមានការហាមឃាត់ថា ត្រូវកំណត់ម្នាក់ប៉ុន្មានហិកតាឡើយ។
លោក ជា ថាវរិទ្ធ អភិបាលរងខេត្ត ដែលបានចុះពិនិត្យផ្ទាល់ មានប្រសាសន៍ថា លោកបានឃើញហើយលិខិតស្នើសុំបញ្ជូនមករដ្ឋបាលខេត្តស្ទឹងត្រែង ហើយក៏បានឃើញនៅចំណារភ្ជាប់ជាមួយលិខិតនោះដែរ តែចំណារនោះគឺឱ្យពិនិត្យលទ្ធភាពសិក្សា លើដីព្រៃទាំងនោះ។ មិនមែនចំណារឱ្យប្រជាពលរដ្ឋមកកាន់កាប់យ៉ាងអនាធិបតេយ្យនោះឡើយ ដោយគ្រួសារខ្លះ កាប់យកបានក្បាលដី ៥០ម៉ែត្រ បណ្តោយ១.០០០ម៉ែត្រ និងខ្លះក្បាលដី ៣០ម៉ែត្រ បណ្តោយ១.០០០ ម៉ែត្រ ស្រេចតែចិត្ត មិនមានការអនុញ្ញាតពីរដ្ឋបាលខេត្តនោះឡើយ។
លោក ជា ថាវរិទ្ធ បានមានប្រសាសន៍ នៅចំពោះមុខប្រជាពលរដ្ឋថា សុំឱ្យផ្អាកសកម្មភាពកាប់ទន្ទ្រានរុករានយកដី និងផ្អាកសកម្មភាព នាំមនុស្សចូលមកបន្ថែមទៀត ដើម្បីទុកលទ្ធភាពឱ្យរដ្ឋបាលខេត្តសិក្សា និងរកវិធានការដោះស្រាយ។ តែបើជនណាមួយនៅតែបន្តកាប់ព្រៃយកដី នៅចំណុចខាងលើនេះ គឺនឹងប្រើវិធានការ ដោយមិនបណ្តោយ ឱ្យកាប់ឆ្ការព្រៃក្លាយជាភូមិគ្មានច្បាប់អនុញ្ញាត បង្កើតជាតំបន់អនាធិបតេយ្យឡើយ៕
ចែករំលែកព័តមាននេះ