ខេត្តកណ្ដាល ៖ បុរសម្នាក់បានស្លាប់បាត់បង់ជីវិតចោលប្រពន្ធ និងកូន៣នាក់ ខណៈពេលក្រុមគ្រួសារបញ្ជូនទៅសង្គ្រោះដល់ពាក់កណ្ដាលផ្លូវ បន្ទាប់ពីរូបគេ និងបុរសម្នាក់ទៀតត្រូវជាប្អូនថ្លៃនាំគ្នាតខ្សែភ្លើងឆក់ត្រីនៅក្នុងស្រះទឹកមួយក្បែរផ្ទះ ហើយភ្លាត់ស្នៀតត្រូវចរន្តភ្លើងឆក់ ចំណែកប្អូនថ្លៃក៏ត្រូវចរន្តអគ្គិសនីឆក់រងរបួសដែរ ។…
ខេត្តកណ្ដាល ៖ បុរសម្នាក់បានស្លាប់បាត់បង់ជីវិតចោលប្រពន្ធ និងកូន៣នាក់ ខណៈពេលក្រុមគ្រួសារបញ្ជូនទៅសង្គ្រោះដល់ពាក់កណ្ដាលផ្លូវ បន្ទាប់ពីរូបគេ និងបុរសម្នាក់ទៀតត្រូវជាប្អូនថ្លៃនាំគ្នាតខ្សែភ្លើងឆក់ត្រីនៅក្នុងស្រះទឹកមួយក្បែរផ្ទះ ហើយភ្លាត់ស្នៀតត្រូវចរន្តភ្លើងឆក់ ចំណែកប្អូនថ្លៃក៏ត្រូវចរន្តអគ្គិសនីឆក់រងរបួសដែរ ។ ហេតុការណ៍នេះបានកើតឡើងកាលពីវេលាម៉ោង៩ព្រឹក ថ្ងៃទី៩ ឧសភា នៅក្នុងភូមិក្រឡឹងដុំ ឃុំឆក់ឈើនាង ស្រុកអង្គស្នួល ។
បុរសដែលស្លាប់ឈ្មោះសៀង ខ្លី អាយុ៤៥ឆ្នាំជាកសិករ មានទីលំនៅក្នុងភូមិកើតហេតុខាងលើ ចំណែកប្អូនថ្លៃឈ្មោះវៀច ម៉ៅ អាយុ៣៨ឆ្នាំជាកសិករដែរ និងមានទីលំនៅក្នុងភូមិជាមួយគ្នា ។ តាមប្រភពព័ត៌មានបានឱ្យដឹងថា នៅមុនពេលកើតហេតុ បុរសទាំងពីរនាក់បងថ្លៃប្អូនថ្លៃបាននាំគ្នាតខ្សែភ្លើងចេញពីផ្ទះដើម្បីឆក់ត្រីក្នុងស្រះទឹកមួយនៅក្បែរផ្ទះដើម្បីយកមកធ្វើម្ហូប ។ ខណៈនោះពួកគេបានយកដែកសរសៃថ្នាំងអំពៅពីរកំណាត់ប្រវែងជាង១ម៉ែត្រទៅទម្លាក់បង្កប់នៅក្នុងទឹករួចយកខ្សែភ្លើងតចេញពីព្រីនៅក្នុងផ្ទះអូសចេញចងជាមួយដែកសរសៃថ្នាំងអំពៅដែលដាក់បង្កប់នៅក្នុងទឹកនោះ ។
ប្រភពដដែលបន្តថា ក្រោយពេលតរួចរាល់បុរសរងគ្រោះបានចុះទៅ ក្នុងស្រះទឹកដើម្បីរាវ និងរើសត្រីនៅពេលដែលឃើញត្រីត្រូវចរន្តភ្លើងឆក់ប្រកាច់អណ្ដែតនៅលើផ្ទៃទឹក ។ ប្រភពដដែលបន្តថា ចំណែកបុរសជាប្អូនថ្លៃជាអ្នករង់ចាំដោតឬដកឌុយពេលឃើញត្រីត្រូវខ្សែភ្លើងឆក់ ហើយដោយសារតែការតគ្មានបច្ចេកទេសត្រឹមត្រូវគ្រាន់តែដោតឌុយចូលភ្លាមស្រាប់តែចរន្តភ្លើងបានឆក់បុរសជាបងថ្លៃប្រកាច់នៅក្នុងទឹកតែម្ដង ។ ពេលនោះដោយសារតែការភិតភ័យខ្លាំងពេក បុរសជាប្អូនថ្លៃមានការស្រឡាំងកាំង ហើយមិនបានដកឌុយចេញពីក្នុងព្រីភ្លាមៗទេនិងបានស្ទុះរត់ចុះទៅក្នុងទឹកដើម្បីជួយបងថ្លៃក៏ត្រូវខ្សែភ្លើងឆក់ដែរ ប៉ុន្តែមិនសូវជាខ្លាំងរួចទើបរត់ឡើងគោកដកឌុយចេញវិញ ។
ហេតុការណ៍នេះបង្កឱ្យមានការភ្ញាក់ផ្អើលយ៉ាងខ្លាំង ហើយបុរសជាបងថ្លៃមិនបានស្លាប់ភ្លាមៗទេ បន្ទាប់មកក្រុមគ្រួសារបាននាំទៅកាន់មន្ទីរពេទ្យដើម្បីសង្គ្រោះ ។ ប៉ុន្តែដោយស្ថានភាពធ្ងន់ធ្ងរពេកពេលទៅដល់ពាក់កណ្ដាលផ្លូវក៏បានស្លាប់ទើបក្រុមគ្រួសារនាំត្រឡប់ទៅផ្ទះវិញ ដើម្បីរៀបចំធ្វើបុណ្យ ។ ក្រោយពេលកើតហេតុសមត្ថកិច្ចមូលដ្ឋានបានចុះទៅដល់ដើម្បីធ្វើការត្រួតពិនិត្យ និងកសាងសំណុំរឿងតែក្រុមគ្រួសារជនរងគ្រោះមិនមានការប្ដឹងប្ដល់គ្នាអ្វីឡើយ ៕
ចែករំលែកព័តមាននេះ