រាជធានីភ្នំពេញ ៖ លោកឌីខាំ បូលី អ្នកនាំពាក្យក្រសួងអប់រំយុវជន និងកីឡាបានបញ្ជាក់តាមសារអេឡិចត្រូនិច(តេឡេក្រាម)ប្រាប់កោះសន្តិភាពនៅថ្ងៃទី១៣ ខែកញ្ញា ឆ្នាំ២០១៨ ថា «គណៈកម្មការកោសល្យវិច្ច័យនេះមានសមាសភាព…
រាជធានីភ្នំពេញ ៖ លោកឌីខាំ បូលី អ្នកនាំពាក្យក្រសួងអប់រំយុវជន និងកីឡាបានបញ្ជាក់តាមសារអេឡិចត្រូនិច(តេឡេក្រាម)ប្រាប់កោះសន្តិភាពនៅថ្ងៃទី១៣ ខែកញ្ញា ឆ្នាំ២០១៨ ថា «គណៈកម្មការកោសល្យវិច្ច័យនេះមានសមាសភាព លោក ហង់ ជួនណារ៉ុន រដ្ឋមន្ត្រីក្រសួងអប់រំធ្វើជាប្រធាន និងមានតួនាទីទទួល និងដោះស្រាយរាល់ពាក្យបណ្តឹងរបស់សិស្សដែលមិនសុខចិត្តចំពោះលទ្ធផលប្រឡងឆ្នាំ២០១៨នេះ ដោយឈរលើគោលការណ៍ច្បាប់តម្លាភាព និងអាចទទួលយកបាន» ។
ជាគោលការណ៍បេក្ខជនមានសិទ្ធិក្នុងការដាក់ពាក្យបណ្តឹងមកក្រសួងអប់រំ ហើយចំនួនតួលេខបេក្ខជនដាក់ពាក្យត្រឹមថ្ងៃទី១២ ខែកញ្ញា ២០១៨ ចំនួនប្រមាណ៥០០បណ្តឹង នៅទូទាំងប្រទេស ។ លោកបានអះអាងថា ការបង្កើតគណៈកម្មការកោសល្យវិច្ច័យនេះ បានធ្វើឡើងបន្ទាប់ពីមានការតវ៉ាពីសំណាក់សិស្សប្រឡងបាក់ឌុបមួយចំនួនទៅលើលទ្ធផលប្រឡងពិសេសទាក់ទងទៅនឹងមុខវិជ្ជាមួយចំនួនដូចជា គណិតវិទ្យា ឬគីមីវិទ្យាជាដើម ។ លោកថា«រហូតមកដល់ពេលនេះគណៈកម្មការកំពុងពិនិត្យមើលលើពាក្យបណ្តឹងរបស់បេក្ខជន» ។ នៅពេលសួរថា មានមុខវិជ្ជាអ្វីខ្លះដែលនឹងត្រូវសើរើឡើងវិញ លោកថា មិនទាន់បានទទួលព័ត៌មានពីគណៈកម្មការនៅឡើយទេ ។
គួរបញ្ជាក់ថា លោក ឌីខាំ បូលី បានប្រាប់អ្នកសារព័ត៌មានកន្លងមកថា ចាប់តាំងពីថ្ងៃទី១០រហូតមកដល់ម៉ោង១១និង៣០នាទីព្រឹកថ្ងៃទី១២ ខែកញ្ញា ឆ្នាំ២០១៨នេះ ក្រសួងបានទទួលពាក្យបណ្តឹងពីសិស្សនៅទូទាំងប្រទេសចំនួន៥០០បណ្តឹង ក្នុងនោះបណ្តឹងទាក់ទងនឹងមុខវិជ្ជាគណិតវិទ្យាមានច្រើនជាងគេ បន្ទាប់មកមានបណ្តឹងមុខវិជ្ជាគីមីវិទ្យា អក្សរសាស្ត្រខ្មែរ និងមុខវិជ្ជាជីវវិទ្យា ។ លោក ឌីខាំបូលី ថា សិស្សដែលមិនសុខចិត្តនឹងលទ្ធផលប្រឡងបាក់ឌុបនៅឆ្នាំនេះមានសិទ្ធិតាមច្បាប់ត្រូវរៀបចំពាក្យបណ្តឹងឲ្យបានត្រឹមត្រូវដូចជា