រាជធានីភ្នំពេញ ៖ រាជរដ្ឋាភិបាលកម្ពុជាតាមរយៈក្រសួងឧស្សាហកម្ម និងសិប្បកម្ម នឹងចាប់ផ្តើមអនុវត្តគម្រោងចំនួន៣ ដើម្បីលើកស្ទួយវិស័យសហគ្រាសធុនតូច និងមធ្យមនៅកម្ពុជា ដែលត្រូវបានចាត់ទុកជាឆ្អឹងខ្នងនៃសេដ្ឋកិច្ចជាតិ ។
ថ្លែងនៅក្នុងពិធីពិព័រណ៍សហគ្រាសធុនតូច និងមធ្យមរយៈពេលពីរថ្ងៃ ចាប់ពីថ្ងៃទី១ដល់២ ខែកញ្ញា ម្សិល មិញ លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម បានលើកឡើងថា រាជរដ្ឋា ភិបាលនឹងអនុម័តលើគម្រោង៣សំខាន់ៗសម្រាប់លើកស្ទួយដល់សហគ្រាសធនតូច និងមធ្យមក្នុងនោះមានដូចជា ការលើកស្ទួយវិស័យម្ហូបអាហារ, ការជួយបណ្ដុះបណ្ដាលសហគ្រិនភាព និងការអភិវឌ្ឍជំនាញ ។
លោកបញ្ជាក់ថា ៖« គម្រោងទាំងនេះ នឹងចាប់ផ្ដើមនៅឆ្នាំ២០១៩ ដើម្បីជំរុញដល់សហគ្រាសខ្នាតតូច និងមធ្យមនៅកម្ពុជាឲ្យកាន់តែរីកចម្រើន ដើម្បីកាត់បន្ថយការនាំចូល និងពង្រីកការនាំចេញ »។
លោកបន្តថា ៖« សព្វថ្ងៃកម្ពុជាមានសហគ្រាសប្រមាណ៥២ម៉ឺនសហគ្រាស ដោយក្នុងនោះជាង៩៩% ជាសហគ្រាសធនតូចបំផុត និងមធ្យម ។ កំណើនដ៏ច្រើននៃសហគ្រាសធនតូចនិងមធ្យមនេះ បានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ »។
គិតត្រឹមដំណាច់ឆ្នាំ២០១៧ វិស័យឧស្សាហកម្ម និងសិប្បកម្មបានរួមចំណែករហូតដល់៣០%នៃផលទុនជាតិសរុប ដែលដើរលឿនជាងផែនការរហូតដល់៨ឆ្នាំ ដោយផែនការបានគិតថា ទាល់តែឆ្នាំ២០២៥ ទើបសម្រេចបាន៣០% ដែលវិស័យនេះអាចរួមចំណែកផលទុបជាតិសរុប ។
លោក ហេង សុខគង់ បានបន្តថា សព្វថ្ងៃរាជរដ្ឋាភិបាលកំពុងយកចិត្តទុកដាក់ជាខ្លាំង ក្នុងការជួយអភិវឌ្ឍន៍សហគ្រាសខ្នាតតូច និងមធ្យម ដោយរាជរដ្ឋាភិបាលបាននឹងបង្កើតធនាគារ SME ក្នុងឆ្នាំ២០១៩ ក្នុងដើមទុនដំបូងចំនួន១០០លានដុល្លារអាមេរិក ដើម្បីផ្គត់ផ្គង់ផ្នែកហិរញ្ញវត្ថុដល់សហគ្រាសខ្នាតតូចខ្នាតមធ្យមទាំងអស់ ។
នៅក្នុងក្របខ័ណ្ឌគោលនយោបាយម៉ាក្រូសេដ្ឋកិច្ច រាជរដ្ឋាភិបាលនឹងអនុវត្តគោលនយោបាយថ្មីៗមួយចំនួនដូចជា ផែនការសម្រាប់ការអភិវឌ្ឍវិស័យកសិកម្ម និងការធ្វើពិពិធកម្មវិស័យទេសចរណ៍ ។ កំណត់ឲ្យបាននូវក្បាលម៉ាស៊ីនកំណើនថ្មីដែលមានសក្តានុពលខ្ពស់ផ្សេងទៀត ។ អភិវឌ្ឍន៍សហគ្រាសធុនតូច និងមធ្យម (SMEs) តាមរយៈការបង្កើតធនាគារសហគ្រាសធុនតូច និងមធ្យម ។ មូលនិធិគម្រោងអភិវឌ្ឍសហគ្រិនកម្ពុជា (Cambodia Entrepreneurship Development Project Fund) ។
បង្កើតឧស្សាហកម្មថ្មីដែលដឹកនាំដោយរាជរដ្ឋាភិបាល ដោយមានការសហការជាមួយវិស័យឯកជន ដើម្បីបង្កើនការចូលរួមកាន់តែខ្លាំងជាងមុនក្នុងការអភិវឌ្ឍជាតិ ។ រៀបចំខ្លួនដើម្បីទាញយកឲ្យអស់លទ្ធភាពនូវអត្ថប្រយោជន៍ពីការរីកចម្រើននៃសេដ្ឋកិច្ចឌីជីថល និងខិតខំទ្វេដងក្នុងការទាក់ទាញការវិនិយោគផ្ទាល់ពីក្រៅប្រទេស ដើម្បីបំពេញបន្ថែមការវិនិយោគនៅក្នុងស្រុក តាមរយៈការបញ្ចប់វិសោធនកម្មច្បាប់ស្តីពីវិនិយោគ, អនុម័តច្បាប់ស្តីពីតំបន់សេដ្ឋកិច្ចពិសេស និងធ្វើទំនើបកម្មប្រព័ន្ធពន្ធដារ ជាដើម ៕
ចែករំលែកព័តមាននេះ