រាជធានីភ្នំពេញ ៖ ប្រទេសកម្ពុជាត្រូវបានគេមើលឃើញថា មានការលូតលាស់ខ្លាំងលើការប្រើប្រាស់់ប្រព័ន្ធអុីនធើរណេត និងបណ្តាញសង្គមហ្វេសប៊ុកចាប់តាំងពីឆ្នាំ២០០០រហូតមកដល់បច្ចុប្បន្ន ។ ទោះយ៉ាងក៏ដោយ ចំនួននៃការកើនឡើងរបស់អ្នកប្រើប្រាស់នេះ នៅមានកម្រិតនៅឡើយ បើធៀបទៅនឹងបណ្តាប្រទេសមួយចំនួននៅក្នុងតំបន់អាស៊ីអាគ្នេយ៍…
រាជធានីភ្នំពេញ ៖ ប្រទេសកម្ពុជាត្រូវបានគេមើលឃើញថា មានការលូតលាស់ខ្លាំងលើការប្រើប្រាស់់ប្រព័ន្ធអុីនធើរណេត និងបណ្តាញសង្គមហ្វេសប៊ុកចាប់តាំងពីឆ្នាំ២០០០រហូតមកដល់បច្ចុប្បន្ន ។ ទោះយ៉ាងក៏ដោយ ចំនួននៃការកើនឡើងរបស់អ្នកប្រើប្រាស់នេះ នៅមានកម្រិតនៅឡើយ បើធៀបទៅនឹងបណ្តាប្រទេសមួយចំនួននៅក្នុងតំបន់អាស៊ីអាគ្នេយ៍ ។
យោងតាមការចេញផ្សាយដោយនិយ័តករ ទូរគមនាគមន៍កម្ពុជាបានឲ្យដឹងថា ពាក់កណ្តាលឆ្នាំ២០១៨នេះ ស្ថិតិនៃអ្នកប្រើប្រាស់អុីនធើរណេតក្នុងប្រទេសកម្ពុជា មានប្រមាណ១០,៩លាននាក់ ។ ដោយឡែកចំនួនអ្នកប្រើប្រាស់បណ្តាញព័ត៌មានសង្គម មានប្រហែល៦លាន២សែននាក់ ។
ថ្លែងនៅក្នុងពិធីបើកសិក្ខាសាលាស្តីអំពី « សន្តិសុខ និងឯកជនភាពក្នុងការប្រើប្រាស់បណ្តាញព័ត៌មានសង្គម » កាលពីថ្ងៃទី២៩ សីហា កន្លងមក លោក ជុន វ៉ាត អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន បានឲ្យដឹងថា តាមការអង្កេតរបស់នាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មានឃើញថា ក្នុងរយៈពេលប៉ុន្មានខែចុងក្រោយនេះ ជនរងគ្រោះដោយការវាយប្រហាលួចគណនីបណ្តាញព័ត៌មានសង្គម មានការកើនឡើងគួរឲ្យកត់សម្គាល់ ដោយភាគច្រើនទៅលើមន្ត្រីរាជការទូទៅ ដែលក្នុងនោះក៏មានមន្ត្រីរាជការនៃក្រសួងប្រៃសណីយ៍ និងទូរគមនាគមន៍ផងដែរ ។
លោកបន្តថា ៖« ដើម្បីលើកកម្ពស់ការយល់ដឹងអំពីបញ្ហាសន្តិសុខ និងសុវត្ថិភាពក្នុងការប្រើប្រាស់បណ្តាញព័ត៌មានសង្គមដល់មន្ត្រីរាជការថ្នាក់កណ្តាលរបស់ក្រសួង ទើបមានការរៀបចំសិក្ខាសាលានេះឡើង »។
សិក្ខាសាលានេះ មានគោលបំណង ដើម្បីធ្វើការផ្តោតសំខាន់ទៅលើលក្ខណៈសុវត្ថិភាពមួយចំនួននៃការប្រើប្រាស់អុីម៉ែល, បណ្តាញព័ត៌ មានសង្គមហ្វេសប៊ុក និងយល់ដឹងអំពីហានិភ័យនានាដែលអាចកើតមានឡើងចំពោះខ្លួនអ្នក ។
យោងតាមស្ថិតិចុងក្រោយបង្អស់របស់ធនាគារពិភពលោក បានឲ្យដឹងកាលពីកន្លងទៅនេះថា ចំនួនអ្នកប្រើប្រាស់អុីនធើរណេតនៅកម្ពុជាកើនឡើង៥%ក្នុងមួយឆ្នាំៗ ៕
ចែករំលែកព័តមាននេះ