រាជធានីភ្នំពេញ ៖ សព្វថ្ងៃនេះ ការទិញលំនៅឋានបង់រំលស់ ជាជម្រើសដ៏ពេញនិយមបំផុតមួយសម្រាប់អ្នកធ្វើការងារ ឬរកស៊ីសមល្មម ដែលមានចំណូលថេរ និងពុំមានប្រាក់ទាំងដុំយកទៅបង់ផ្ដាច់ ។ ជម្រើសនេះពិតជាជួយសម្រួលផ្នែកហិរញ្ញវត្ថុយ៉ាងច្រើន និងធ្វើឲ្យពលរដ្ឋមានផ្ទះជាកម្មសិទ្ធិរស់នៅផ្ទាល់ខ្លួន ។
ទោះជាយ៉ាងនេះក្ដី អ្នកទិញក៏ត្រូវពិចារណាផងដែរ ពិសេសគឺចំណូល និងចំណាយប្រចាំខែ ព្រោះនៅពេលសម្រេចទិញលំនៅឋានបង់រំលស់នោះ ក្រុមហ៊ុននឹងតម្រូវឲ្យបង់ទាំងដើម និងការប្រាក់។ ដូច្នេះ ការជ្រើសយកសេវាកម្មបង់រំលស់នេះ ក៏មានបញ្ហាផងដែរ ប្រសិនជាមិនបានគិតពីបញ្ហាចំពោះមុខឲ្យបានច្បាស់លាស់ ។
ជាទូទៅ អ្នកដែលមានបំណងចង់ទិញលំនៅឋានដោយបង់រំលស់នេះ តែងតែសួរខ្លួនឯងថាតើជម្រើសនេះ វាល្អប្រសើរសម្រាប់ខ្លួនឬយ៉ាងណា ?
ចម្ងល់មួយនេះត្រូវបានលោកឧកញ៉ា នួន រឹទ្ធី អគ្គនាយកក្រុមហ៊ុន Khmer Foundation Appraisal ពន្យល់នាពេលថ្មីៗនេះថា ការបង់រំលស់ថ្លៃផ្ទះនេះ គឺត្រូវធ្វើឡើងដោយអមជាមួយគ្នារវាងថ្លៃដើម និងការប្រាក់ ។ ប៉ុន្តែបើសម្លឹងមើលពីចំនួនថ្លៃដើម គឺដំបូងបានរំលស់តិចណាស់ ដែលវាត្រូវចំណាយលើការប្រាក់ច្រើនក្នុង១ខែៗ។ បើយើងបង់រំលស់ក្នុងរយៈពេលកាន់តែយូរ យើងបង់ខាតកាន់តែច្រើន ដូច្នេះ សម្រាប់អ្នកដែលចង់ទិញផ្ទះដោយការបង់រំលស់នេះ ចាំបាច់ត្រូវពិចារណាទៅលើស្ថានភាពនៃចំណូលរបស់ខ្លួនជាមុនសិនថា តើចំណូលដែលបានមកនេះ វាស័ក្តិសមនឹងការបង់រំលស់ទិញផ្ទះដែរឬទេ ។
មួយវិញទៀត សម្រាប់អ្នកដែលមានចំណូលមានកម្រិត ក៏គួរពិចារណាថា តើការជួលផ្ទះ និងការទិញផ្ទះដោយការរំលស់នេះ មួយណាប្រសើរជាងសម្រាប់ជីវភាពជាក់ស្ដែងរបស់យើង ។ បើពុំនោះទេ នឹងធ្វើឲ្យជីវភាពរបស់អ្នកកាន់តែលំបាក ដោយសារតែចំណូលរបស់យើងមិនសមាមាត្រនឹងការចំណាយ ។
យ៉ាងនេះក្ដី លោកឧកញ៉ាបានលើកជាឧទាហរណ៍ថា បើសិនជាយើងកំពុងស្នាក់នៅក្នុងផ្ទះជួល ដោយចំណាយ២០០ដុល្លារក្នុង១ខែ ប៉ុន្តែនៅពេលមានគេសង់ផ្ទះលក់ដោយការបង់រំលស់ត្រឹម២០០ដុល្លារក្នុង១ខែដូចគ្នា សួរថាតើយើងត្រូវនៅផ្ទះជួលបន្តទៀតឬយ៉ាងណា ?
លោកឧកញ៉ាបន្ដថា ជាការពិត បើយើងបូកសរុបចំនួនការប្រាក់ដែលបង់លើថ្លៃផ្ទះនោះ គឺមានចំនួនច្រើនលើសថ្លៃដើម ប៉ុន្តែវិធីសាស្ត្រនៃការបង់រំលស់នេះ គឺបានជួយដល់អ្នកមានលទ្ធភាពមធ្យម និងក្រោមមធ្យម ទទួលបានផ្ទះស្នាក់នៅងាយស្រួល ហើយក្នុងពេលកំពុងបង់រលស់នោះទៀតសោត ប្រសិនបើយើងអាចយកផ្ទះនេះមកវិនិយោគផ្សេងៗ កាន់តែប្រសើរថែមទៀត ។
លោកឧកញ៉ាបញ្ជាក់ថា និយាយរួម ការទិញផ្ទះដោយការបង់រំលស់មានចំណុចល្អ និងចំណុចអវិជ្ជមាន ។ ចំណុចល្អត្រង់ថា យើងអាចមានផ្ទះស្នាក់នៅជាកម្មសិទ្ធិតាំងពីយើងមិនទាន់មានលុយទិញផ្ទះគ្រប់ ។ ចំណែកចំណុចអវិជ្ជមាន គឺត្រូវចំណាយថ្លៃបង់ការប្រាក់ប្រចាំខែច្រើន ហើយបើរយៈពេលនៃការបង់រំលស់នោះច្រើនឆ្នាំ ការប្រាក់កាន់តែច្រើនថែមទៀត ។ ដូច្នេះ កត្តាសំខាន់បំផុត យើងត្រូវគិតឲ្យបានហ្មត់ចត់ពីចំណូល និងចំណាយរបស់យើងថា រត់រួចដែរឬទេ ជៀសវាងមានបញ្ហាកណ្ដាលទី ៕
ចែករំលែកព័តមាននេះ