ខេត្តព្រៃវែង ៖ ដើម្បីជួយសំរាលទុក្ខលំបាក និងការខ្វះខាតរបស់បងប្អូនប្រជាពលរដ្ឋក្នុងខេត្តព្រៃវែង ដែលកំពុងរងគ្រោះដោយសារគ្រោះទឹកជំនន់ នៅព្រឹកថ្ងៃទី៥កញ្ញា កាកបាទក្រហមកម្ពុជាសាខាខេត្តព្រៃវែង បាននាំយកអំណោយមនុស្សធម៌ទៅចែកជូនដល់បងប្អូនប្រជាពលរដ្ឋចំនួន៣៥១គ្រួសារ នៅក្នុងស្រុកពាមរក៌ និងស្រុកពាមជរ។
ជនរងគ្រោះនៅក្នុងស្រុកពាមរក៍ដែលទទួលបានអំណោយមនុស្សធម៌នេះ មានចំនួន២០១គ្រួសារ ដែលក្នុង១គ្រួសារៗទទួលបានអង្ករ២៥គីឡូ ត្រីខ១យួរ មី១កេស សារុង១ ក្រមា១ ភួយ១ មុង១ ជាអំណោយរបស់កាកបាទក្រហម និងថវិកា២ម៉ឺនរៀលជាអំណោយផ្ទាល់ខ្លួនរបស់លោក ជា សុមេធី អភិបាលខេត្ត និងលោកជំទាវ។ ចំណែកនៅស្រុកពាមជរ ពលរដ្ឋរងគ្រោះដែលទទួលបានអំណោយមានចំនួន១៥០គ្រួសារ អំណោយដែលផ្តល់ជូនជារបស់លោក ស សុខា ប្រធានសហភាពសហពន្ធ័យុវជនកម្ពុជាខេត្តព្រៃវែង ផ្តល់ជូនតាមរយៈកាកបាទក្រហមកម្ពុជាខេត្តព្រៃវែង។
បើយោងតាមរបាយការណ៍របស់គណៈកម្មការគ្រោះមហន្តរាយខេត្តព្រៃវែងបានអោយដឹងថា គិតត្រឹមល្ងាចថ្ងៃទី៣កញ្ញា ទឹកជំនន់បានបង្កផលប៉ះពាល់មកលើខេត្តព្រៃវែងចំនួន១១ក្រុងស្រុក ស្មើនិង៧៣ឃុំ និង៣៦៥ភូមិ ក្នុងនោះបានបណ្តាលអោយមនុស្សស្លាប់ចំនួន១៦នាក់ រងរបួសចំនួន៨នាក់ និងឈឺចំនួន១៩២នាក់។
ប្រជាពលរដ្ឋរងគ្រោះសរុបមានចំនួនជាង៣ម៉ឺនគ្រួសារ ជម្លៀសទៅទីទួលសុវត្ថិភាពចំនួន៤៧៣គ្រួសារ និងសត្វគោក្របីចំនួន១៨៥៤ក្បាល ជន់លិចស្រូវចំនួនជាង២ម៉ឺន៥ពាន់ហិកតា ក្នុងនោះខូចខាតជាង១ម៉ឺនហិកតា ប៉ះពាល់ដំណាំផ្សេងៗចំនួន១៨៧ហិកតា លិចខូចផ្លូវកៅស៊ូប្រវែង២០០ម៉ែត្រនៅស្រុកពារាំង លិចខូចផ្លូវលំប្រវែងជិត៩ម៉ឺនម៉ែត្រ លិចបរិវេណសាលារៀនចំនួន៧២កន្លែង លិចមណ្ឌលសុខភាពចំនួន៣ លិចអណ្តូងទឹកចំនួន១៣៩៩អណ្តូង លិចបង្គន់ចំនួន២២៨៥បង្គន់ លិចបរិវេណវត្តចំនួន៥វត្ត ប៉ះពាល់ទំនប់និងប្រឡាយប្រវែងជាង២២ម៉ឺនម៉ែត្រ ក្នុងនោះខូចប្រវែង៦៦៩១ម៉ែត្រ៕
ចែករំលែកព័តមាននេះ