រាជធានីភ្នំពេញ ៖ ក្រោយពីគណៈកម្មការជាតិរៀបចំការបោះឆ្នោត (គជប) បានប្រកាសលទ្ធផលបោះឆ្នោតជាផ្លូវការរួចមក បេក្ខជនដែលគណបក្សប្រជាជនកម្ពុជាបានដាក់តាមលំដាប់នោះបានជាប់ជាអ្នកតំណាងរាស្ត្រ ជាស្ថាពរហើយ ប៉ុន្តែអ្វីដែលគេចង់ដឹងនោះ គឺតើអ្នកតំណាងរាស្ត្រណាខ្លះ ដែលមានអាយុច្រើន…
រាជធានីភ្នំពេញ ៖ ក្រោយពីគណៈកម្មការជាតិរៀបចំការបោះឆ្នោត (គជប) បានប្រកាសលទ្ធផលបោះឆ្នោតជាផ្លូវការរួចមក បេក្ខជនដែលគណបក្សប្រជាជនកម្ពុជាបានដាក់តាមលំដាប់នោះបានជាប់ជាអ្នកតំណាងរាស្ត្រ ជាស្ថាពរហើយ ប៉ុន្តែអ្វីដែលគេចង់ដឹងនោះ គឺតើអ្នកតំណាងរាស្ត្រណាខ្លះ ដែលមានអាយុច្រើន និងតិចជាងគេ ។
កោះសន្តិភាពសុំលើកយកបេក្ខជនដែលជាប់ជាអ្នកតំណាងរាស្ត្រសម្រាប់ការបោះឆ្នោត ជ្រើសតាំងអ្នកតំណាងរាស្ត្រ អាណត្តិទី៦ ដែលមានវ័យចាស់ជាងគេ និងវ័យក្មេងជាងគេឲ្យអ្នកអានបានដឹង រួមមាន ទី១- សម្តេចពញ្ញាចក្រី ហេង សំរិន កើតនៅថ្ងៃទី២៥ ខែឧសភា ឆ្នាំ១៩៣៤ មកពីគណបក្សប្រជាជនកម្ពុជាកាន់នៅមណ្ឌលត្បូងឃ្មុំ ទី២- សម្តេចចៅហ្វាវាំងគង់ សំអុល កើតថ្ងៃទី០១ ខែវិច្ឆិកា ១៩៣៦ មកពីគណបក្សប្រជាជនកម្ពុជា កាន់នៅមណ្ឌលកំពង់ឆ្នាំង ទី៣- លោក ប៉ែន បញ្ញា កើតនៅថ្ងៃទី២១ ខែតុលា ១៩៤១ មកពីគណបក្សប្រជាជនកម្ពុជា ទី៤- លោក ហ៊ូ ស្រ៊ី កើតនៅថ្ងៃទី២១ ខែមករា ១៩៤២ មកពីគណបក្សប្រជាជនកម្ពុជា កាន់នៅមណ្ឌលភ្នំពេញ និងទី៥- លោក ពេជ្រ គឹមស្រ៊ាង កើតនៅថ្ងៃទី០២ ខែមិថុនា ១៩៤២ មកពីគណបក្សប្រជាជនកម្ពុជា កាន់នៅមណ្ឌលភ្នំពេញ ។
ចំណែកបេក្ខជនអ្នកតំណាងរាស្ត្រដែលមានវ័យក្មេងជាងគេរបស់គណបក្សប្រជាជនកម្ពុជា ចំនួន៥រូបរួមមានទី១- លោក យឹម លាត កើតនៅថ្ងៃទី០១ ខែតុលា ១៩៨៦ មកពីគណបក្សប្រ ជាជនកម្ពុជា កាន់នៅមណ្ឌលកំពង់ធំ ទី២- លោក សុខ សូកាន កើតនៅថ្ងៃទី១១ ខែមិថុនា១៩៨៣ មកពីគណបក្សប្រជាជនកម្ពុជា កាន់នៅមណ្ឌលតាកែវ ទី៣- លោក ហ៊ុន ម៉ានី