ខេត្តស្វាយរៀង ៖ កាលពីព្រឹកថ្ងៃទី ១៩ ខែកញ្ញាឆ្នាំ២០១៨នេះលោកម៉ែន វិបុល អភិបាលនៃគណៈអភិបាលខេត្តស្វាយរៀង បានដឹកនាំមន្ត្រីក្រោមឱវាទ និងកងកម្លាំងប្រដាប់អាវុធចុះធ្វើការទប់ច្រាំងថ្នល់ការពារទឹករលកបោកបក់មកលើផ្លូវក្រាលខ្សាច់ភ្នំមួយខ្សែចាប់ពីគល់ស្ពានបាយ៉ាបមកត្បូងប្រវែង៤០០ម៉ែត្រ។ តាមប្រភពព័ត៌មានពីមន្ត្រីសាលាខេត្តស្វាយរៀងបានឱ្យដឹងថា…
ខេត្តស្វាយរៀង ៖ កាលពីព្រឹកថ្ងៃទី ១៩ ខែកញ្ញាឆ្នាំ២០១៨នេះលោកម៉ែន វិបុល អភិបាលនៃគណៈអភិបាលខេត្តស្វាយរៀង បានដឹកនាំមន្ត្រីក្រោមឱវាទ និងកងកម្លាំងប្រដាប់អាវុធចុះធ្វើការទប់ច្រាំងថ្នល់ការពារទឹករលកបោកបក់មកលើផ្លូវក្រាលខ្សាច់ភ្នំមួយខ្សែចាប់ពីគល់ស្ពានបាយ៉ាបមកត្បូងប្រវែង៤០០ម៉ែត្រ។
តាមប្រភពព័ត៌មានពីមន្ត្រីសាលាខេត្តស្វាយរៀងបានឱ្យដឹងថា ក្រោយពីពិនិត្យឃើញនូវស្ថានភាពជាក់ស្តែងអំពីកម្ពស់ទឹកជំនន់ទឹកភ្លៀងដែលបានហក់ឡើងនាពេលប៉ុន្មានថ្ងៃកន្លងមកនេះ ធ្វើឲ្យកំណាត់ផ្លូវក្រាលខ្សាច់ភ្នំមួយកន្លែងចាប់ពីគល់ស្ពានបាយ៉ាប ស្ថិតនៅភូមិបាយ៉ាប ឃុំបាសាក់ ស្រុកស្វាយជ្រំ តភ្ជាប់ទៅភូមិសំយ៉ោង ឃុំសំយ៉ោង ស្រុកកំពង់រោទិ៍ បណ្តាលឲ្យច្រោះខូចខាតនិងបាក់ច្រាំងចិញ្ចើមផ្លូវប្រវែងប្រមាណ៤០០ម៉ែត្រដោយសារទឹករលកបោកបក់មកលើផ្លូវ។
បើតាមមន្ត្រីសាលាខេត្តដដែលបានឱ្យដឹងទៀតថា នាពេលខាងមុខនេះ គឺលោកអភិបាលខេត្តនឹងមានគម្រោងរៀបចំច្រាំងថ្នល់ដោយចាក់បេតុងឱ្យបានរឹងមាំដើម្បីការពារទឹកជំនន់ចាប់ពីចំណុចគល់ស្ពានបាយ៉ាបរហូតដល់ភូមិរបស់ប្រជាពលរដ្ឋតែម្តងដែលមានប្រវែង៤០០ម៉ែត្រដើម្បីកុំឱ្យផ្លូវខូច ដោយសារតែកម្លាំងទឹករលកនារដូវវស្សានិងដើម្បីបង្កភាពងាយស្រួលដល់ការធ្វើដំណើររបស់ប្រជាពលរដ្ឋគ្រប់មជ្ឈដ្ឋានដែលបានឆ្លងកាត់។
សូមបញ្ជាក់ផងដែរថា ផ្លូវក្រាលខ្សាច់ភ្នំមួយខ្សែនេះគឺតភ្ជាប់ពីក្រុងស្វាយរៀងឆ្ពោះទៅកាន់ ច្រកព្រំដែនសំយ៉ោង ដោយឆ្លងកាត់ឃុំបាសាក់ ស្រុកស្វាយជ្រំ និងឃុំសំយ៉ោង ស្រុកកំពង់រោទិ៍ បង្កលក្ខណៈងាយស្រួលដល់ការដឹកទំនិញចេញចូលរវាងប្រជាពលរដ្ឋក៏ដូចជាអាជីវករកម្ពុជានិងវៀតណាមដោយសារស្ថានភាពភូមិសាស្ត្រនៅជិតគ្នាផង និងចំណាយថវិកាក្នុងការដឹកជញ្ជូនអស់សោហ៊ុយតិច៕
ចែករំលែកព័តមាននេះ