គ្រឹះស្ថាន​អង្គរ​រក​ចំណូល​បាន​ជិត​80​លាន​ដុល្លារ​ក្នុង​រយៈពេល​8​ខែ


រាជធានី​ភ្នំពេញ ៖ ក្នុង​រយៈពេល​៨​ខែ​ដើមឆ្នាំ​នេះ ភ្ញៀវ​ទេសចរ​អន្តរជាតិ​ជាង​១,៧​លាន​នាក់​បាន​ទិញ​ប័ណ្ណ​ចូល​ទស្សនា​តំបន់​រមណីយដ្ឋាន​អង្គរ​ដែល​នាំ​ចំណូល​ដល់​កម្ពុជា​ជិត​៨០​លាន​ដុល្លារ​អា​មេ​រិ​ក​។ នេះ​បើ​យោង​តាម​របាយការណ៍​ក្រសួងទេសចរណ៍ ។

របាយការណ៍​ពី​ក្រសួងទេសចរណ៍​ដែល​ចេញផ្សាយ​នា​ព្រឹក​ថ្ងៃ​ទី​១ ខែកញ្ញា បាន​បញ្ជាក់​ថា គិត​ចាប់ពី​ខែមករា ដល់​ខែសីហា ភ្ញៀវ​ទេសចរ​អន្តរជាតិ​ចំនួន​១.៧៤៤.៧០៤​នាក់ បាន​ទិញ​ប័ណ្ណ​ចូល​ទស្សនា​រមណី​ដ្ឋា​ន​អង្គរ កើនឡើង​៨,៤៩% បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន ។ សម្រាប់​ចំណូល​បាន​ពី​ការ​លក់​ប័ណ្ណ​ក្នុង​រយៈពេល​នេះ​ដែរ គ្រឹះស្ថាន​អង្គរ​ដែល​ជា​ស្ថាប័នរដ្ឋ ប្រមូល​ចំណូល​បាន​ចំណូល​ចំនួន ៧៨.៧៧៨.២០៨​ដុល្លារ​អា​មេ​រិ​ក កើនឡើង​១៣,៧៩% ។ ដោយឡែក សម្រាប់​តែ​សីហា មាន​ភ្ញៀវ​ទេសចរ​អន្តរជាតិ​ជាង​២០​ម៉ឺន​នាក់ ទិញ​ប័ណ្ណ​ចូល​ទស្សនា​តំបន់​អង្គរ ទទួល​បាន​ចំណូល​ជាង​៩​លាន​ដុល្លារ​អា​មេ​រិ​ក ។

កាលពី​ឆ្នាំ​២០១៧ មាន​ភ្ញៀ​ទេសចរ​ចំនួន​ជិត​២,៥​លាន​នាក់​បាន​ទិញ​ប័ណ្ណ​ចូល​ទស្សនា​តំបន់​អង្គរ ដោយ​ទទួល​បាន​ចំណូល​ជិត​១០៨​លាន​ដុល្លារ ក្នុង​នោះ​ថវិកា​ជាង​៤​លាន​ដុល្លារ ត្រូវ​បាន​ឧបត្ថម្ភ​ចូល​មូលនិធិ​មន្ទីរពេទ្យ​គន្ធ​បុប្ផា ដើម្បី​ជួយ​សង្គ្រោះ​ជីវិត​កុមារ ។

រដ្ឋមន្ត្រី​ក្រសួងទេសចរណ៍ លោក​បណ្ឌិត ថោ​ង ខុន បាន​លើក​ឡើង​ថា កម្ពុជា​ក្រោម​ការ​ដឹកនាំ​ប្រកបដោយ​ភាព​ឈ្លាសវៃ និង​គតិបណ្ឌិត​របស់​សម្តេច​តេ​ជោ ហ៊ុន សែន ដែល​មាន ទស្សនវិស័យ​ច្បាស់លាស់ និង​មាន​គោលដៅ​អភិវឌ្ឍន៍​កម្ពុជា​លើ​គ្រប់​វិស័យ ក្នុង​នោះ​វិស័យ ទេសចរណ៍​ត្រូវ​បាន​ចាត់ទុកជា​វិស័យ​អាទិភាព​មួយ​ក្នុង​ចំណោម​វិស័យ​អាទិភាព​ដទៃ​ទៀត​ក្នុង​ការ​រួច​ចំណែក​ស្តារ​និង​អភិវឌ្ឍន៍​សេដ្ឋកិច្ចជាតិ​។

លោក​រដ្ឋមន្ត្រី​បាន​បញ្ជាក់​ថា គិត​ត្រឹម​ឆមាស​ទី​១​ឆ្នាំ​នេះ កម្ពុជា​ទទួល​បាន​ភ្ញៀវ​ទេសចរ​អន្តរជាតិ​ចំនួន​៣.០០១.៦៦០​នាក់ កើនឡើង​ប្រមាណ​១២,៧% បើ​ធៀប​នឹង​គ្រា​ដូច​គ្នា​នៃ​ឆ្នាំ​២០១៧​កន្លង​ទៅ ។ ចំណែក​ទេសចរណ៍​កម្ពុជា​ចេញ​ទៅ​ក្រៅ ប្រទេស​មាន​ចំនួន​៩៦៤.២៧៦​នាក់ កើនឡើង​ប្រមាណ​១៤,៥%​ផង​ដែរ ។
ទន្ទឹម​នោះ​ភ្ញៀវ​ទេសចរ​ចិន​មានការ​កើនឡើង​ខ្ពស់​គួរ​ឲ្យ​កត់សម្គាល់ រហូត​ដល់​៧៥,៨% ខណៈ​ដែល​ភ្ញៀវ​មក​ពី​អា​មេ​រិ​ក បារាំង ក៏​មាន​ទិ​ន្នា​ការ​កើនឡើង​គួរ​ឲ្យ​កត់សម្គាល់​ផង​ដែរ បើ​ទោះបីជា​កំណើន​នៅ​មាន​កម្រិត​ទាប​ក៏​ដោយ ។

