ខេត្តកំពង់ស្ពឺ ៖ អធិការនគរបាលស្រុកថ្ពង លោក ហ៊ុន សុខហុន អាចប្រឈមនឹងការដកចេញពីតំណែងក្រោយពលរដ្ឋប្តឹងទៅក្រសួងមហាផ្ទៃពីបទប៉ុនប៉ងមនុស្សឃាត ដែលកើតឡើងអស់រយៈពេលច្រើនឆ្នាំមកហើយ។ ថ្មីៗនេះស្រាប់តែបែកធ្លាយឯកសាររបស់ក្រសួងមហាផ្ទៃ បានបញ្ជូនលិខិតបញ្ជាឲ្យដាក់វិន័យរដ្ឋបាលដល់លោកវរសេនីយ៍ឯក…
ខេត្តកំពង់ស្ពឺ ៖ អធិការនគរបាលស្រុកថ្ពង លោក ហ៊ុន សុខហុន អាចប្រឈមនឹងការដកចេញពីតំណែងក្រោយពលរដ្ឋប្តឹងទៅក្រសួងមហាផ្ទៃពីបទប៉ុនប៉ងមនុស្សឃាត ដែលកើតឡើងអស់រយៈពេលច្រើនឆ្នាំមកហើយ។ ថ្មីៗនេះស្រាប់តែបែកធ្លាយឯកសាររបស់ក្រសួងមហាផ្ទៃ បានបញ្ជូនលិខិតបញ្ជាឲ្យដាក់វិន័យរដ្ឋបាលដល់លោកវរសេនីយ៍ឯក ហ៊ុន សុខហុន អធិការស្រុកថ្ពង ចេញពីតំណែង ដែលលិខិតនោះត្រូវបានបញ្ជូនមកតាំងពីពាក់កណ្តាលខែមិថុនា ឆ្នាំ២០១៨មកម្ល៉េះ។
ប្រភពពីមន្ត្រីនគរបាលខេត្តបានខ្សឹបខ្សៀវគ្នាថា «រឿងលោកអធិការស្រុកថ្ពងនេះ កុំថា លោកស្នងការ សូម្បីលិខិតរបស់រដ្ឋលេខាធិការចេញមកហើយនៅគេមិនហា៑នដកផង ព្រោះខ្នងបង្អែកគាត់ក្រាស់ណាស់ ថ្នាក់ខេត្តមិនអាចដកបានទេ ស្រួលមិនស្រួលរលាកខ្លួនឯងក៏ថាបាន។
បើគេដកបានគឺគេដកតាំងពីលិខិតរបស់ក្រសួងមហាផ្ទៃបានចេញ ស.ជ.ណ បញ្ជាឲ្យដាក់វិន័យរដ្ឋបាល០០៦ ដោយតម្រូវឱ្យឈ្មោះ ហ៊ុន សុខហុន មកនៅស្នងការដ្ឋាននគរបាលខេត្តតាំងពីខែ៦មកម្ល៉េះមិនមែនទុករហូតមកដល់ខែ៩នោះទេ។ ម្យ៉ាងលិខិតជូនដំណឹងនេះ គឺបានជំរាបមកលោកស្នងការនគរបាលខេត្តឱ្យកោះហៅមកឈរជើងនៅស្នងការក៏ដូចជា ដកហូតតំណែងអធិការស្រុកចេញពីអធិការដ្ឋាននគរបាលស្រុកថ្ពងតែម្តង។
លិខិតនោះទៀតសោតត្រូវបានដឹងថា ចុះហត្ថលេខាលោក ព្រំ សុខា រដ្ឋលេខាធិការក្រសួងមហាផៃ្ទ លេខ៩៩២ សផ៣ ចុះថ្ងៃទី១១ ខែមិថុនា ឆ្នាំ២០១៨ តាមចំណារលិខិតសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចុះថ្ងៃទី១០ ខែឧសភា ឆ្នាំ២០១៨។
