រាជធានីភ្នំពេញ ៖ បុរសម្នាក់បានចាប់នារីវ័យក្មេងម្នាក់វាយដំនិងកោរសក់ក្បាល ដោយចោទថា នាងជាចោរលួច បន្ទាប់ពីនារីវ័យក្មេងរូបនេះ ដើរចូលទៅក្នុងផ្ទះមួយ ។ ថ្វីដ្បិតតែនៅពេលនោះ នាងមិនទាន់បានលួចអ្វីក្ដី…
រាជធានីភ្នំពេញ ៖ បុរសម្នាក់បានចាប់នារីវ័យក្មេងម្នាក់វាយដំនិងកោរសក់ក្បាល ដោយចោទថា នាងជាចោរលួច បន្ទាប់ពីនារីវ័យក្មេងរូបនេះ ដើរចូលទៅក្នុងផ្ទះមួយ ។ ថ្វីដ្បិតតែនៅពេលនោះ នាងមិនទាន់បានលួចអ្វីក្ដី ប៉ុន្តែការដែលនាងដើរចូលទៅក្នុងផ្ទះខាងលើ ត្រូវបានម្ចាស់ផ្ទះសង្ស័យថា នាងប្រុងលួចទូរស័ព្ទនិងលុយកាក់ ព្រមទាំងរបស់របរផ្សេងៗទៀត ។
ហេតុការណ៍នេះ កើតឡើងកាលពីវេលាម៉ោង១ និង៣០នទីរសៀលថ្ងៃទី១៣ កញ្ញា នៅផ្សារព្រៃទា ស្ថិតក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ។ ស្ត្រីវ័យក្មេងដែលជាប់សង្ស័យនេះ មិនត្រូវបានស្គាល់ឈ្មោះឡើយ នាងមានអាយុប្រហែលជិត២០ឆ្នាំប៉ុណ្ណោះ និងមានរូបរាងស្រស់ស្អាតថែមទៀតផង ហើយនាងបាននិយាយថា មានស្រុកកំណើតនៅទីរួមខេត្តពោធិ៍សាត់ ។
តាមប្រភពព័ត៌មានបានឲ្យដឹងថា មុនពេលកើតហេតុ ស្ត្រីវ័យក្មេងរូបនេះ បានដើរចូលទៅក្នុងផ្ទះលក់ដូរមួយដោយគ្មានការអនុញ្ញាតពីម្ចាស់ផ្ទះឡើយ តែត្រូវម្ចាស់ផ្ទះឃើញទាន់ ក៏ស្រែកថាចោរៗ បង្កការភ្ញាក់ផ្អើល និងចាប់ឃាត់ខ្លួនតែម្តង ។ ខណៈនោះ នាងបានលើកដៃសំពះអង្វរសុំការលើកលែងទោសពីសំណាក់ប្រជាពលរដ្ឋ ប៉ុន្តែពលរដ្ឋបានសម្ដែងការខឹងសម្បា និងចោមរោមវាយទាត់ធាក់នារីរូបនេះ រួចកោរសក់នាងអស់ចំហៀងក្បាល ។
ប្រភពដដែលបន្តថា កន្លងមក អ្នករស់នៅតំបន់នោះតែងបាត់ទូរស័ព្ទដែលមានតម្លៃថ្លៃៗ ព្រមទាំបាត់កាបូបលុយជាញឹកញាប់ ប៉ុន្តែរកមុខចោរមិនដែលឃើញម្ដងណាឡើយ ទើបតែពេលនេះឃើញស្ត្រីខាងលើដើរចូលក្នុងផ្ទះក៏កំណត់ថាជាចោរបម្រុងលួចក៏ចាប់ខ្លួនតែម្ដង ។ ក្រោយពីកោរសក់រួច ពលរដ្ឋទាំងនោះក៏បានដោះលែងទៅវិញ ហើយបន្ទាប់មកក៏មិនបានដឹងថា នាងម្នាក់នោះទៅកន្លែងណាឡើយ ។
ចំណែកនគរបាលប៉ុស្តិ៍ចោមចៅ៣ បានទៅកាន់កន្លែងកើតហេតុ ប៉ុន្តែពេលទៅដល់នារីវ័យក្មេងនេះចេញផុតទៅហើយ ។ អ្វីដែលជាការកត់សម្គាល់នោះ គឺការថតវីដេអូបង្ហោះតាមហ្វេសប៊ុក បង្ហាញឱ្យឃើញបុរស២នាក់ ដែលម្នាក់ចាប់ដៃសង្កត់ និងម្នាក់ទៀត ចាប់បោចសក់នាងកោរ ។ ការធ្វើទារុណកម្មយ៉ាងអមនុស្សធម៌នេះ បានទទួលការថ្កោលទោសផងដែរ ដោយសារតែចាប់មនុស្សធ្វើបាបមិនប្រគល់ឱ្យសមត្ថកិច្ច ។ សួរថា បើគ្រាន់តែសង្ស័យ ហើយចាប់មនុស្សធ្វើបាបបែបនេះ តើត្រឹមត្រូវដែរទេ ?
https://www.youtube.com/watch?v=bLlj4DrjcGk
ចែករំលែកព័តមាននេះ