កើតនៅថ្ងៃទី ២៧ ខែវិច្ឆិកា ១៩៨២ មកពីគណបក្សប្រជាជនកម្ពុជា កាន់នៅមណ្ឌលកំពង់ស្ពឺ ទី៤- លោក នង វាសនា កើតថ្ងៃទី០៩ ខែមិថុនា ១៩៨២ មកពីគណបក្សប្រជាជនកម្ពុជាកាន់នៅមណ្ឌលកំពង់ធំ និងទី៥- លោក ស សុខា កើតនៅថ្ងៃទី០៤ ខែមិថុនា ១៩៨១ មកពីគណបក្សប្រជាជនកម្ពុជាកាន់នៅមណ្ឌលព្រៃវែង ។
ទាក់ទិននឹងបេក្ខជនដែលដែលមានវ័យចាស់គេ ក្នុងអាណត្តិទី៦ រដ្ឋសភានេះត្រូវបានអ្នកនាំពាក្យគណបក្សប្រជាជនកម្ពុជា លោក សុខ ឥសាន បានឲ្យដឹងនៅថ្ងៃទី៣ កញ្ញាថា មិនមានការផ្លាស់ប្តូរនោះ ។ លោកបន្តថា មានការផ្លាស់ប្តូរទៅតាមរដ្ឋធម្មនុញ្ញ លុះត្រាមានការសុំលាលែងពីសមាជិកសភា បន្ទាប់ពីប្រកាសសុពលភាពរួចរាល់ ។ អ្នកដែលត្រូវចូលកាន់តំណែងនោះ ធ្វើតាមបញ្ជីឈ្មោះដែលដាក់ទៅកាន់គណៈកម្មាធិការជាតិរៀបចំការបោះឆ្នោត ។
ជាមួយគ្នានោះដែរអ្នកនាំពាក្យគណបក្សរូបនេះក៏បានឲ្យដឹងថា សម្រាប់អាណត្តិទី៦ សមាជិករាជរដ្ឋាភិបាលដែលមានតួនាទី ជារដ្ឋមន្ត្រីនៅតាមក្រសួងស្ថាប័នណាមួយអាចនឹងមានការលាលែងពីសមាជិកសភាផងដែរ បន្ទាប់ពីប្រកាសសុពលភាពរួចរាល់ ។
លោកបញ្ជាក់ថា «តាមច្បាប់រដ្ឋធម្មនុញ្ញនៅពេលប្រកាសសុពលភាពរួច សមាជិករដ្ឋាភិបាល ដែលអាចធ្វើការលាលែងពីសមាជិកភាពអ្នកតំណាងរាស្ត្របាន ហើយអ្នកដែលត្រូវជំនួស នោះ គឺបេក្ខជនដែលគណបក្សដាក់លេខរៀងបន្ទាប់» ។ យ៉ាងណាក្តីរហូតមកដល់ពេលអ្នកនាំពាក្សគណបក្សប្រជាជនកម្ពុជាមិនអាចទម្លាយឲ្យដឹងបេក្ខជនអ្នកតំណាងរាស្ត្រដែលមានតួនាទីជារដ្ឋមន្ត្រីដែលកំពុងបម្រើការនៅតាមក្រសួងរូបណានឹងធ្វើការលែងលែងពីអ្នកតំណាងរាស្ត្រ ឬសមាជិកសភានោះទេ ។
សូមជម្រាបថា ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ មានគណបក្សនយោបាយចំនួន២០ ចូលរួមប្រកួតប្រជែងគ្នា ប៉ុន្តែមានគណបក្សប្រជាជនកម្ពុជាប៉ុណ្ណោះទទួលបានសម្លេងគាំទ្រ លើសរហូតទទួលបានអាសនៈក្នុងរដ្ឋសភាទាំងអស់១២៥តែម្តង ៕
ចែករំលែកព័តមាននេះ