លិខិតនេះ ត្រូវបានដឹងថា ខាងក្រសួងបានយោងតាមពាក្យបណ្ដឹងជនរងគ្រោះ២នាក់ ម្នាក់ឈ្មោះ ស៊ុន យឿន និងម្នាក់ទៀតឈ្មោះ ឃឹម ចន្ធា ចុះថ្ងៃទី២៦ ខែឧសភា ឆ្នាំ២០១៦ ដែលបានប្តឹងលោកវរសេនីយ៍ឯក ហ៊ុន សុខហុន អធិការស្រុកថ្ពង ពីបទប៉ុនប៉ងមនុស្សឃាតដោយចេតនា និងឆបោក។
យោងតាមពាក្យបណ្ដឹងរបស់ជនរងគ្រោះទាំង២នាក់ដាក់ជូនក្រសួងមហាផៃ្ទបានរៀបរាប់ថា កាលអំឡុងឆ្នាំ២០១២ លោក ហ៊ុន សុខហុន បានជួលពួកគាត់ឲ្យកត់បញ្ជីដីធ្លី ដោយឲ្យឈ្នួល១ហិកតា៥០ដុល្លារ។ លុះចប់ការងារពួកគាត់ទៅទារលុយនោះ តែលោក ហ៊ុន សុខហុន មិនព្រមឲ្យ ហើយថែមទាំងរកលេសចោទប្រកាន់លើពួកគាត់ថា ចេះអំពើអាបធ្មប់ ព្រមទាំងគំរាមសម្លាប់ផ្តាច់ជីវិតពួកគាត់ទៀតផង។ ដោយកើតទុក្ខមិនសុខចិត្តនឹងការឆបោកផង គំរាមសម្លាប់ផង ជនរងគ្រោះក៏នាំគ្នាដាក់ពាក្យបណ្តឹងចូលក្រសួងមហាផ្ទៃ និងតុលាការខេត្តកំពង់ស្ពឺ ឲ្យជួយរកយុត្តិធម៌។ ក្រោយទទួលពាក្យបណ្តឹងនេះ តុលាការក៏ធ្វើការតាមនីតិវិធី ដោយឡែកខាងក្រសួងក៏បានស្រាវជ្រាវ និងធ្វើរបាយការណ៍ដាក់ជូនសម្តេចក្រឡាហោមផងដែរ។
ក្រោយទទួលរបាយការណ៍ពីក្រសួងមហាផ្ទៃរួចមក សម្តេច ស ខេង បានប្រគល់ភារកិច្ចឲ្យលោក ព្រំ សុខា ជារដ្ឋលេខាធិការចាត់ការតាមនីតិវិធី ហើយលោករដ្ឋលេខាធិការក៏ចេញលិខិតលេខ៩៩២ សផ៣ ចុះថ្ងៃ១១ ខែមិថុនា ឆ្នាំ២០១៨ បញ្ជាមកស្នងការដ្ឋានខេត្តកំពង់ស្ពឺ អនុវត្តវិន័យកងកម្លាំង រួចក៏បញ្ជូនលិខិតមកសាលាខេត្តកាលពីព្រឹកថ្ងៃ១៩ មិថុនា ឆ្នាំ២០១៨ ដើម្បីអនុវត្តបន្ត។
គួរបញ្ជាក់ថា លោកសក្តិ៥ ហ៊ុន សុខហុន នេះ ពិតមែនមានត្រកូល «ហ៊ុន» ប៉ុន្តែមិនមែនសាច់ញាតិតេជោ ហ៊ុន សែន ទេ ។ គាត់គ្រាន់តែមានត្រូល «ហ៊ុន» ដែលធ្វើឱ្យមហាជនខ្លះយល់ច្រឡំក៏ខ្លាចឥទ្ធិពលគាត់ទៅ ។
ព័ត៌មានពិស្តារនឹងមានផ្សាយជូនក្នុងកាសែតកោះសន្តិភាព ។
ចែករំលែកព័តមាននេះ