រាជធានីភ្នំពេញ ៖ តំបន់អេកូទេចរណ៍ភូមិភាគឦសាន ជាកន្លែងសក្តានុពលដ៏សំខាន់មួយ ក្នុងចំណោមតំបន់ទេសចរណ៍ធម្មជាតិដទៃទៀតរបស់កម្ពុជា ដែលភាគច្រើនជាគោលដៅរបស់ភ្ញៀវទេសចរអន្តរជាតិទៅទស្សនាកម្សាន្ដ ។ បើតាមរបាយការណ៍ក្រសួងទេសចរណ៍ ក្នុងរយៈពេល៦ខែដំបូងនៃឆ្នាំនេះ ភ្ញៀវទេសចរអន្តរជាតិទៅកម្សាន្តនៅតំបន់នោះមានជាង៤ម៉ឺននាក់…
រាជធានីភ្នំពេញ ៖ តំបន់អេកូទេចរណ៍ភូមិភាគឦសាន ជាកន្លែងសក្តានុពលដ៏សំខាន់មួយ ក្នុងចំណោមតំបន់ទេសចរណ៍ធម្មជាតិដទៃទៀតរបស់កម្ពុជា ដែលភាគច្រើនជាគោលដៅរបស់ភ្ញៀវទេសចរអន្តរជាតិទៅទស្សនាកម្សាន្ដ ។ បើតាមរបាយការណ៍ក្រសួងទេសចរណ៍ ក្នុងរយៈពេល៦ខែដំបូងនៃឆ្នាំនេះ ភ្ញៀវទេសចរអន្តរជាតិទៅកម្សាន្តនៅតំបន់នោះមានជាង៤ម៉ឺននាក់ កើនឡើងជាង៩% ។
យោងតាមរបាយការណ៍ក្រសួងទេសចរណ៍បង្ហាញថា នៅក្នុងរយៈពេល៦ខែដើមឆ្នាំ២០១៨នេះ តំបន់អេកូទេសចរណ៍ភូមិភាគឦសានបានទាក់ទាញភ្ញៀវទេចរអន្តរជាតិទៅកម្សាន្តមានជាង៤,២ម៉ឺននាក់ស្មើនឹង១,២%នៃចំនួនសរុបពោលគឺមានការកើនឡើងប្រមាណ៩,២% បើធៀបនឹងគ្រាដូចគ្នានៃឆ្នាំ២០១៧ ។
កំណើននៃភ្ញៀវទេសចរអន្តរជាតិទៅកម្សាន្ដនៅតំបន់នេះ ត្រូវបានអ្នកជំនាញក្នុងវិស័យទេសចរណ៍យល់ឃើញថា ដោយសារតែការកសាង និងអភិវឌ្ឍហេដ្ឋារចនាសម្ព័ន្ធតភ្ជាប់ ដែលផ្តល់ភាពងាយស្រួលក្នុងការធ្វើដំណើរ និងការស្នាក់នៅជាដើម ហើយកត្តាដែលពិសេសនោះ ដោយសារប្រទេសជាតិមានសុខសន្ដិភាព និងស្ថិរភាពនយោបាយទូទាំងប្រទេស ។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ថា ៖« ដោយសារប្រព័ន្ធហេដ្ឋារចនាសម្ព័ន្ធផ្លូវថ្នល់តភ្ជាប់មានភាពងាយស្រួល និងការខិតខំផ្សព្វផ្សាយរបស់រាជរដ្ឋាភិបាល ក៏ដូចជាក្រសួងទេសចរណ៍ និងវិស័យឯកជន បានបង្កលក្ខណៈងាយស្រួលដល់ភ្ញៀវអន្តរជាតិទៅកម្សាន្ដនៅតំបន់នោះ ។ កត្តាដែលពិសេសនោះ គឺសន្ដិភាព និងសុវត្ថិភាព ដែលបានផ្ដល់ទំនុកចិត្តដល់ភ្ញៀវពីមួយរដូវទៅមួយរដូវ អាចឱ្យពួកគាត់ធ្វើដំណើរដល់គោលដៅបានដោយគ្មានការព្រួយបារម្ភ »។
លោកជំទាវបញ្ជាក់ថា ៖« តំបន់ភូមិភាគឦសាននេះ ថ្វីត្បិតតែមិនមានប្រាសាទបុរាណ ឬអ្វីទំនើបទាក់ទាញ ប៉ុន្តែយើងមានសក្តានុពលខ្ពស់ទៅលើធនធានមធ្មជាតិ គឺភ្ញៀវគាត់មានចំណាប់អារម្មណ៍បែបជាធម្មជាតិ ដូចជា ទឹកជ្រោះ, ព្រៃឈើ និងវប្បធម៌ ប្រពៃណីនៃការរស់នៅរបស់បងប្អូនជនជាតិភាគតិចជាដើម ។ ដូចនេះ ប្រសិនយើងចេះផ្សព្វផ្សាយឱ្យកាន់តែខ្លាំង ចេះថែរក្សានូវវប្បធម៌បែបភូមិភាគឦសាន គឺកាន់តែមានការទាក់ទាញខ្លាំងថែមទៀត មិនថាភ្ញៀវទេចរអឺរ៉ុបទេ សូម្បីតែភ្ញៀវអាស៊ាន ក៏ដូចជាទេសចរចិន ក៏មានការចាប់អារម្មណ៍ច្រើនដែរ »។
លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរី មានប្រសាសន៍ថា ៖« សម្រាប់តំបន់ភូមិភាគឦសាន ពិសេសនៅខេត្តមណ្ឌលគិរី មានតំបន់ទេសចរណ៍សក្តានុពលមានពីរផ្នែកគឺវប្បធម៌ ដែលមានជនជាតិភាគតិចរស់នៅចម្រុះគ្នា និងផ្នែកធម្មជាតិ គឺសម្បូរដោយព្រៃភ្នំ, ទេសភាព, សត្វព្រៃ ពិសេសធម្មជាតិមានភាពស្រស់ស្អាត ដែលបង្កើតបានជារមណីយដ្ឋានជាច្រើនផ្សេងទៀតនៅក្នុងតំបន់ »។
លោកបន្តថា ហេដ្ឋារចនាសម្ព័ន្ធទៅកម្សាន្តតាមតំបន់ទេសចរណ៍មានកន្លែងមួយចំនួនធ្វើបានល្អ តែមួយចំនួនទៀតមិនទាន់ល្អនៅឡើយ ហើយការអភិវឌ្ឍ និងការរៀបចំផ្តល់សេវាទៅភ្ញៀវ ហាក់នៅមានកម្រិត ដែលទាមទារឱ្យស្ថាប័នពាក់ព័ន្ធគិតគូរឡើងវិញ ព្រោះចំណុចទាំងនេះជាឧបសគ្គសម្រាប់វិស័យទេសចរណ៍ ។ លោកជំទាវ ឆាយ ស៊ីវលីន ក៏បានលើកឡើងពីឧបសគ្គនៅក្នុងវិស័យទេសចរណ៍ដែលកំពុងជួបប្រទះនៅតំបន់នេះផងដែរ ដូចជាការផ្ដល់សេវាដល់ភ្ញៀវទេសចរនៅមានកម្រិត ទាំងបន្ទប់ស្អាតសម្រាប់ស្នាក់នៅ, រមណីយដ្ឋាន នៅមានតិចតួច និងការផ្ដល់សេវាកម្មម្ហូបអាហារមិនទាន់សម្បូរបែបជាដើម ។ ចំណែកហេដ្ឋារចនាសម្ព័ន្ធទៅដល់គោលដៅទេសចរណ៍ដូចជា ទឹកជ្រោះ ឧទ្យានជាតិ និងរមណីយដ្ឋាននីមួយៗនៅមានជាបញ្ហាចោទ ហើយសហគមន៍នៅក្នុងតំបន់នោះមិនទាន់យល់ច្បាស់អ្វីជាសេវាកម្មទេសចរណ៍ ខណៈផលិតផលក្នុងស្រុកមិនទាន់ឆ្លើយតបតម្រូវការភ្ញៀវទេសចរនៅឡើយ ។
ទន្ទឹមនឹងនេះ ការផ្លាស់ប្តូរវប្បធម៌រស់នៅរបស់ប្រជាពលរដ្ឋក្នុងសហគមន៍ ក៏ជាចំណុចប្រឈមមួយដែរ ព្រោះភ្ញៀវទេចរជាតិ និងអន្តរជាតិដែលចំណាយពេលធ្វើដំណើររាប់រយគីឡូម៉ែត្រទៅកម្សាន្តទៅនោះ គឺចង់ឃើញអ្វីជាប្រពៃដើម ។ ដូចនេះត្រូវរក្សាវប្បធម៌ដើមឱ្យបានច្រើនជាងនៅពេលសព្វថ្ងៃ ដើម្បីរក្សានូវចំណុចពិសេសនេះ ។ នេះបើតាមការបញ្ជាក់របស់លោកជំទាវ ឆាយ ស៊ីវលីន ។
លោកជំទាវក៏បានសំណូមពរដល់ស្ថាប័នពាក់ព័ន្ធ គិតគូរឡើងវិញនូវការកសាងហេដ្ឋារចនាសម្ព័ន្ធទៅដល់គោលដៅសម្រាប់ភ្ញៀវ ដើម្បីផ្តល់ជាប្រយោជន៍ដល់ពលរដ្ឋក្នុងសហគមន៍ ដូចជា សាងសង់អ្វីមួយក្បែរនៅទីនោះ ដើម្បីឱ្យភ្ញៀវស្នាក់នៅបានយូរ និងចាយលុយបានច្រើននៅទីនោះជាដើម ។ ទន្ទឹមនឹងនេះ គួរគិតអំពីការកសាង និងបញ្ជ្រាបការយល់ដឹងដល់ពលរដ្ឋអំពីសេវាកម្មទេសចរណ៍បន្ថែមផងដែរ ៕
ចែករំលែកព័តមាននេះ