លោក​រដ្ឋមន្ត្រី​បាន​ស​ង្គ​ត់​ធ្ងន់​ថា ៖« រយៈពេល​កន្លង​ទៅ​នេះ វិស័យ​ទេសចរណ៍​មានការ​អភិវឌ្ឍ​គួរ​ឲ្យ​កត់សម្គាល់​ក្នុង​កំណើន​២​ខ្ទង់ ហើយ​សម្រាប់​៥​ឆ្នាំ​បន្ត​ទៅ​មុខ​ទៀត​នេះ យើង​នឹង​ខិតខំ​ធ្វើ​យ៉ាងម៉េច​សម្រេច​ឲ្យ​បាន​តាម​ផែនការ​ណែនាំ​របស់​រាជរដ្ឋាភិបាល​ដែល​បាន​គូសវាស ក្នុង​នោះ​ធ្វើ​យ៉ាងណា​នៅ​ឆ្នាំ​២០២០ ជំរុញ​កំណើន​ភ្ញៀវ​ទេសចរ​អន្តរជាតិ​ឲ្យ​កើន​ដល់​៧​លាន​នាក់​, នៅ​ឆ្នាំ​២០២៥ ឲ្យ​កើន​ដល់​ជាង​១០​លាន​នាក់ និង​ឆ្នាំ​២០៣០ ឲ្យ​កើន​ដល់​១៥​លាន​នាក់ »​។ លោក​បន្ត​ថា ៖« កំណើន​ភ្ញៀវ​ទេសចរ​បាន​ផ្តល់​កាលានុវត្តភាព​យ៉ាង​សំខាន់​ក្នុង​ការ​ជំរុញ​កំណើន​សេដ្ឋកិច្ចជាតិ ដោយ​វិស័យ​នេះ​បាន​រួមចំណែក​ក្នុង​ផលទុនជាតិ​សរុប​១១,៨% កាលពី​ឆ្នាំ​មុន » ។

ប្រធាន​សមាគម​ទីភ្នាក់ងារ​ទេសចរណ៍​កម្ពុជា លោកស្រី ឆាយ ស៊ី​វលី​ន បាន​ឲ្យ​ដឹង​ថា ការ​កើនឡើង​នូវ​ចំនួន​ភ្ញៀវ​ទេសចរ គឺ​ឆ្លុះ​បញ្ចាំង​ពី​ទំនុកចិត្ត ដោយសារ​កត្តា​សុខ​សន្តិភាព និង​ស្ថិរភាព​នយោបាយ​ដែល​កម្ពុជា​សម្រេច​បាន ។លោកស្រី​បន្ត​ថា ៖« យើង​នៅ​តែ​មាន​សុទិដ្ឋិនិយម​ចំពោះ​ទីផ្សារ​នេះ ហើយ​យើង​ឃើញ​ទីផ្សារ​កម្ពុជា​នៅ​តែ​មាន​ភាព​ទាក់ទាញ » ។ ដោយ​មើលឃើញ​កំណើន​ភ្ញៀវ​ទេសចរ​អន្តរជាតិ​កើនឡើង​នេះ ក៏​មាន​វិនិយោគិន​មក​ពី​អឺរ៉ុប​សម្លឹង​ឃើញ​ឱកាស​ចង់​បណ្ដាក់ទុន​វិនិយោគ​លើ​វិស័យ​សណ្ឋាគារ​លំដាប់​អន្តរជាតិ​ផង​ដែរ ។

នាយក​ប្រចាំ​ទ្វីបអាស៊ី​នៃ​សណ្ឋាគារ​Hilton លោក Christian Puchher បាន​ថ្លែង​ថា ជាមួយនឹង​ប្រាក់​ចំណូល​កើនឡើង និង​ភាព​ងាយស្រួល​នៃ​ការ​ធ្វើ​ដំណើរ​តាម​យន្តហោះ​ទេសចរ​និង​អ្នកជំនួញ​ជា​ច្រើន​ត្រូវ​បាន​ទាក់ទាញ​មក​កាន់​ប្រទេស​កម្ពុជា ដែល​ជា​គោលដៅ​នៃ​ប្រាសាទ និង​ប្រវត្តិសាស្ត្រ​ដ៏​អស្ចារ្យ​របស់​ខ្លួន​, ឆ្នេរ​ខ្សាច់​ដ៏​ស្រស់​ស្អាត និង​តំបន់​ទេសចរណ៍ធម្មជាតិ​ជា​ច្រើន​ទៀត ហើយ​ជា​ការ​ពិត​ណាស់​ភ្ញៀវ​ទេសចរ​ទាំងនេះ​រំពឹង​ថា​នឹង​មាន​បន្ទប់​សណ្ឋាគារ​ល្អ​ៗ លើស​ពី​អ្នក​ធ្វើ​ទេសចរណ៍​ធម្មតា​ ។ លោក​បន្ត​ថា ៖« យើង​គ្រោង​នឹង​ចាប់​ដៃគូ​ជាមួយ​ក្រុមហ៊ុន​ក្នុងស្រុក ដើម្បី​វិនិយោគ​សណ្ឋាគារ​នា​ពេល​ខាង​មុខ​ឆាប់​ៗ​នេះ​នៅ​ប្រទេស​ដ៏​អស្ចារ្យ​មួយ​នេះ »៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