បញ្ជាក់អត្ថសញ្ញាណឈ្មោះមណ្ឌលប្រឡង និងភា្ជប់ជាមួយកម្មវត្ថុនៃការប្តឹងឲ្យបានច្បាស់លាស់ ដើម្បីងាយស្រួលឲ្យគណៈកម្មការកោសល្យវិច្ច័យដោះស្រាយបានលឿនព្រោះថា តាមច្បាប់ក្រសួងទុកពេលឲ្យសិស្សប្តឹងតវ៉ាចំពោះលទ្ធផលប្រឡងរយៈពេល១ខែ បន្ទាប់ពីប្រកាសលទ្ធផលប្រឡងជាផ្លូវការ ។
មន្ត្រីក្រសួងអប់រំបញ្ជាក់ថា ការប្តឹងតវ៉ារបស់សិស្សចំពោះលទ្ធផលប្រឡងនេះមិនមែនជាលើ កទី១នោះទេ គឺមានយូរហើយ គ្រាន់តែនៅឆ្នាំនេះមានកាបណ្តឹងតវ៉ាច្រើនជាងឆ្នាំមុនៗប៉ុណ្ណោះ ។ គណៈកម្មការកោសល្យវិច្ច័យនឹងខិតខំដោះស្រាយបណ្តឹងរបស់សិស្សជាបណ្តើរៗដោយចាប់ផ្តើមពីថ្ងៃនេះតទៅរហូតដល់ដោះស្រាយចប់ ។ តែលោកឌីខាំ បូលី បញ្ជាក់ប្រាប់កោះសន្តិភាពថា« ជាគោលការណ៍បេក្ខជនមានសិទ្ធិតវ៉ា ក្រសួងមិនបានប្រាប់បេក្ខជនឲ្យដាក់ពាក្យបណ្តឹងទេ ។ ពេលនេះមិនមានតួលេខនៃពាក្យបណ្តឹងបានដាក់មកក្រសួងបន្ថែមនៅឡើយទេ » ។ ពេលសួរថា ពេលណាបានគណៈកម្មការនេះនឹងបញ្ចប់ការ សើរើសន្លឹកកិច្ចការសិស្សនៅពេលណា ? លោកថា«ជាការងាររបស់គណៈកម្មការ ។ ខ្ញុំមិនមានបានទទួលព័ត៌មានពីគណៈកម្មការនៅឡើយទេ» ។
កាលពីថ្ងៃទី១១ ខែកញ្ញា យុវសិស្សម្នាក់ឈ្មោះ ឆាយ លីអាន បេក្ខជនមកពីខេត្តកំពតធ្លាប់ទទួលបានមេដាយមាស ទូទាំងប្រទេសឆ្នាំ២០១៨ និងទទួលបាននិទ្ទេស D លើពិន្ទុរួម និទ្ទេស A បីមុខវិជ្ជានិង B បីមុខវិជ្ជា បានអះអាងថា ខ្លួនជាសិស្សពូកែធ្លាប់ជាប់ជ័យលាភីមេដាយមាស ប្រាក់ និងសំរិទ្ធិលើវិញ្ញាសារគណិតវិទ្យាទាំងក្នុង និងក្រៅប្រទេស ប៉ុន្តែបែរជាធ្លាក់គណិតវិទ្យាទៅវិញ ។
ក្នុងចំណោមសិស្សបេក្ខជនច្រើននាក់មកដល់ក្រសួងអប់រំយុវសិស្ស ឆាយ លីអាន បានសំណូមពរឲ្យក្រសួងអប់រំជួយដោះស្រាយបញ្ហានេះឲ្យបានឆាប់ ដើម្បីបានដាក់ពាក្យសិក្សាបន្តនៅតាមមហាវិទ្យាល័យនានា ។
គួរបញ្ជាក់ថា តាមលទ្ធផលប្រឡងបាក់ឌុបនៅឆ្នាំនេះ មានបេក្ខជនប្រឡងជាប់ សរុបចំនួន៧៥ ០៥៩នាក់ ស្មើនឹង៦៦. ២១% ក្នុងចំណោមបេក្ខជនចូលរួមប្រឡងសរុបជាង១១ម៉ឺនក្នុងនោះមានបេក្ខជនជាប់និទ្ទេស A ចំនួន២៩០នាក់ ៕
ចែករំលែកព័តមាននេះ