រាជធានីភ្នំពេញ ៖ និយោជក និងសហជីព មិនទាន់មានការឯកភាពគ្នានៅឡើយទេទាក់ទងនឹងការដំឡើងប្រាក់ឈ្នួលអប្បបរមាជូនកម្មករ និយោជិតនៅឆ្នាំ២០១៩ខាងមុខនេះ ។
អនុប្រធានលេខាធិការដ្ឋានគណៈកម្មការ ប្រឹក្សាការងារលោក ហេង សួរ បានបញ្ជាក់នៅក្នុងកិច្ចប្រជុំចរចាអំពីការដំឡើងប្រាក់ឈ្នួលនាព្រឹកថ្ងៃទី១៨ កញ្ញា ម្សិលមិញថា លទ្ធផលសម្រេចក្នុងកិច្ចប្រជុំត្រីភាគីជាលើកទី៣ ស្ដីពីប្រាក់ឈ្នួលអប្បបរមាជូនដល់កម្មករនិយោជិតឆ្នាំ២០១៩ខាងមុខនេះ សម្រាប់ភាគីសហជីពតំណាងឲ្យកម្មករ និយោជិត បានបន្ថយតួលេខពី១៩២ដុល្លារ មកត្រឹម១៨៩ដុល្លារ។ ចំណែកភាគីនិយោជកបានដំឡើងដល់១៧៦ដុល្លារ គ្រាដែលតួលេខចាស់់មានចំនួន១៧៥ដុល្លារអាមេរិក ។ លោកបន្តថា តាមរយៈតួលេខរបស់ភាគីសហជីព និងភាគីនិយោជកឃើញថា កាន់តែកៀកគ្នាហើយ បើធៀបនឹងការចរចាប្រាក់ឈ្នួលលើកទី២ ដែលមានលក្ខណៈល្អប្រសើរជាងមុន ។ លោកបន្តថា ជាការរំពឹងទុកសម្រាប់កិច្ចប្រជុំថ្ងៃខាងមុខ តួលេខនឹងខិតជិតគ្នាបន្ថែមទៀត មុននឹងយកទៅពិភាក្សាបន្តនៅដើមខែតុលាខាងមុខ ហើយនឹងឈានទៅដល់ការប្រជុំសម្រេចរបស់ថ្នាក់លើជាចុងក្រោយ ។
ទាក់ទងនឹងការដំឡើងតួលេខប្រាក់ឈ្នួលកើនតែ១ដុល្លាររបស់ភាគីនិយោជកនេះ លោក កាំង ម៉ូនីកា ដែលតំណាងឲ្យភាគីនិយោជកបានបញ្ជាក់ថា ក្នុងមូលហេតុដែលត្រូវប្រៀបធៀបការងារ ក៏ដូចជា ផលិតភាពរបស់កម្មករ និយោជិតជាមួយដៃគូប្រកួតប្រជែងក្នុងតំបន់ដូចជាប្រទេសវៀតណាម និងបង់ក្លាដេសជាដើម ។ លោកបន្តថា ៖« ផលិតភាពការងារនៅកម្ពុជាកើនប្រមាណ២%ប៉ុណ្ណោះសម្រាប់កម្មករម្នាក់បន្ទាប់ពីការដំឡើងប្រាក់ឈ្នួលជាបន្តបន្ទាប់ ហេតុនេះយើងរំពឹងថាការចរចានឹងបញ្ចប់ដោយបរិយាកាសល្អប្រសើរ »។
ជាមួយគ្នានេះ លោក ហ្វា សាលី តំណាងឲ្យភាគីកម្មករ និយោជិតបានឲ្យដឹងថា មូលហេតុនៃការទម្លាក់តួរលេខពី១៩២ដុល្លារមកត្រឹម១៨៩ដុល្លារ ដោយសារមើលឃើញថា ទោះបីជានិយោជកដំឡើងថ្លៃតែ១ដុល្លារមែន ប៉ុន្តែបើធៀបនឹងការផ្តល់ជូនដល់កម្មករ និយោជិតគឺច្រើន ដែលមានចំនួនសរុបដល់ជាង៧០ម៉ឺននាក់ឯណោះក្នុងរយៈពេលពេញមួយឆ្នាំ ។
ទោះយ៉ាងនេះក្តី លោកតំណាងភាគីសហជីពបានអះអាងថា ចំពោះតួរលេខចំនួន១៨៩ដុល្លារ ក៏ស្ថិតក្នុងការចរចាបន្តទៀតផងដែរ ប្រសិនបើភាគីនិយោជកអាចដំឡើងតួលេខខ្ពស់ជាងពេលនេះ គឺជាការប្រសើរ ។
បច្ចុប្បន្ននេះ ប្រាក់ឈ្នួលអប្បបរមា (ប្រាក់ខែគោល) របស់កម្មករនិយោជិតផ្នែកវាយនភ័ណ្ឌ កាត់ដេរសម្លៀកបំពាក់និងផលិតស្បែកជើងមានចំនួន១៧០ដុល្លារអាមេរិកក្នុងមួយខែ។
កាលពីពេលថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថា ការដំឡើងប្រាក់ឈ្នួលគួរតែមានភាពសមស្របមួយ ខណៈបច្ចុប្បន្នប្រាក់ឈ្នួលនៅកម្ពុជាខ្ពស់ជាងគេរួចទៅហើយ ហេតុនេះយើងមិនអាចដំឡើងប្រាក់ឈ្នួលរហូតថៅកែរោងចក្របិទទ្វារ ឬចាកចេញពីកម្ពុជានោះទេ ។ សម្តេចថ្លែងថា ៖« យើងត្រូវថ្លឹងថ្លែងពីបញ្ហានេះ មិនមែនចេះតែដំឡើងរហូតដល់និយោជកមិនអាចទទួលយកបាន ហើយចាកចេញទៅប្រទេសផ្សេងៗឡើយ »។
តាមគម្រោងរបស់ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា កិច្ចប្រជុំសម្រេចអំពីការដំឡើងប្រាក់ឈ្នួល នឹងបញ្ចប់មុនពេលរដូវបុណ្យភ្ជុំបិណ្ឌមកដល់ខាងមុខនេះ ៕
ចែករំលែកព័តមាននេះ