រាជធានីភ្នំពេញ ៖ កិច្ចប្រជុំអំពីប្រាក់ឈ្នួលឆ្នាំ២០១៩ ទំនងជាតានតឹងជាងមុន ខណៈកម្ពុជាកំពុងប្រកួតប្រជែងជាមួយបណ្ដាប្រទេសក្នុងតំបន់ ដោយសារប្រាក់ឈ្នួលរបស់កម្ពុជាមានកម្រិតខ្ពស់ជាងប្រទេសឡាវ វៀតណាម និងមីយ៉ាន់ម៉ា ទៅហើយ ។…
រាជធានីភ្នំពេញ ៖ កិច្ចប្រជុំអំពីប្រាក់ឈ្នួលឆ្នាំ២០១៩ ទំនងជាតានតឹងជាងមុន ខណៈកម្ពុជាកំពុងប្រកួតប្រជែងជាមួយបណ្ដាប្រទេសក្នុងតំបន់ ដោយសារប្រាក់ឈ្នួលរបស់កម្ពុជាមានកម្រិតខ្ពស់ជាងប្រទេសឡាវ វៀតណាម និងមីយ៉ាន់ម៉ា ទៅហើយ ។
នៅទីស្តីការក្រសួងការងារ នាព្រឹកថ្ងៃទី១០ ខែកញ្ញា ឆ្នាំ២០១៨ បានបើកកិច្ចប្រជុំប្រាក់ឈ្នួលអប្បបរមាផ្នែកវាយនភ័ណ្ឌ កាត់ដេរ និងផលិតស្បែកជើងសម្រាប់ឆ្នាំ២០១៩ជាលើកទី២ ដើម្បីពិភាក្សាឲ្យបានសមស្រប និងគ្រប់ជ្រុងជ្រោយដែលអាចទទួលយកបានពីគ្រប់ភាគី ដើម្បីផ្តល់ជាមូលដ្ឋានដល់គណៈកម្មការប្រឹក្សាការងារក្នុងការប្រជុំសម្រេច។
លោក ហេង សួរ អនុប្រធានលេខាធិការដ្ឋាននៃគណៈកម្មការប្រឹក្សាការងារក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា កិច្ចប្រជុំនេះបន្តផ្តោតសំខាន់លើការវិនិច្ឆ័យទាំង៧ចំណុចដដែល គឺបែបលក្ខណៈសង្គមនិងសេដ្ឋកិច្ច ដើម្បីធ្វើជាមូលដ្ឋានក្នុងការពិភាក្សា ព្រមទាំងលើកជាអនុសាសន៍ដល់គណៈកម្មការប្រឹក្សាការងារ ដើម្បីពិនិត្យសម្រេច ។ លោកបន្តថា សម្រាប់កិច្ចប្រជុំប្រាក់ឈ្នួលនេះ គ្រោងបញ្ចប់យ៉ាងយូរបំផុតត្រឹមថ្ងៃទី៥ ខែតុលាខាងមុខ (មុនបុណ្យភ្ជុំបិណ្ឌ) ។
គិតរហូតមកទល់បច្ចុប្បន្ននេះ ប្រាក់ឈ្នួលអប្បបរមា (ប្រាក់ខែគោល) របស់កម្មករនិយោជិតផ្នែកវាយនភ័ណ្ឌ កាត់ដេរ សម្លៀកបំពាក់និងផលិតស្បែកជើងមានចំនួន១៧០ដុល្លារអាមេរិកក្នុងមួយខែ ។ ជាមួយនឹងការដំឡើងប្រាក់ឈ្នួលកើនឡើងជារៀងរាល់ឆ្នាំ ប៉ុន្តែផលិតភាពក្នុងវិស័យនេះមិនមានភាពល្អប្រសើរនោះទេ ដែលជាក្ដីកង្វល់មួយរបស់ម្ចាស់រោងចក្រ ។
អគ្គលេខាធិការងសមាគមរោងចក្រកាត់ដេរកម្ពុជា លោកបណ្ឌិត កាំង ម៉ូនីកា បានថ្លែងថា ទោះជាមានការដំឡើងប្រាក់ឈ្នួលជាបន្តបន្ទាប់ក្តី ប៉ុន្តែផលិតភាពការងាររបស់កម្មករនិយោជិត មិនបានប្រសើរ ឬកើនឡើងដូចអ្វីដែលប្រាក់ខែពួកគេកើនឡើងជារៀងរាល់ឆ្នាំនោះទេ ។
លោកបន្តថា ៖« កម្ពុជាកំពុងប្រកួតប្រជែងយ៉ាងខ្លាំងជាមួយបណ្ដាប្រទេសក្នុងតំបន់ ។ កំណើនប្រាក់ឈ្នួលរបស់យើងកើនឡើងជារៀងរាល់ឆ្នាំ ហេតុនេះផលិតភាពការងារគួរតែកើនឡើងផងដែរ »។
កាលពីពេលថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថា ការដំឡើងប្រាក់ឈ្នួលគួរតែមានភាពសមស្របមួយ ខណៈបច្ចុប្បន្នប្រាក់ឈ្នួលនៅកម្ពុជាខ្ពស់ជាងគេរួចទៅហើយ ហេតុនេះយើងមិនអាចដំឡើងប្រាក់ឈ្នួលរហូតថៅកែរោងចក្របិទទ្វារ ឬចាកចេញពីកម្ពុជានោះទេ ។
សម្តេចថ្លែងថា ៖« យើងត្រូវថ្លឹងថ្លែងពីបញ្ហានេះ មិនមែនចេះតែដំឡើងរហូតដល់និយោជកមិនអាចទទួលយកបាន ហើយចាកចេញទៅប្រទេសផ្សេងៗឡើយ »។
តាមគម្រោងរបស់ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា កិច្ចប្រជុំសម្រេចអំពីការដំឡើងប្រាក់ឈ្នួល នឹងបញ្ចប់មុនពេលរដូវបុណ្យភ្ជុំបិណ្ឌមកដល់ខាងមុខនេះ ៕
ចែករំលែកព័តមាននេះ