រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី៤ កញ្ញា បានប្រកាសសាលក្រមសម្រេចផ្ដន្ទាទោសថៅកែគ្រឿងបន្លាស់រថយន្តម្នាក់ ដាក់ពន្ធនាគារកំណត់៩ខែ ក្រោមការចោទប្រកាន់ពីបទ.ឆបោក និងបង្គាប់ឲ្យសងប្រាក់ទៅដើមបណ្ដឹងចំនួន៣៥២៤៨០០ដុល្លារអាមេរិក និងសងជំងឺចិត្តចំនួន២០០លាន រៀល ។ សាលក្រមនេះបានបើកផ្លូវទុកឲ្យប្តឹងឧទ្ធរណ៍តាមកំណត់ច្បាប់ រវាងភាគីណាមួយកើតទុកមិនសុខចិត្ត ។
ជនជាប់ចោទឈ្មោះ អឿ អឿន ហៅ សំអឿន អាយុ៥៧ឆ្នាំ ជាថៅកែគ្រឿងបន្លាស់រថយន្ត មានអាស័យដ្ឋានស្ថិតនៅមហាវិថីកម្ពុជាក្រោម សង្កាត់មិត្តភាព ខណ្ឌ៧មករា ។ ដើមចមរឿងឆបោកប្រាក់នេះ ផ្តើមចេញពីឈ្មោះ អឿ អឿន បានយកប្រាក់ពីដើមបណ្តឹងទៅរត់ការយកអាជ្ញាប័ណ្ណនាំឈើចេញទៅក្រៅប្រទេស ដែលមានតម្លៃលើទឹកប្រាក់ប្រមាណជាង៥លានដុល្លារអាមេរិក គិតជាបរិមាណឈើគឺជាង២០០កុងធេន័រ ។ ប៉ុន្តែជនជាប់ចោទឈ្មោះ អឿ អឿន មិនបានបំពេញកតព្វកិច្ចចំពោះកិច្ចសន្យានោះទេ ពោលគឺបានត្រឹម តែ ១០០កុងធែន័រទេ នៅសល់ជាង១០០កុងធែន័រទៀត មានន័យថា ស៊ីដាច់ប្រាក់ជាង៣លានដុល្លារអាមេរិក ទើបត្រូវបានគេប្តឹង ។
ចម្លើយនៅក្នុងសវនាការជនជាប់ ចោទ បានបដិសេធថាខ្លួនមិនបានកេងបំបាត់ប្រាក់របស់ដើមបណ្ដឹងទេ អ្វីៗខ្លួនបានបំពេញកតព្វកិច្ចប្រគល់អាជ្ញាប័ណ្ណនោះឲ្យទៅម្ចាស់ឈើអស់ហើយ ។
ចម្លើយដើមបណ្ដឹង និងសាក្សីចំនួន៥ នាក់បានឆ្លើយប្រហាក់ប្រហែលគ្នាថា នៅអំឡុងឆ្នាំ២០១៤ ពួកគេបានប្រគល់ប្រាក់ជាបន្តបន្ទាប់ចំនួន១១លើកឲ្យទៅឈ្មោះ អឿ អឿន ដើម្បីរត់ការមកក្រុមហ៊ុនទ្រីភាពនាំឈើជំពូកអឹម៨ មានតម្លៃជាង៥លានដុល្លារអាមេរិក គោលដៅចេញទៅក្រៅប្រទេស ។ ប៉ុន្តែក្នុងអំឡុងពេលនោះដើមបណ្តឹងបានទទួលអាជ្ញាប័ណ្ណនាំចេញតែ១០០កុងធែន័រ នៅសល់ជាង១០០កុងធែន័តទៀត ហើយឈ្មោះ អឿ អឿន មិនបំពេញកាតព្វកិច្ចប្រគល់អាជ្ញាប័ណ្ណថែមទៀតទេ ព្រមទាំងគេចវេសមិនទទួលខុសត្រូវទៀតផង ។
តំណាងអយ្យការលោកស្រី ស៊ឺ វណ្ណនី បានសន្និដ្ឋានប្ដូរបទចោទពីឆបោក មកជាបទរំលោភលើទំនុកចិត្តវិញ ហើយបានស្នើឲ្យចៅក្រមសម្រេចតាមផ្លូវច្បាប់ ។
គួរបញ្ជាក់ថា កាលពីថ្ងៃទី២៨ កក្កដា ២០១៧ លោក រស់ ពិសិដ្ឋ ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសឈ្មោះ អឿ អឿន ដាក់ពន្ធនាគារកំណត់១៨ខែ និង បង្គាប់ឲ្យសងប្រាក់ទៅដើមបណ្ដឹងឈ្មោះ Shao Jianfen ជាជនជាតិចិនចំនួន៨០ម៉ឺនដុល្លារអាមេរិក និង សងប្រាក់ជំងឺចិត្តចំនួន៦០០លានរៀល ក្រោមការចោទ ប្រកាន់ពីបទ.មិនបំពេញកតព្វកិច្ចចំពោះឧបករដែលអាចជួញដូរបាន (ចេញសែកស្អុយ ) ម្តងរួចមកហើយ ដែលរឿងក្ដីនេះសាលាដំបូងបានបើកសវនាការកាលពីថ្ងៃទី១៧ កក្កដា ២០១៧ ។ ជនជាប់ចោទឈ្មោះ អឿ អឿន ក៏បានទទួលស្គាល់ថាពិតជាបានចេញសែកដែលមានទឹកប្រាក់ចំនួន៨០ម៉ឺនដុល្លារអាមេរិក ឲ្យទៅដើមបណ្ដឹងមែន តែក្នុងធនាគារគ្មានប្រាក់ ។
ជនសង្ស័យ អឿ អឿន បន្តថា នៅអំឡុងឆ្នាំ២០១៥ ខ្លួនបានចុះកិច្ចសន្យាជាមួយជនជាតិចិន ក្នុងការប្រមូលទិញឈើពីក្រុមហ៊ុនទ្រី ភាព ក្នុងមួយខែឲ្យបាន៤០កុងទែន័រ ប៉ុន្តែក្រោយមករដ្ឋាភិបាលបានបិទមិនឲ្យមានឈើចេញ ទើបខ្លួនមិនអាចប្រមូលទិញឈើបានតាមកិច្ចសន្យា ។
គួរបញ្ជាក់ទៀតថា នារសៀលថ្ងៃទី១៥ កញ្ញា ឆ្នាំ ២០១៦ លោក សេង លាង ចៅក្រមស៊ើបសួរសាលាដំបូងរាជធានីភ្នំពេញបានសម្រេចឃុំខ្លួនឈ្មោះ អឿ អឿន ថៅកែលក់គ្រឿងបន្លាស់រថយន្ត ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន តាមមាត្រា២៣១ នៃច្បាប់ស្ដីពីឧបករណ៍អាចជួញដូរបាន ។
ឈ្មោះ អឿ អឿន ត្រូវបានសមត្ថកិច្ចនគរបាលព្រហ្មទណ្ឌក្រសួងមហាផ្ទៃ ឃាត់ខ្លួននៅថ្ងៃទី១៤ កញ្ញា ២០១៦ តាមដីកាបញ្ជាឲ្យចូលខ្លួនរបស់លោក ខាំ សុផារី ព្រះរាជអាជ្ញារងអមសាលាដំបូងរាជធានីភ្នំពេញ ៕
ចែករំលែកព័តមាននេះ