រាជធានីភ្នំពេញ ៖ ក្រុមហ៊ុនដ៏ធំមួយដែលមានមូលដ្ឋាននៅប្រទេសចិន បានបង្ហាញពីគម្រោងសិក្សាលទ្ធភាពសាងសង់ផ្លូវល្បឿនលឿន២ខ្សែទៀតនៅកម្ពុជា ដោយមួយខ្សែចេញពីរាជធានីភ្នំពេញទៅកាន់ក្រុងបាវិត និងមួយខ្សែទៀតចេញពីរាជធានីភ្នំពេញទៅកាន់ខេត្តព្រះសីហនុ ។ ក្នុងពិធីចុះអនុស្សរណៈយោគយល់គ្នាស្ដីពីកិច្ចសហប្រតិបត្តិការវិនិយោគនៅកម្ពុជា ដែលធ្វើឡើងរវាងក្រុមហ៊ុនចំនួន៣ គឺក្រុមហ៊ុន…
រាជធានីភ្នំពេញ ៖ ក្រុមហ៊ុនដ៏ធំមួយដែលមានមូលដ្ឋាននៅប្រទេសចិន បានបង្ហាញពីគម្រោងសិក្សាលទ្ធភាពសាងសង់ផ្លូវល្បឿនលឿន២ខ្សែទៀតនៅកម្ពុជា ដោយមួយខ្សែចេញពីរាជធានីភ្នំពេញទៅកាន់ក្រុងបាវិត និងមួយខ្សែទៀតចេញពីរាជធានីភ្នំពេញទៅកាន់ខេត្តព្រះសីហនុ ។
ក្នុងពិធីចុះអនុស្សរណៈយោគយល់គ្នាស្ដីពីកិច្ចសហប្រតិបត្តិការវិនិយោគនៅកម្ពុជា ដែលធ្វើឡើងរវាងក្រុមហ៊ុនចំនួន៣ គឺក្រុមហ៊ុន China One Belt and One Road International Barter Operation Co., Limited របស់ចិន និងក្រុមហ៊ុនចំនួន២របស់កម្ពុជា គឺក្រុមហ៊ុន Smile Sheen International Co.,Ltd និងក្រុមហ៊ុន Green Cambodia Property Investment Co., Ltd កាលពីថ្ងៃទី៧ កញ្ញា កន្លងមក តំណាងក្រុមហ៊ុន China One Belt and One Road International Barter Operation Co., Limited លោក ហ្វូ ឆាងឈឹង បានមានប្រសាសន៍ថា ក្រុមហ៊ុនរបស់លោកបានសិក្សាស្រាវជ្រាវពីការបង្កើតផ្លូវល្បឿនលឿននៅកម្ពុជា ដោយខ្សែទី១ចាប់ពីរាជធានីភ្នំពេញទៅកាន់ក្រុងបាវិតដែលតាមការប៉ាន់ស្មាន អាចចំណាយអស់ប្រមាណ៣.៥០០លានដុល្លារទៅ៤.៥០០លានដុល្លារ និងមួយខ្សែទៀតពីភ្នំពេញទៅ កាន់ក្រុងព្រះសីហនុអាចចំណាយអស់ប្រមាណ៤ពាន់លានដុល្លារ ដើម្បីជួយសម្រួលដល់ការដឹកជញ្ជូននៅកម្ពុជា ។
តាមរយៈឯកសារដែលក្រុមអ្នកសារព័ត៌មានទទួលបាននៅក្នុងពិធីចុះហត្ថលេខាខាងលើនេះ ក្រុមហ៊ុនទាំង៣ បានសម្រេចកិច្ចព្រមព្រៀងលើគម្រោងវិនិយោគសំខាន់ៗជាច្រើន ដូចជា តំបន់ពាណិជ្ជកម្មសេរី ខ្សែក្រវាត់មួយ ផ្លូវមួយ , គម្រោងឧទ្យានជីវៈចំរុះ, គម្រោងអភិវឌ្ឍន៍ទូលំទូលាយនៃឧទ្យានឧស្សាហកម្មហិរញ្ញវត្ថុចិន កម្ពុជា ជាដើម ។
