រាជធានីភ្នំពេញ ៖ រូបសំណាកសម្តេចសង្ឃរាជជួន ណាត ធ្វើពិធីអភិសេកគោរពបូជា កាលពីរសៀលថ្ងៃទី០៣ កញ្ញា ឆ្នាំ២០១៨ នាបរិវេណវិទ្យាល័យទួលទំពូងរាជធានីភ្នំពេញ នាយកវិទ្យាល័យ…
រាជធានីភ្នំពេញ ៖ រូបសំណាកសម្តេចសង្ឃរាជជួន ណាត ធ្វើពិធីអភិសេកគោរពបូជា កាលពីរសៀលថ្ងៃទី០៣ កញ្ញា ឆ្នាំ២០១៨ នាបរិវេណវិទ្យាល័យទួលទំពូងរាជធានីភ្នំពេញ នាយកវិទ្យាល័យ និងបុគ្គលិក ក្រោមឱវាទសិស្សានុសិស្ស ព្រមទាំងគណៈអធិបតីបានមកជួបជុំគ្នាសម្ពោធដាក់ឲ្យប្រើប្រាស់រូបសម្តេចសង្ឃ ជួន ណាត ជាផ្លូវការ ដើម្បីរំលឹកគុណបិតាអក្សរសាស្ត្រខ្មែរដ៏មានស្នាដៃសម្រាប់កុលបុត្រកុលធីតាជំនាន់ក្រោយ ។
នាឱកាសនោះមានវត្តមានលោក អ៊ាង សុផល្លែត ទីប្រឹក្សាផ្ទាល់សម្តេច តេជោ ហ៊ុន សែន និងជាអនុរដ្ឋលេខាធិការក្រសួងបរិស្ថាន ជាអតីតសិស្សបាក់ឌុបជំនាន់ឆ្នាំ១៩៨០ជាង ដោយលោកបាន កៀង គយប្រមូលថវិកាពីសិស្សរួមជំនាន់ក្នុង និងក្រៅប្រទេស ដើម្បីដឹងគុណលោកគ្រូ អ្នកគ្រូ កាលបង្រៀនកន្លងទៅ ព្រមទាំងលោកគ្រូ អ្នកគ្រូ បច្ចុប្បន្ននេះ ។ លោកបានមានប្រសាសន៍ថា កម្មវិធីនេះបានប្រារព្ធឡើង ដោយសិស្សបាក់ឌុបជំនាន់ទី១ ដោយប្រមូលបានបច្ច័យចំនួន១ម៉ឺនដុល្លារ កសាងរូបសំណាកនេះឡើង ក្នុងន័យទុកជាការតម្កល់ជានិមិត្តរូបក្នុងការគោរពនូវចំណេះដឹងសីលធម៌ ព្រមទាំងគុណតម្លៃ ។
លោកបន្តថា ដោយធ្លាប់រៀនសូត្រក្នុងវិទ្យាល័យនេះ តាំងពីឆ្នាំ១៩៨២ មក ទើបឃ្លាតឆ្ងាយបែបណាក៏នៅតែដក់ជាប់នូវភាពកម្សត់កម្រអនុស្សាវរីយ៍ជាច្រើនពេលសិក្សា ។ កន្លងមកលោកបានបង្កើតមូនិធិសម្រាប់សិស្សពូកែសិស្សល្អ១០ឆ្នាំ កន្លងមក ហើយក៏បានបញ្ចប់ទៅនិងមានផែនការរៀបចំឡើងវិញ ទៅថ្ងៃក្រោយទៀត ។ ពីមុនៗធ្លាប់ជួយកសាងដែរ ប៉ុន្តែនេះជាសមិទ្ធិផលដែលធំជាងគេ ព្រោះយល់ថា សម្តេចសង្ឃជួន ណាត ពិសេសណាស់ឲ្យជំនាន់ក្រោយចង់ចាំព្យាយាមធ្វើគម្រូតាមគាត់ទាំងសីលធម៌ អក្សរសាស្ត្រ ទាំងការបណ្តុះបណ្តាលវប្បធម៍ខ្មែរយើងផងដែរ ។ បន្ថែមលើសពីនេះលោកក៏ឆ្លៀតឧបត្ថម្ភចំនួន៤០០០ពាន់ដុល្លារដល់បណ្ណាល័យ ក្នុងវិទ្យាល័យទួលទំពូង ដើម្បីទិញកៅអីតុ ។
លោកសិង ស៊ីថុន នាយកវិទ្យាល័យបានសម្តែងការអរគុណចំពោះម្ចាស់ជំនួយជាអតីតសិស្សវិទ្យាល័យទួលទំពូង ដែលបាននឹកអាល័យនឹក គិតជួយសាលាមិនទុកចោលទៅដល់ទីណាកន្លែងណានៅតែនឹកឃើញ ។ រូបសំណាកខាងលើធ្វើពីស្ព័ននឹងក្លាយជាតំណាងភាពចេះដឹងគោរពស្រឡាញ់របស់សិស្សជំនាន់ក្រោយឲ្យធ្វើគម្រូតាមផងដែរ ៕
ចែករំលែកព័តមាននេះ