រាជធានីភ្នំពេញ ៖ ចៅក្រមសាលាឧទ្ធរណ៍កំណត់បើកសវនាការលើសំណុំរឿងលោក កឹមសុខា អតីតប្រធានគណបក្សសង្គ្រោះជាតិនៅថ្ងៃទី១៧ ខែកញ្ញាខាងមុខ ។ នេះបើតាមដីការបស់សាលាឧទ្ធរណ៍ ជូនដំណឹងទៅអគ្គនាយកនៃអគ្គនាយកដ្ឋានពន្ធនាគារត្រពាំងផ្លុង កាលពីថ្ងៃ៧…
រាជធានីភ្នំពេញ ៖ ចៅក្រមសាលាឧទ្ធរណ៍កំណត់បើកសវនាការលើសំណុំរឿងលោក កឹមសុខា អតីតប្រធានគណបក្សសង្គ្រោះជាតិនៅថ្ងៃទី១៧ ខែកញ្ញាខាងមុខ ។ នេះបើតាមដីការបស់សាលាឧទ្ធរណ៍ ជូនដំណឹងទៅអគ្គនាយកនៃអគ្គនាយកដ្ឋានពន្ធនាគារត្រពាំងផ្លុង កាលពីថ្ងៃ៧ ខែកញ្ញា កន្លងមក គឺមុនការដោះលែងលោក កឹម សុខា នៅវេលាម៉ោង៣ទៀបភ្លឺថ្ងៃទី១០ ខែកញ្ញា ។
លោក អុឹម សុផាន អគ្គព្រះរាជអាជ្ញាសាលាឧទ្ធរណ៍ បានចេញដីកាកាលពីថ្ងៃទី៧ ខែកញ្ញា សុំចាត់ឲ្យនាំខ្លួនជនត្រូវចោទ កឹម សុខា មកសវនាការលើសំណុំរឿងស៊ើបសួរលេខ២៤៩/០៣.៩.២០១៧ របស់សាលាដំបូងរាជធានីភ្នំពេញ ពីបទ«សន្ទិដ្ឋិភាពជាមួយបរទេស»ប្រព្រឹត្តនៅប្រទេសកម្ពុជានិងកន្លែងផ្សេងទៀតកាលពីអំឡុងឆ្នាំ១៩៩៣ ដល់ថ្ងៃទី៣ ខែកញ្ញា ឆ្នាំ២០១៧ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា៤៤៣នៃក្រមព្រហ្មទណ្ឌ ។
យោងតាមដីកា បានឲ្យនាំលោក កឹម សុខា ជាជនត្រូវចោទមកកាន់សាលាឧទ្ធរណ៍នៅពេលបើកសវនាការជំនុំជម្រះនាថ្ងៃទី១៧ ខែកញ្ញា វេលាម៉ោង២រសៀល នៅបន្ទប់សវនាការទី៣ ដោយមានក្រុមប្រឹក្សាចំនួន៣រូបគឺលោក ឃុន លាងម៉េង ប្រធានក្រុមប្រឹក្សា លោក យូ ប៊ុនណា ចៅក្រមប្រឹក្សា លោក សួស សំអាត ចៅក្រមប្រឹក្សា និងលោកស្រី ប៉េស រីណា ជាក្រឡា បញ្ជីសវនាការ ។ដីកាបានឲ្យដឹងទៀតថា នៅពេលចប់សវនាការ ត្រូវនាំជនត្រូវចោទត្រឡប់ទៅពន្ធនាគារវិញ ដើម្បីបន្តអនុវត្តសេចក្តីសម្រេចរបស់តុលាការពីមុនមក បើគ្មានសេចក្តីសម្រេចថ្មីទៀតទេ ។
សូមជម្រាបថា លោក កឹម សុខា ត្រូវបានសាលាដំបូងរាជធានីភ្នំពេញសម្រេចដោះលែងឲ្យ
នៅក្រៅឃុំជាបណ្តោះអាសន្នកាលពីវេលាម៉ោង៣ទៀបភ្លឺថ្ងៃទី១០ខែកញ្ញា ។ បច្ចុប្បន្ន លោក កឹម សុខា ស្ថិតនៅក្នុងគេហដ្ឋានរបស់លោក ផ្ទះលេខ៩៧ ផ្លូវលេខ៣១៣ សង្កាត់បឹងកក់ទី២ ខណ្ឌទូលគោក ។ ទោះបីបាននៅក្រៅឃុំក្តី តែលោក កឹម សុខា មិនត្រូវបានអនុញ្ញាតឲ្យចេញពីបរិវេណផ្ទះរបស់លោកឡើយ ក៏ដូចជាជួបជាមួយសកម្មជនថ្នាក់ដឹកនាំអតីតគណបក្សសង្គ្រោះជាតិ និងជនបរទេសជាដើម ។
សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា ការដោះលែងលោក កឹម សុខា ជាបណ្តោះអាសន្ននេះ ដោយសារតែបញ្ហាសុខភាពមិនមែនបញ្ហានយោបាយនោះទេ ។ លោក កឹម សុខា បានជាប់ពន្ធនាគារអស់រយៈពេលជាង១ឆ្នាំមកហើយ បន្ទាប់ពីត្រូវសមត្ថកិច្ចឃាត់ខ្លួនក្នុងសំណុំរឿងសន្ទិដ្ឋិភាពជាមួយបរទេស ។
គួរបញ្ជាក់ថា លោក កឹម សុខា ត្រូវបានចោទប្រកាន់ពីបទសន្ទិដ្ឋិភាពជាមួយបរទេស យោងតាមមាត្រា៤៤៣នៃក្រមព្រហ្មទណ្ឌ ។ បទសន្ទិដ្ឋិភាពជាមួយបរទេស ជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេសដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា ។បទល្មើសនេះ អាចត្រូវជាប់ពន្ធនាគារពី១៥ឆ្នាំដល់៣០ឆ្នាំ ។
លោក កឹម សុខា ត្រូវបានសមត្ថកិច្ចចាប់ខ្លួននៅវេលារំលងអធ្រាត្រឈានចូលថ្ងៃទី៣ ខែ
កញ្ញា ឆ្នាំ២០១៧ ដែលគិតរហូតមកដល់ពេលនេះជាង១ឆ្នាំហើយដែលលោក កឹម សុខា ជាប់ពន្ធនាគារ ៕
ចែករំលែកព័តមាននេះ