ការប្រកួតប្រជែងក្នុងការផលិតស្មាតហ្វូនដែលអាចបត់បានកំពុងតែតានតឹងឡើងហើយ ។ តាមរបាយការណ៍ពី CNET បានឲ្យដឹងថា Samsung ចង់ចេញលក់ស្មាតហ្វូនដែលអាចបត់បាននៅចុងឆ្នាំនេះ ឬដើមឆ្នាំ២០១៩ ខណៈដែលសេចក្តីរាយការណ៍ពីសារព័ត៌មានកូរ៉េខាងត្បូងបានឲ្យដឹងថា Huawei ក៏ចង់យកឈ្នះក្រុមហ៊ុនកូរ៉េខាងត្បូងនេះ ដោយចេញលក់ស្មាតហ្វូនដែលអាចបត់បាននៅខែវិច្ឆិកាខាងមុខនេះដែរ ។
លោក Richard Yu នាយកប្រតិបត្តិរបស់ Huawei បានប្រាប់មកថា ក្រុមហ៊ុនលោកមាន គំរូស្មាតហ្វូនដែលអាចដំណើរការបានរួចជាស្រេចតាំងពីឆ្នាំ២០១៧មក ប៉ុន្តែ Samsung នៅតែចង់ឈ្នះ ។
កាលពីក្នុងអំឡុងកម្មវិធីចេញលក់ Galaxy Note 9 នៅដើមខែនេះ លោក DJ Koh នាយកប្រតិបត្តិរបស់ Samsung បានប្រាប់ដល់សារព័ត៌មានថា ពួកគេនឹងមិនធ្វើឲ្យពិភពលោករង់ចាំយូរទេចំពោះការចេញលក់ស្មាតហ្វូននេះ ។
វាច្បាស់ណាស់ថា ក្រុមហ៊ុនទាំងពីរមានចំណាប់អារម្មណ៍លើការផលិតស្មាតហ្វូននេះឲ្យបានមុនគ្នាទៅវិញទៅមក តើព្រោះតែមូលហេតុអ្វី ? មានហេតុផលមួយចំនួនត្រូវបានគេរកឃើញពីការចង់យកឈ្នះចាញ់នេះ ។
ជាដំបូង គឺព្រោះតែការចូលក្នុងទីផ្សារមុនគេ នឹងអនុញ្ញាតឲ្យក្រុមហ៊ុននេះតាំងខ្លួនជាអ្នកដឹកនាំក្នុងបច្ចេកវិទ្យាទូរស័ព្ទដែលអាចបត់បែនបានមុនគេជាប្រវត្តិសាស្ត្រ ។ វាមានគុណតម្លៃទាំងសម្រាប់ការផ្សព្វផ្សាយ និងគោលជំហរក្នុងវិស័យនេះ ព្រោះក្រុមហ៊ុនផលិតទូរស័ព្ទដទៃអាចនឹងចង់ទិញការអនុញ្ញាតឲ្យប្រើប្រាស់បច្ចេកវិទ្យារបស់អ្នកដែលនាំមុខនេះ ។
មូលហេតុទីពីរ គឺព្រោះតែស្មាតហ្វូនដែលអាចបត់បែនបាន ប្រៀបបានជាទីផ្សារស្មាតហ្វូនប្រភេទថ្មីមួយទៀតដែលអាចលូតលាស់បានច្រើន ។ Huawei និង Samsung ផ្តោតសំខាន់ទៅលើផ្នែកស្មាតហ្វូនកម្រិតខ្ពស់ ហើយការក្លាយជាក្រុមហ៊ុនទីមួយដែលផលិតស្មាតហ្វូន អាចបត់បែនបានកម្រិតខ្ពស់ អាចជួយដល់ពួកគេក្នុងការទាក់ទាញអតិថិជនពីដៃគូប្រកួតប្រជែងដូចជា Apple ជាដើម ។
មូលហេតុទីបី គឺវាផ្តល់ជាឱកាសដ៏ល្អក្នុងការផ្លាស់ប្តូររូបរាង និងការប្រើប្រាស់ស្មាតហ្វូន ដោយស្មាតហ្វូនដែលអាចបត់បែនបាន អាចផ្លាស់ប្តូរទម្លាប់របស់អ្នកប្រើប្រាស់ ។ ប្រាកដណាស់ កម្មវិធីលើទូរស័ព្ទទាំងនេះ អាចទាញអត្ថប្រយោជន៍កាន់តែច្រើនពីបច្ចេកវិទ្យា3D និង Virtual reality (VR) ឬ Augmented reality (AR) ជាដើម ។
ក្នុងរយៈពេលខ្លី ទូរស័ព្ទដែលអាចបត់បែនបាននេះ មិនអាចជំនួសស្មាតហ្វូនដែលមានប្រជាប្រិយភាព ឬកុំព្យូទ័រ និងថេប្លែតបានឡើយ ប៉ុន្តែពួកវាជាឧបករណ៍សម្រាប់ Huawei និង Samsung ក្នុងការជៀសវាងការអន់ថយក្នុងទីផ្សារដែលកំពុងតែមានការប្រកួតប្រជែងយ៉ាងខ្លាំង ។
គួររំឭកថា Huawei បានដណ្តើមតំណែងរបស់Apple ជាក្រុមហ៊ុនលក់ស្មាតហ្វូនបានច្រើនជាងគេលេខពីរកាលពីត្រីមាសទី២នាឆ្នាំ២០១៨កន្លងមកនេះ ។
យោងទៅតាមរបាយការណ៍របស់ Gartner បានឲ្យដឹងថា Huawei បានដណ្តើមតំណែងនេះជាមួយនឹងចំនួនលក់ប្រមាណ៤៩លានគ្រឿង ខណៈដែល Apple ត្រូវបានរុញដល់ចំណាត់ថ្នាក់លេខ៣វិញ ជាមួយនឹងចំនួនលក់បាន៤៤លានគ្រឿង ។ ចំណែកឯ Samsungវិញ បានបន្តតំណែងជាក្រុមហ៊ុនលក់ស្មាតហ្វូនបានច្រើនជាងគេដដែល បើទោះចំនួនលក់បានធ្លាក់ចុះ១២,៧%កាលពីត្រីមាសទី២ក៏ដោយ ។
គួរបញ្ជាក់ថា ការលក់ស្មាតហ្វូនសរុបនៅទូទាំងពិភពលោក បានកើនឡើង២%កាលពីត្រីមាសទី២ឆ្នាំ២០១៨នេះ មកស្មើ៣៧៤លានគ្រឿង ៕
ចែករំលែកព័តមាននេះ