ដោយឡែកគម្រោងហេដ្ឋារចនាសម្ព័ន្ធ រួមមាន ផ្លូវល្បឿនលឿន, ផ្លូវរូងក្រោមដី, ស្ពានទូរគមនាគមន៍, ការជីកយករ៉ែមាស និងទង់ដែង ។
ចំណែកគម្រោងថាមពល មានដូចជា ការកែច្នៃប្រេងកាត, ឧស្ម័នធម្មជាតិ, រោងចក្រកែច្នៃកាកសំណល់់ទៅជាថាមពល, រោងចក្រថាមពលវារីអគ្គិសនី, រោងចក្រថាមពលនុយក្លេអ៊ែរ, ការដាក់ពាក្យស្នើសុំស្ថានកុងស៊ុលកម្ពុជា ប្រចាំនៅទីក្រុងស៊ាមេន, រៀបចំការបង្កើតក្រុមសាជីវកម្មវិនិយោគចិន-កម្ពុជានៅកម្ពុជា, ការលើកកម្ពស់និងអភិវឌ្ឍន៍វិស័យទេសចរណ៍កម្ពុជា, គម្រោងសហប្រតិបត្តិការកីឡាអន្តរជាតិ, ការនាំចេញផលិតផលកសិកម្មទៅកាន់ប្រទេសចិន, និងអាជីវកម្មប្រព័ន្ធផ្សព្វផ្សាយផ្ដោតលើព័ត៌មានសេដ្ឋកិច្ច ហិរញ្ញវត្ថុ ។
លោក ហ្វូ ឆាងឈឹង បានបន្តថា ការមកវិនិយោគនៅកម្ពុជានាពេលនេះ គឺដោយមើលឃើញច្បាស់ពីស្ថិរភាពនយោបាយពេញលេញ ពុំមានការផ្ទុះអាវុធតាមដងផ្លូវនានា ក៏ដូចជា មានបំណងជួយអភិវឌ្ឍន៍កម្ពុជាឲ្យកាន់តែរីកចម្រើន និងទទួលបានការគាំទ្រលើកទឹកចិត្តពីថ្នាក់ដឹកនាំនៃប្រទេសទាំង២ ។
គួររំឭកថា បច្ចុប្បន្ននេះ កម្ពុជាមានគម្រោងសាងសង់ផ្លូវល្បឿនលឿន១ខ្សែរួចហើយពីរាជធានីភ្នំពេញទៅខេត្តព្រះសីហនុ ដែលនឹងចាប់ផ្ដើមបើកការដ្ឋានសាងសង់នៅខែវិច្ឆិកាខាងមុខ។
បើតាមមន្ត្រីអ្នកនាំពាក្យក្រសួងសាធារណការ និងដឹកជញ្ជូន ផ្លូវល្បឿនលឿននេះនឹងចាប់ផ្ដើមចេញពីតំបន់អូរដឹមនៃចំណុចប្រសព្វរវាងផ្លូវទៅទំនប់កប់ស្រូវ និងអូសកាត់ផ្នែកខាងស្តាំដៃនៃផ្លូវជាតិលេខ៤ ប្រមាណ៣០គីឡូម៉ែត្រ ទើបងាកមកខាងឆ្វេងដៃវិញរហូតដល់ស្រុកព្រៃនប់ ទើបងាកមកខាងស្តាំដៃរហូតដល់ក្រុងព្រះសីហនុតែម្ដង ។
ការស្ថាបនាផ្លូវល្បឿនលឿននេះ ពិតជាមានសារសំខាន់ណាស់សម្រាប់ជំរុញកំណើនសេដ្ឋកិច្ចកម្ពុជាឲ្យកាន់តែកើនឡើងថែមមួយកម្រិតទៀត។
លោកបណ្ឌិតម៉ី កល្យាណ ប្រធានក្រុមប្រឹក្សាវិទ្យាស្ថានសិក្សាការអភិវឌ្ឍបានថ្លែងថា ៖« វាជារឿងចាំបាច់ដែលត្រូវកសាងហេដ្ឋារចនាសម្ព័ន្ធ ដើម្បីរុញសេដ្ឋកិច្ចកម្ពុជាទៅកាន់ដំណាក់កាលថ្មីមួយទៀត ព្រោះបើចង់ឲ្យសេដ្ឋកិច្ចកម្ពុជាកើនឡើង និងឈានទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ធបន្ថែមទៀត »៕
ចែករំលែកព័តមាននេះ